Bo por traha bo propio felicidad. E receta di un mucha jong.

Con hopi bo pensamentonan ta determina bo felicidad? Un hoben ta duna su tipnan pa felicidad…

hada madrina
“Mi ta scucha y mi ta lubida. Mi ta mira y mi ta corda. Mi ta hasi y mi ta compronde” ~ Confucius

Te hasta algo asina personal manera felicidad ta haja atencion di ciencia awendia. Tanto na Hulanda como Merca ta hasi hopi investigacion pa haja sa reglanan simpel pa asina en principio tur hende por tin un bida felis.
Naturalmente mester cumpli cu cierto condicionnan basico manera suficiente cuminda y bebida, un cas pa biba aden. Tambe ta bon pa no tin malesa y sigi e reglanan cu ta sigi y bo por tin un bida mas felis.
Dus paga tino y traha bo propio felicidad!

Conta bo bendicionnan. Sea conciente di e cosnan bon den bo bida y repasa nan cada anochi. Un biaha pa siman bo por scirbi sikiera un di nan den bo ‘buki di bida di oro’.

Hasi un acto di bondad cada dia. Duna e bisinja bieuw un man pa hasi su cura limpi, bishita un hende cu no tin famia na Aruba.

Disfruta di cosnan chikito di bida: un chuchubi cu ta fluit, un trupiaal cu ta canta, un mucha cu ta hari, un homber grandi cu ta cana fluit. Asina nos por topa cosnan di alegria tur ora di dia, si bo tin wowo pa mira nan y curason habri pa sinti nan.

Pone tempo y energia den bo amigo y famia. Maske cuanto placa, salud y material bo por tin, toch bon relacionnan den nos bida ta nifica hopi pa un bida felis.

Stima bo curpa, drumi bon, hasi movecion y hari hopi. Hari ta laga bo relaja. Pero tambe hasi sport, stretch, hasi yoga ta bon pa bo sinti felis.

Bisa danki na un persona cu a sinja bo algo bon den bo bida. E por ta un maestro di scol of un bon amigo, un amor bieuw cu nunca bo lubida.

Sinja pordona. Laga bay bo rabia. Bo por hasi esaki dor di scirbi un carta na un hende riba ken bo ta rabia. Awor bo ta coy e carta y kim’e. Ora bo ta wak e shinishi bay, imagina bo mes cu e rabia tambe ta bula bay.

Desaroya un bon forma pa anda cu stress, paso nos niun lo scapa di temponan menos bon. Usa pensamentonan manera “Tur cos ta pasa un dia”, ”despues di scuridad di anochi semper dia ta habri cu lus”. “Ami no ta mi curpa, mi ta liber, manera mi Creador a crea mi”. Bisa nan y kere den nan.

Esakinan ta pensamentonan simpel cu tur hende por cumpli cu nan. Pero mescos cu tur cos cu bo kier logra den bida, bo tin hasi un poco esfuerso pa logra. Exito y hopi felicidad!

Leave a Reply

Your email address will not be published. Required fields are marked *