Asertividad y bo futuro cu ta den bo man

Si cada hende den un comunidad bira mas asertivo nos ta haja e nacion cu nos ta haja cu nos merece. Nos propio actitud lo atrae y magnetisa e cosnan cu nos ta desea den nos bida. Nos lo biba den flow. E caminda di menos resistencia lo bira nos forma di bida nobo. Esta un dushi pais Aruba lo ta!

bo bida ta den bo manTin ora nos ta bringa situacionnan den bida, puntrando nos mes pakico ‘ami’. Y nos ta lubida cu den e momentonan di turbulencia nos por sinja cosnan hopi balioso. A menos cu nos no ta interesa pa sinja y ta sufri por nada.

Aunke no semper facil, e caminda di menos resistencia ta sinja nos pa landa cu e marea di bida y sa cu tur cos ta pasa un dia. ‘Mi ta hala rosea, pues mi ta na bida’, un amiga stima a bisa mi despues cu su casa a fajece. ‘Mi a scoge pa rouw na mi manera y no ta tur hende ta di acuerdo cu esaki’. Berdad, tin ora cu tur bon intencion hendenan ta hasi bo caminda mas largo y pisa den bida. Mi a sinja cu nada ta pasa por nada y cada crisis den bida finalmente tin su balor. Tin un dicho cu ta bisa ‘Loke no ta mata bo, ta hasi bo mas fuerte’. Asina berdad, di berdad berdad.

Crisis den bida ta bin ora cu ainda nos ta carga nos muchila di bida cu cosnan cu nos no ta cla cu ne riba nos lomba. Situacionnan cu a pasa hopi anja anterior den nos bida, cu nos a kere cu nos a lubida, tin ora por duna nos un sabor marga den nos stoma ora ora algo re-corda nos riba e tema. E senjal ta cu ‘ainda tin trabou pa hasi’. Experencianan propio y experencia di otro hende a sinja mi cu ta importante pa ta balente y enfrenta situacionnan na momento cu nan presenta y no warda pa nan soluciona pa arte di magia. Pa e simpel motibo cu esaki lo no sosode.

Nos no ta bin di un cultura cu ta sinja nos hopi asertividad. Tampoco nos ta bin di un cultura cu ta sinja nos balora nos talentonan for di chikito. E ora no ta keda nos mucho otro cu explora y discubri nos talentonan nos mes. Di e forma aki nos ta sinja conoce nos forsa… pa por enfrenta adversidadnan den e temponan aki cu no ta mes facil pa tur hende.

Asertivad ta e contrario di apatia cu ta hasi nos esclavo di e circumstancianan den nos bida. Asertividad ta laga nos lanta para pa nos mes y nos derecho. Un actitud asertivo ta evita cu hende ta trapa riba bo derecho. Si cada hende den un comunidad bira mas asertivo nos ta haja e nacion cu nos ta haja cu nos merece. Esaki lo hasi cu nos no mester bringa asina hopi mas. Nos propio actitud lo atrae y magnetisa e cosnan cu nos ta desea den nos bida. Nos lo biba den flow.

E caminda di menos resistencia lo bira nos forma di bida nobo. Esta un dushi pais Aruba lo ta! Bo’n ta kere?

2 thoughts on “Asertividad y bo futuro cu ta den bo man”

Leave a Reply

Your email address will not be published. Required fields are marked *