Dios – Comprondiendo Bida

E soledad di Cristo

Mi ta imagina mi mes cu si Cristo Hesus para awe den e haltura di mas halto, e ta wak tur e Bondad y tur e Retonan den un mundo confundi…

E soledad di Cristo Hesus den e mundo actual.

Buscando un potret di Cristo Hesus, esun aki a capta mi atencion y curason. Mi ta wak den e wowonan, e mirada cu ta wak leu aya y toch asina cerca di su mes, paden. Mi ta wak e mannan crusa y ta purba pensa cu e mente di Cristo…
Kico Cristo Hesus a pensa ora e tabata su so. Den hoffi di olijfi y e ciudad na su pia. Su so su so cu su Tata Celestial. Sabiendo kico ta E caminda, E dolor, cu como yiu di hende, E lo pasa aden.

Mi ta imagina mi si Cristo Hesus lo ta sinta riba e mesun baranca ey awe y ta wak bek riba e mundo. Mi ta kere cu E, como un Bon Wardador lo ta hopi impreshona cu e cantidad di bunita cosnan cu ta sosode den mundo… e hendenan di Bon Boluntad cu den tur adversidad y dificultad ta keda duna Bida na e Lus di Speransa pa un dia logra un mundo cu pas y hermandad.

Mi ta imagina mi mes cu si Cristo Hesus para den e haltura di mas halto, e ta wak tambe tur e gueranan, e destruccionnan, e bidanan inocente cu ta caba pa via di conflictonan den cua nan no tin arte ni parti. E ta wak e soledad di e hende den un mundo confundi. E ta wak e excesonan, e inhusticianan y e abusonan.

Mi ta imagina mi cu e ta pensa ‘Mi rumannan stima, mi lo kier pidi boso pa den e Dianan Santo aki, traha un tiki tempo, para keto un rato, sera bo wowo, bay paden y sinta un rato banda di mi riba e baranca den e hoffi di olijfi. Crusa bo mannan, sera bo wowonan, bay paden y hasi contacto cu bo curason y scucha mi curason. E ta pidi bo, pa nos hunto rescata e Birtudnan di Bida, aplica nan den bo bida di tur dia. Laga nan ta bo guia. Ban re-establese e Paraiso cu un dia mi Tata a brinda boso. Den nomber di tur e criaturanan cu ta cana rond, buscando nan felicidad den un mundo, bastante confundi….’

Abo ta cla?

Ingrid, purbando di Compronde Bida..

Sosega na pas, sr. Mitch Henriquez

Nos no por cambia otro hende
Pero nos por ta un ehempel y inspiracion pa nan si.
Y poco poco sin cu nos mes ta ripara
E mundo ta cambiando

Sr. Mitch Henriquez su cara simpatico — Sr. Mitch Henriquez , sosega na pas

Cu e angelnan di nos bon Dios carga Mitch Henriquez riba nan halanan y companje riba su biahe den Reino Celestial.

Cu husticia prevalece.

Y cu Mitch su nomber keda recorda nos cu cada accion di amor cu nos hasi cada dia
ta planta un simia chikito den mundo
pa logra un mundo cu mas pas y harmonia, comprenshon y tolerancia.
Nos no por cambia otro hende
Pero nos por ta un ehempel y inspiracion pa nan si.
Y poco poco sin cu nos mes ta ripara
E mundo ta cambiando

Respetuosamente,

Ingrid Werleman, comprondiendobida.com

Awe Mitch Henriquez ta jega cas, ban companj’e den un caminata di silencio.

Mitch su mama Maria y demas famia a pidi pueblo pa companja nan den un caminata silencioso na jegada di e curpa di Mitch.

Ta 1.11 di merdia. E shelo na Noord ta shinishi. Color di tristesa. Riba e waya di coriente mi dilanti tin tres paharito sinta. Un ta bula bay. Noord, e bario di Mitch Henriquez ta parse di ta prepara su mes pa su jegada mas laat. E shelo shinishi ta refleha e tristesa cu ta reina cerca hopi hende na Aruba.
Pasobra Mitch ta jega cas bek awe. No den e forma cu e lo a bin segun su propio plan. Un tata Arubiano cu a bay bishita su yiunan, famia y amigonan na Hulanda. Algo normal cerca un persona cu tin famia na Hulanda. Mitch ta jega como un difunto bek na e isla unda e la nace y crese.

3 parha di cua un ta bula bay riba un dak den Noord. Bario di Mitch.

Durante su vakantie Mitch a haja su morto a base di trato violento dor di polis. Den un forma hopi tragico, Mitch ta laga su cara, su imagen y nomber atras den su pais madre Hulanda. Un trato violento graba riba video dor di hopi hende cu a considera esaki como un inhusticia contra un prohimo. Podise e trato brutal cu e imagennan ta mustra nos riba media social a planta un simia cerca e autoridadnan competente cu hopi cos mester cambia den e manera cu polis ta atende cu publico. Podise e trato cu Mitch a haja na man di polis, cu a conduci na su morto lo cambia e forma cu hende ta anda cu otro den e pais aki. Cu mas tolerancia, respet y comprenshon pa e diversificacion den cultura cu por trese nos mas cerca di otro, na lugar di separa nos.

Esta un dolor pa un mama... — Esta un dolor pa un mama…

Cada biaha cu mi corda riba e mama di Mitch cu su bela den su man banda di e potret di su yiu den misa di Noord, mi ta imagina mi su dolor. Y mi sa cu awe ta un dolor aun mas grandi ora cu su mama Maria confronta e curpa sin bida di su yiu.

Mitch su mama Maria y demas famia a pidi pueblo pa companja nan den un caminata silencioso na jegada di e curpa di Mitch. E caminata ta sali for di Aerocargo te na Agencia Funeraria Aurora. Laga nos companja un mama y famia den hopi dolor den un forma pacifico. Laga nos resa y canta den e quietud di nos curason pa Mitch su alma sinti nos sosten pa su sernan keri y pa su memoria cu a touch asina hopi hende. 5 or na Aerocargo, pabou di Aeropuerto, nos ta spera cu abo tambe lo t’ey.

Ingrid Werleman, editora Comprondiendo Bida

Un bela pa Mitch y e dolor y balentia di un mama

Mi ta wak e mama, para cu un bela den su man banda di e potret di su yiu cu a muri bou circumstancianan asina violento y mi ta pensa ‘Ki balente e mama aki ta, di por para akinan cu un bela pa su yiu, mientras su curason lo ta kibra den mil pida.

Tabata dialuna mainta cu mi a lesa cu atardi lo tin un misa pa pidi Dios descanso pa e alma di Mitch Henriquez. Y atardi mi a bay misa di Noord, pa mustra mi convivencia. Tambe pa den mi silencio conecta cu mi Dios, cu mama Maria y pidi pa forsa pa e famia y husticia Divino den e caso di Mitch Henriquez. Mi a brasa e mama di Mitch y ta pensa den mi mes ‘Ki dolor e mama aki mester tin den su curason na e momentonan aki’. Despues den e vigilia pafor di misa, mi ta wak e mama, para cu un bela den su man banda di e potret di su yiu cu a muri bou circumstancianan asina violento y mi ta pensa ‘Ki balente e mama aki ta, di por para akinan cu un bela pa su yiu, mientras su curason lo ta kibra den mil pida’.

Cherry, e ruman muhe di Mitch ta contami ‘Senjora, mi ruman ta un hende cu ta semper jolly, semper e ta trese alegria unda cu e ta. Di tur hende, e no a merece un morto asina’. Mi ta di acuerdo cu Sherry, maske mi no a conoce Mitch personalmente, pero mi a bay riba e pagina di Facebook di Mitch Henriquez y akinan mi ta topa un persona simpatico, cu alegria den su postnan. Un hende cu expreshon simpatico. Mi ta topa tambe un banner di juni 2014 cu ta bisa ‘No matter what, in victory or defeat. Hup Holland Hup.’ Y mi ta pensa con cruel destino tin ora ta.

Mi ta sende mi bela y resa hunto cu tur presente. Maske jena cu dolor, e anochi ta tambe hopi sereno cu e luna cla riba e imagen di Cristo den cura di misa. Union di famia y hendenan cu a bin hunto pa comparti nan sentimento na un forma digno di nos Aruba chikito. Vooral e presencia di su hendenan di Noord a resalta. Mi a bay cas bek cu un curason mes pisa cu lihe. Y mi ta refleha riba e palabranan di Mitch su ruman ‘Di tur hende, e no a merece un morto asina.’ Pakico Mitch, mi ta pensa? Ami ta kere cu e misterionan di bida ta hinca den e mente Omnipotente di Dios. Den mi curason mi ta spera cu e morto cruel y inhusto di Mitch por mustra hendenan rond di mundo cu violencia no ta e caminda. Y cu tambe na Aruba cada un di nos por hasi intentonan tur dia pa pensa cu e mente di Dios den cada cos cu nos hasi. Ami ta kere cu Dios lo pensa semper cu amor, cu husticia, cu compashon y tolerancia. Y Dios lo pensa tambe cu alegria di bida, loke nos por sinja di Mitch.’ Cu Mitch haja su pas den e Reino di Dios y cu su famia haja forsa pa surpasa nan dolor y consuelo cu husticia a prevalece den e investigacion cu a ser hasi.

Ingrid Werleman

Con abo lo sinti si tabata bo yiu

Na Aruba: Hues ta pidi 2 aña di prison pa homber cu a abusa di su propio yiu muher menor di edad. Imagina bo cu ta bo yiu. Con bo lo a sinti?

Na Aruba:

Hues ta pidi 2 aña di prison pa homber cu a abusa di su propio yiu muher menor di edad. Imagina bo cu ta bo yiu? Con bo lo a sinti?

Imagina bo kico a pasa den e mente di e mama. Ora hues a dicta sentencia, despues cu hues tabatin ful un declaracion di e mucha cu pruebanan medico.

Cosnan cu ta pone stoma di un hende bolter; cosnan cu lo sali solamente di un mente hopi perverso.

Hues a bisa e tata cu e ta kere e declaracion di e mucha y toch ta pidi solamente 2 anja di castigo.

Kico ta pasa den e mente di un tata cu no ta respeta ni su propio yiu? Di con niun protesta di instancianan cu tin mucha como grupo meta?

Si nos no ta defende e derecho di nos muchanan, ta ken su derecho nos ta defende anto?

Para keto un rato y pensa: ‘Con ami lo sinti si tabata mi yiu?’

Natalie, di adicto pa modelo di speransa…

Natalie no tabata ‘djis’ un adicto mas, pero un ehempel cu semper tin un caminda pa un bida miho. Natalie, un bida cu a inspira…

Natalie, un bida cu a inspira…Mi a conoce Natalie hopi anja pasa, den anjanan 90. Caminda mi a conoce Natalie ta mescos cu hopi hende, como adicto riba caja, pidiendo placa pa cuminda. Buscando trabou di parti flyer pa e por haja poco placa. Natalie tabatin algo special, e tabata comparti su storia di bida. Natalie semper a bisami cu e kier a cambia su bida, pa por tin su yiu cerca dje, pero cu esaki ta asina dificil una bes cu bo drenta den e bida di droga. Natalie tabata conta di su dolor di bida, cu e sa cu e ta hasi su famia dolor, pero tambe di su amor pa hende. E ta conta semper aserca cu e no ta un mal hende, cu e ta stima hende. Mescos cu hopi hende tin ora mi ta dun’e placa of trabou pa parti flyer.

Natalie tabata e personahe riba e potret cu a gana e competenciadi potret ‘Nos hendenan’ na ocashon di 30 anja di Checkpoint Color. E scolnan a haja camara pa laga nan alumnonan saca un potret di nan gusto cu ta refleha amor of algo impresionante. Devah Leenheer tabata e mucha muhe di 12 anja den 6e klas cu a capta un momento den bida di Natalie cu di berdad, berdad a bisa mas cu un miyon palabra. Tabata un potret di Natalie para dilanti di un palo di lus ta come un ijscream. Patras di Natalie tabata mira e edificio di Royal Plaza. E potret a gana pasobra e tabata refleha un contrast asina grandi entre e desaroyo cu Aruba tabata pasando aden y un hende cu no por a haja su lugar den e rapides di desaroyo. Den wowonan di Natalie por a mira e bashi y tristesa di un ser humano cu no a haja su caminda den un mundo sano.

Hopi anja a pasa y mi a topa Natalie atrobe na un anochi di fiesta di Viva La Donna Day, un evento pa trese alegria y beyesa den bida di hendenan cu cancer. Mi a topa un Natalie cu a rehabilita y nos a hiba un bunita combersacion. Natalie a conta Edjean Semeleer y ami tocante su cancer, tocante su bida cu a cambia danki na Adopt an Addict Foundation. E ora a bira cla pa mi dicon semper mi a para y scucha Natalie. Natalie no tabata ‘djis’ un adicto mas, pero un ehempel cu semper tin un caminda pa un bida miho.

Natalie a duna contenido na su palabranan di kier un bida miho y Dios a pone e hendenan corecto riba su caminda pa jud’e. Natalie a cumpli cu loke por ta un mision grandi den bida, pa inspira otronan pa no tuma e caminda di droga. Natalie a modela na e Pink Runway, e iniciativa di Merveline Geerman cu a bira un evento nacional dor di e sosten di Mary Jo Foundation. Den comiensa di siman cancer a gana e bataja cu Natalie tabata bringando cu sosten di asina tanto hende cu ta admir’e y stim’e. E potret aki riba ta refleha pa mi un titulo cu mi a scirbi pa un otro articulo ‘Mi ta muhe, mi tin cancer y mi ta bunita…‘ Cu Natalie drumi dushi den brasa di nos Creador, cu pas y alegria companja su alma den e mundo spiritual.

In de stilte van het leven

Ik heb even de tijd nodig om weer in de essentie van mijn eigen spirit te kruipen. Mezelf ‘zijn’. Schrijven is mijn manier om dit te doen. Delen van wat ik schrijf is mijn manier om misschien wel anderen in hun eigen denkproces te steunen. Is het zo, dan ben je welkom in mijn wereld.

17 – 12 :Ik vraag me af waarom ik altijd aan mijn moeder denk als ik in de pijnzone ben. Misschien omdat ze vanuit de dimensie in de niet-fysieke wereld waarin ze nu leeft mij kan helpen met het verwerken van mijn pijn.

19-12: Even dieper gaan. Nog een laagje dieper en begrijpen waarom dingen in je leven gebeuren. Kijken wat mijn eigen onbewuste aan bijdraagt vanuit mijn levenservaringen. Soms stinken er een heleboel dingen om je heen. En dan op dat moment ontdek je tevens de schoonheid van de mensen die je omringen en die om je geven.

Soms gaat alles terug naar momenten van vroeger. Inprentingen die je onbewust vertellen dat je geen recht hebt op geluk, omdat je nare ervaringen hebt van vroeger. Dingen die je steeds onbewust terugvoeren naar die momenten en ergens een celletje doen piepen. ‘Kijk uit, er loert gevaar. De wereld is een lijdenspoel.’

Ik weet nu beter. Nu even die onderbewuste het zwijgen opleggen. En weten, ik verdien al het goede in het leven. Ik verdien geluk, omdat dat mijn geboorterecht is als kind van de schepping en onze menselijke evolutie. Als we nou allemaal zo denken, komen we er wel. Simpelweg, omdat we een ander geen pijn hoeven te geven om ons goed te voelen.

20 -12 Ik heb even de stilte nodig om stil te staan en te voelen en ook om niet te voelen. Om alleen maar daar te zijn en de gekte van de wereld aan me voorbij te laten gaan.

Ik heb even de tijd nodig om weer in de essentie van mijn eigen spirit te kruipen. Mezelf ‘zijn’.

Schrijven is mijn manier om dit te doen. Delen van wat ik schrijf is mijn manier om misschien wel anderen in hun eigen denkproces te steunen. Is het zo, dan ben je welkom in mijn wereld.

Ingrid Werleman

Un mucha di 13 anja na estado di un bendedo di droga y un majan cu ta wardando riba awe…

Autoridad di cuerpo policial anti narcotica a pone man riba un bendedor di droga Jeremy Wouters di 25 anja, su mama y tambe su chick di 13 anja cu pa colmo ta na estado y no ta bai scol. E noticianan aki a hiba mi bek na e pensamento ‘Mayan ta wardando…’ cu a sali den 2001 den e revista Comprondiendo Bida. Awe e ta ainda mesun actual…

Saca for di noticianan local:

– Autoridad di cuerpo policial anti narcotica a pone man riba un bendedor di droga Jeremy Wouters di 25 anja, su mama y tambe su chick di 13 anja cu pa colmo ta na estado y no ta bai scol. Algun tempo pasa e bendedor aki a sali for di prison despues di tabata sera pa un delito tambe.

…Na warda di Oranjestad a desmantela un banda di hobennan ladron entre 14 pa 25 anja. Mas cu diez detencion a tuma lugar.

…Mama y yiu Venezolano awor ta atracadornan deteni…

E noticianan aki a hiba mi bek na e pensamento ‘Mayan ta wardando…’ cu a sali den 2001 den e revista Comprondiendo Bida. Awe e ta ainda mesun actual…

Mayan ta wardando…

Un promesa na nos yiunan!

Tin un mundo cu ta wardando riba pas…

…Riba hendenan positivo…

…Cu kier aporta pa un mundo bunita y splendoroso…

Cu ta warda riba maintanan cu ta habri cu parhanan cantando…

…Y lamanan limpi, yena cu pisca…

…Cu aire puro, cu nos yiunan por inhala y yena nan pulmon…

Tin un mayan, den cual nos mester sinja boso…

…Muchanan inocente di awendia…

…Con pa plama amor y bondad…

…Cu otronan di boso generacion…

Un mayan, pa boso demonstra, cu tur mayan…

…Lo ta mihor cu ayera…

…Cu bida t’ey pa sinja y mehora calidad di existencia …

…Den tur su facetanan …

Un mayan pa sigui cu e mensaje…

…Y mantene e sonjo BIBO …

Pa logra e mayan aki…

NOS tin cu actua…

… AWE!…

Ban resusita den amor

E mensahe di tur tempo ta un mensahe di amor… Ke hubo, ban ta balente… Ban resusita den amor!!!

Pasco di Resureccion… periodo di refleccion… pakico e jiu di Dios a scoge pa muri na crus?
Kico e kier a bisa nos di berdad? Tin ora mi ta pensa cu e mester kier a duna e hendenan di su tempo un mensahe di amor. Hesus tabata biba den un periodo cu nan tabata mata muchanan chikito riba orden di e mandatarionan. Mescos cu nan tabata mata criminalnan riba crus…

Y awendia, con nos ta para? Ainda ta mata jen di hende den guera rond di mundo riba orden di mandatarionan. Hendenan ta tira otro mata sin motibo algun den diferente paisnan. Kico ta e ehempelnan cu ta pone hende actua asina contra su prohimo?

Nos ta bibando den un mundo cu 10% ta donjo di 90% di e rikesanan. Hendenan ta muri di hamber den un parti di mundo, tanten otronan ta gasta nan placa na luho exorbitante of placernan cu ta corumpi otro ser humano.

Tin ora mi ta puntra mi mes, kico a bay robes cu humanidad. Unda nos a bira e victima di nos propio crecemento sin limite?
Con nos por draai cos bek? Dios lo duna nos un chens pa draai cos bek? Nos ‘kier’ draai cos bek of nos ta keda baila riba e barco di bida te dia e sink mescos cu Titanic?

Podise nos cada un por pensa con nos por resusita, cada un di nos den nos propio grandesa?
Si nos ta traha na imagen di Dios, ya caba nos ta bibando den amor y bendicion, toch? Y awor si nos desvia pa cualkier motibo, podise Pasco di Resureccion por inspira nos pa cada un di nos resusita, no for di morto fisico manera Hesus, pero den e mensahe cu e la laga atras pa mundo.

E mensahe di tur tempo ta un mensahe di amor… Ke hubo, ban ta balente… Ban resusita den amor!!! Abo ta cu cla???…

Ayera tabata Pasco….Un Carta di Hesus

Con bo a pasa bo Pasco? Victor Hunt ta comparti un carta di Hesus pa corda nos riba e origin di Pasco….

Un contribucion di Victor Hunt

Manera bo sa, e dia cu mi ta hasi anja tabata ayera. Tur anja tin un celebracion na mi honor y mi ta kere cu e anja aki e celebracion lo wordo ripiti.
Durante e periodo aki tin hopi hende ta cumprando regalonan, tin hopi anuncio riba radio, ariba television, anto den tur parti di mundo tur hende ta bisando cu e dia cu mi ta hasi anja te jegando mas y mas serca.

E ta hopi bon pa sa, cu por lo menos un biaha pa anja, hende ta pensa ariba mi. Manera boso sa, e celebracion di e dia cu mi ta hasi anja a cuminsa hopi anja pasa. Den cuminsamento hende tawata comprendo y gradicido pa tur cos cu mi a hasi pa nan.
Pero awendia, e ta parse cu niun hende ta corda e motibo pa e celebracion. Famia y amignan ta bini hunto y pasa bon, pero nan no sa e motibo pa e celebracion.

Mi ta corda cu anja pasa tawata tin un fiesta masha grandi mes na mi honor. E mesa di cena tawata jen di cuminda dushi, bolo, fruta, chuculati y mangel. E decoracion tawata tremendo y tawata tin hopi, pero hopi regalo mes.
Pero bo kier sa algo? Ami mes no a wordo invita. Ami tawata esun cu a hasi anja, pero nan no a ni corda pa invitami.
E fiesta tawata pami, pero ora e dia grandi a jega, nan a lagami afo, nan a sera e porta den mi cara….y mi tawata kier pa ta cu nan y come hunto cu nan.

Mi kier comparti algo cu bosonan. Door cu mi no a wordo invita, mi lo tin mi mes un celebracion, un fiesta grandioso. Un fiesta cu lo dura un eternidad. E invitacionan ta sali awe y abo tambe ta invita.

Acepta mi invitacion y mi lo scirbi bo nomber cu letternan di oro den mi buki di bida.

Te aki un rato,
Cu amor
Hesus.

Pa mas informacion:
Victor Hunt
Cel. 565 9171
cvictorh@setarnet.aw

related post: Dios den bo bida segun Victor Hunt