E ta pa mihor. Rosabelle Illes

Abo sa bisa “awor cu mi ta wak bek, mi ta agradecido pa locual a sosode?” Abo sa sinti cu na e momento bo no por ni imagina un motibo, mucho menos reconoce e bon di e situacion? Durante un experencia y teniendo cuenta cu e circunstancia, sin lubida e velocidad di un pensamento pa otro, abo tambe sa permiti pa bida dicidi con bo ta sinti? Dicon nos no por ta agradecido pa locual a sosode na e momento cu e sosode? E ta simpel: nos no ta compronde.

Ideal ta ora un persona articula e motibo di un problema, e acompaña su analisis cu posibel solucionnan. Pero desafortunadamente, mi tampoco no ta compronde. Mi mama sa bisa “Ora cu mi a compronde cu mi no por compronde, mi a compronde” –Betty Werleman. Y esaki ta forma exactamente e estado cu nos mester inhabita pa por ta constantemente agradecido.

Reconoce y respeta cu tin cosnan cu nos no sa. Na mes momento mantene bo espirito cu ta busca, cu ta puntra y cu ta haya sa. E ser humano por hopi mas cu e ta duna su mes credito p’e. Permiti bo mes pa explora mientras cu bo no sa. Curashi ta ora nos admiti ignorancia y tuma cien porciento responsabilidad pa ken nos ta y kico nos ta biba.

Nos ta bira mas consciente cu nos ta conecta cu otro, ora cu nos pone atencion na tur locual ta for di nos control. Investigando esaki ta guia nos na un enseñansa presente den tur disciplina: “Resultado mundial ta e suma di experencia individual” (Illes, 2010, p. 10). Ta un cos so bo mester sa, locual a sosode mester a sosode paso eynan nos ta awor como famia di sernan humano. Ora cu nos cansa di locual ta for di nos control, nos lo bay busca pa sa con nos por mehora nos destino. Den e buskeda aki nos lo ripara nos responsabilidad. Mas importante, nos lo cuminsa na eherce e unico manera pa ta constantemente agradeci. Den e momento aki, nos tur lo compronde.

Bo reflexion den un otro dimension

Bo reflexion den un otro dimension
Bo no a yega di puntra bo mes dicon?
Dicon ami, dicon e, dicon abo
den e situacion
Un situacion fastioso, un situacion doloroso,
un situacion cu ta pone bo mes puntra ta dicon!
Ta e reflexion di unda nos ta awor
Como sernan humano, como amigo y amiga pero no famia
Como famia pero no parti di nos bida
no como un pida di loke ta forma anos
ami, abo y e
den e situacion
Un situacion di goso, un situacion amoroso,
un situacion cu ta pone bo mes puntra ta dicon!
Dicon anos y no anan?
Ta e reflexion di unda nos ta awor
Ta e balor di e individuo … y e speransa di e duo
Transformacion disfrasa den bo reflexion
paso nan sa unda abo ta, den bo estado simpel
Cambio y inspiracion ta aparece den bo reflexion
paso nan sa di e situacion
Nan sa di e momentonan crucial,
ora abo ta haci e pregunta, e pregunta cardinal
E contesta ta rekeri esfuerso
pero nan t’ey
Nan ta presente den bo accion di simplesa
Permiti nan di ta un guia,
un punto di bista
un señal di transformacion, cambio y inspiracion
Bo reflexion den un otro dimension.
– Rosabelle Illes
(Illes, 2010, p.8)

E poesia “Bo reflexion den un otro dimension” ta saca for di Rosabelle su segundo tomo di poesia titula “Spiel di mi Alma” (2010) cu lo wordo introduci 21 di december 2010 na Aruba Surfside Marina pa 6’or di atardi.

 Loading ...