E sombra di mi bida ta e cosnan cu mi a hinca den mi rugtas di bida. No solamente te cu mi 10 anja, pero te ainda cu mi ta un muhe adulto. E cosnan cu otronan tabata desaproba di mi, pero tambe e cosnan cu a hasi ami dolor como mucha y cu mi a manda pa un caminda scondi den mi celebro cu ni ami mes por a jega pa hopi anja.
Mi tabata papia cu un amigo tocante dolornan di bida y den combersacion poco poco cosnan a cuminsa sali di mi subconciencia. Mi tabata corda con di chikito mi tabata mira hende grandi bebe burachi y pleita y bringa cu otro den nan buracheria. Esaki a pone mi haja rabia riba alcohol.
Mi ta corda con mi a hasi mi best pa protega mi sernan keri contra tur cos cu tin di hasi cu alcohol y toch no semper a logra. Di jong ora mi tabata na un fiesta unda hende tabata bebe burachi, mi tabata resa pidi Dios pa no laga nan pleita of bringa cu otro. Na Hulanda mi tabata na un barbecue di Arubiano y tabata tende e stemnan bay halto y e gevoel di tristesa di e mucha chiquito tabata bolbe bin halto. Y mi ta realisa cu nos ta pa gran parti loke nos ambiente directo a laga nos sinti como mucha chiquito. Y toch nos tin asina hopi miedo pa papia riba e cosnan cu a hasi nos dolor pasobra nos tin berguensa. Pero asina nunca nos lo kibra taboe y custumbernan cu por hasi un sociedad hopi mancaron a lo largo. Mi ta puntra mi mes, si tin mas hende cu ta reconoce e sentimento aki?