Beauty with Style ta un instituto specialisa den entrenamento di estecista y masajista. Nan ta traha den cooperacion cu K.O.C. di Hulanda cu ta supervisa tur nan estudionan. Mescos na hopi pais di mundo hendenan ta busca pa haja mas calidad di bida den nan bida di tur dia. Pesey pa anjanan largo Beauty with Style ta treciendo un variedad grandi di estudio y curso na Aruba. Beauty with Style ta tambe orguyoso di tin su propio linja di product di beyesa y cuido personal ‘Madjestic’ y ta representante di Webecos pa Caribe henter.
Den November Beauty with Style ta organisa 2 workshop practico nobo: ‘Wellness Reflexologia pa pia’ y ‘Aroma pa Regalo’
E workshop ‘Wellness Reflexologia pa pia’ ta bon pa tur hende cu ta traha cu pia, pero tambe tur hende cu ta gusta malcria e pianan di nan mes y otro. Den e workshop aki bo ta sinja pa relaha e pia dor di primi riba puntonan cu ta juda henter e curpa sosega y bo ta sinja un masashi relahante pa laga e pia sinti manera cu e ta flota den aire.
Reflexologia ta un terapia Chines cu ta sali di e principio cu cada parti di curpa tin su refleho bou di e pianan. Dor di masseer e puntonan aki ta influencia funcionamento di e organo, musculo of tendon den e curpa na un forma positivo. Banda di esaki reflexologia ta super –relahante pa henter e curpa. Gewoon, dushi!
Un otro workshop nobo ta ‘Aroma pa Regalo’. Den e workshop aki ta sinja e cursista pa traha su mes regalonan a base di aroma terapia pa e temporada di Pasco y pa cualkier otro ocashon. Den e curso Aroma terapia basico ta sinja conoce 10 aroma y nan caracteristica. Dus, con pa usa nan y kico mester tene cuenta cun’e ora traha cu aroma terapia. Tambe bo ta sinja pa traha productonan di cuido personal pa usa na cas. Esaki ta juda pa hisa e calidad di bida di un famia na un forma natural. Ta conoci cu mas y mas hendenan ta busca formanan natural pa biba, ya cu esaki ta mas saludabel y mas economico. E seccion di training y wholesale di Beauty with Style a muda pa Italiestraat 24 A, net patras di Superfood.
