E mama cu a bira wela

Mi ta realisa cu e metanan grandi tin ora ta scondi den e cosnan chikito, manera e brasa di mi nietonan.

Di mama pa wela
Di mama pa wela

Dia di mama 2015, un ocashon cu a pone mi refleha riba mi diferente rolnan den bida. Di muhe cu a bira mama decadanan pasa, awe mi ta pone aserca e mama cu a bira wela. Mirando bek mi ta corda e idealnan di mi como mama. Mi tabata kier ta un mama cu lo dedica hopi tempo na su yiunan. Mi kier a bira e mama cu concientemente lo a mira su yiunan crese. Mi kier tabat”ey pa nan den cada fase di nan bida. Mi ta corda cu un amiga tabata jama un mama asina un ‘oermoeder’, e ‘mama Original’ mi lo traduci esey. Mi a logra esaki na Hulanda, te dia cu mi a bolbe Aruba y a cuminsa traha como trahado social-educativo den trabou comunitario. Akinan mi a descubri mi afinidad hopi grandi pa traha na un miho comunidad y un miho mundo, manera mi a sinja den mi estudio na Hulanda. Mi a traha podise cu demasiado dedicacion y mirando bek mi ta lamenta cu mi no a bira e mama cu mi a desea di ta den mi vishon di bida. Mescos cu asina hopi mama di mi generacion, mi kier a duna mi yuinan mas cu ami tabatin. Y den e proceso aki mi ta haja cu segun mi, mi a slek den e cos di mas importante cu un major por duna su yiunan, esta ‘tempo’.

Super Wela
Super Wela

Tempo a sigi pasa y tanten mi a bira wela tambe. Y aki, na cierto momento mi a priminti mi mes di no hasi mesun fout. Circumstancianan a pone cu pa un par anja mi a pasa hopi tempo cu mi nietonan. Y aki a crese un otro vishon den bida. Si antes mi kier a cambia e mundo, awe mi ta realisa cu e metanan grandi tin ora ta scondi den e cosnan chikito, manera e brasa di mi nietonan. Mas cercania cu mi yiunan mester di mi y relacionnan genuino. Bida den e bida aki nos por bibé un solo biaha.

Mi a sinja di ta mas conciente di mi escogencianan. Tempo y cosnan material ta pasa bay, e recuerdonan felis ta sigi cu mi te den eternidad. Biba un bida mas simpel, purba di inspira otro sin carga cu henter e mundo y biba mas den e cualidadnan di mi curason a duna mi hopi pas.
‘Tuma Tempo’ pa saborea momentonan balioso, cu no semper ta bolbe ta importante pa mi. Tuma tempo pa hasi, refleha y sonja. Bida ta super y universo ta jena cu amor y felicidad. Nos tur por sinja con pa gara e trein di felicidad, prome cu e bay laga nos. Felis siman di e mama cu a bira un wela felis!

Si Hesus por a wak bo di un distancia, kico e lo pensa di bo bida

E forma cu nos ta pasa e periodo di Cuaresma a cambia. Hendenan riba 50 anja por corda con antes nos no tabata come nada dushi den Cuaresma.

Re-encuentro cu Hesus
Re-encuentro cu Hesus

E forma cu nos ta pasa e periodo di Cuaresma a cambia. Hendenan riba 50 anja por corda con antes nos no tabata come nada dushi den Cuaresma. Na scol nos tabata haja un potchi unda nos tabata warda tur cos te ora cu Cuaresma pasa nos ta come nan. Cuaresma tabata un periodo di kietud, pa hende por refleha riba bida, morto y resureccion di Hesus.
Awendia den Cuaresma tin tur sorto di actividad festivo y jen di desorden. Toch ainda tin hende cu ta mantene tradicion di nan mayornan y ta tuma Cuaresma como un periodo pa refleha riba bida. Y pakico no? Den e quietud di nos bida, den semana santa, ban pensa kico nos kier aporta pa un mundo mas felis. Si Hesus por a wak bo di un distancia, kico e lo pensa di bo bida?

Den e fin di siman druk aki, ban usa nos birtudnan. Cortesia, pasenshi, compashon,. Corda cu no ta den e ‘cosnan grandi’ e milagernan di bida ta sinta, pero den e milagernan chiquito cu nos ‘cada un’ por hasi tur dia…dor di lanta mainta y dedica nos bida na ‘sirbi’ bida, ta positivo, pidi despensa pa e foutnan y dolornan di pasado. Podise nos por juda crea un miho mayan, dor di crea un miho ‘awe’ den cada momento cu nos ta biba, cu nos ta existi…Y si Hesus por wak mi for di un caminda den e cuaresma aki, mi lo spera cu e lo ta satisfecho cu loke e ta mira.

60 y no regrets

Y di paden tin un stem cu ta bisa mi ‘Lo miho ainda tin cu bini.’ Y di esey mi tin sigur.

ingrid 60
ingrid 60

Un bon amigo a jega di bisa mi cu nos ta biba bida cu bista den futuro y nos ta compronde bida mirando atras. Pa mi, esaki ta sinti manera hopi berdad.
Sesenta anja tabata parse mi hopi bieuw tempo mi tabatin 20-30 anja. Awor cu mi a jeg’e, mi ta sinti mi sigur di mi mes y e escogencianan cu mi a hasi. Escogencianan a base di e libertad cu mi ta sinti. Libertad di wak atras riba mi bida y bisa mi mes ‘den cada situacion mi a hasi lo miho cu mi tabata por, bou di e circumstancianan cu mi tabata aden.’

E dushi di 60 ta cu mi por afford pa no tin pura, mi no tin mester di ansha mas. Mi a pone mi marcanan di pia y e pianan lo sigi cana nan propio caminda. Ki luho, porfin mi por permiti mi mes e luho pa ‘Tuma Tempo.’
Como hende, hopi biaha nos ta puntra nos mes, si nos a hasi e miho. Ami ta kere cu si. Nos por hasi solamente nos best. Pasobra nos no por scoge pa otronan, ni cuanto nos ta stima nan. A lo largo di bida mi a sinja pa laga hopi di mi sonjonan cay, mescos cu mi idealnan, pasobra hopi cos no ta den mi man. Mi mester a sinja laga bay y wak cosnan bay robes, mientras cu mi sa cu por a bay otro.

Mi a gradici pa mi logronan, ora mi a sinti cu mi por a hasi un diferencia den mi mesun bida, pero tambe di otronan. Dunando hopi di mi mes pa logra un pais, un mundo miho y metanan grandi, mi a sinja mas y mas cu e felicidad mas grandi tin ora ta den cosnan asina chikito manera un hende cu ta duna mi un brasa, pasobra e palabranan cu mi a bisa of scirbi a jud’e den su bida.
Of un mucha chikito cu ta corda e cosnan creativo cu nos a traha hunto, te hasta ora nan a bira mucha grandi caba.

Tambe mi a mira hopi oportunidadnan pasa bay, pa mi mes y pa otronan, talentonan cu nunca a florece. Bida ta escogencia. Mi a mira alegria y inhusticia, gratitud y envidia, inspiracion y weganan di poder.
Mi a admira e bunitesa di creacion y e danjo di mannan humano. Y mirando bek, mi a haja semper loke mi a pidi, conciente of inconcientemente. Maske no semper mi a realisa esey na e momento cu mi tabata ‘eynan’.

Mi ta corda cu desde un edad hopi jong mi a pone dos meta den mi bida. E prome ta cu mi kier laga atras un mundo miho cu mi a haja, pasobra mi kier pa mi yiu- y nietonan tambe tin un habitat pa nan biba. Di dos ta cu dia mi jega na fin di e caminata humano, mi por bisa mi mes cu tabata bale la pena pa biba.

Mi no sa si mi a logra e prome meta. Mi no ta hopi contento di e mundo cu nos ta bibando aden actualmente. Mucho guera, mucho violencia, mucho descordia, pero mi tin speransa riba un majan cu lo surgi un dia cu ta miho cu su ayera. Mi por bisa solamente cu mi a hasi mi best y mescos cu ami, mi a topa hopi otro hende cu ta hasiendo mescos y cu ta un inspiracion pa mi.

Asina mi ta jega na e di dos meta. Y mi conclushon ta ainda cu mi a biba un bida cu ta bale la pena. Pa mi mes, sin cu mi mester di e balorisacion di otro hende. Nos cada un tin nos balornan interno y esaki ta diferente pa cada un. Den mi opinion nos lo tin pas dia nos acepta esaki como berdad universal.

Mi ta agradecido na e projecto cu mas a marca mi bida ‘Comprondiendo Bida’ cu a start manera un experimento y a bira mi companjero fiel pa casi mita di e anjanan mi tras. A lo largo di tempo ‘Comprondiendo Bida’ a bira mi caminata y buskeda di contestanan di bida cu mi a comparti cu un publico mas grandi. Un proceso cu nunca ta caba. Cada stap lo hiba na e proximo y podise ta asina bida ta intenciona di ta. Un proceso, sin expectativa, ni lucro, ni luho. Un proceso cu ta hiba cada un di nos na nos mes. E esencia di ken nos ta…

Mi lo sigi hasi mi best, pero mas cu tur cos, sigi gosa cada minuut di mi caminata riba e planeta aki. Y di paden tin un stem cu ta bisa mi ‘Lo miho ainda tin cu bini.’ Y di esey mi tin sigur. Mi ta agradecido na Bida pa cada experencia, su dushi y su zuur. Nan a sinja mi pa aprecia y balora e persona principal den e storia di mi bida, esta ‘mi mes’.

Mi a sinja cu mundo ta sigi lora toch. Cu mi of sin mi.
Porfin mi a compronde e berdad grandi cu como hende, nos ta asina insignificante compara cu e Universo cu no tin fin.
Dushi! Mi tin mas tempo awo, pa mi mes, esta un luho asina balioso.
Esta dushi bida ta!

Mi ta o.k., abo tambe!

Pensa otro y inspira bo yiu pa mira bunitesa den bida

Bo yiu tin derecho di crea su mesun sonjonan. Su caminda di bida. Wak su talento y interes. Gui’e y apoy’e.

sinja bo yiu desaroja su talento
sinja bo yiu desaroja su talento

 

Como ser humano nos tin e tendencia di keda pega den nos mal experencianan di bida.

Nos tin tambe e tendencia di pasa e actitud aki pa nos yiunan.

Aki nos ta crea un circulo vicioso cu ta pasa di generacion pa generacion.

Cuanto biaha abo a bisa of tende e siguiente expreshon?

‘Wak kico e mes a pasa aden y toch e la drei hasi mescos!’

Pensa otro y inspira bo yiu pa mira bunitesa den bida.

Inspir’e, dun’e di bo tempo y amor .

Dun’e conseho, pero no pasa bo miedonan p’e.

E tin derecho di crea su mesun sonjonan.

Su caminda di bida.

Wak su talento y interes.

Gui’e, apoy’e.

Ta e miho modelo p’e.

Si, bo por!

 

Ingrid Werleman pa www.comprondiendobida.com

E buskeda pa un mundo inocente cu casi ya no ta existi.

e mucha cu ta e guardian di nos consenshi

Barbie, simbolo di inocencia cu a cambia
Barbie, simbolo di inocencia cu a cambia?

‘Nos no a hereda e Mundo aki di nos ancestronan. Nos a fi’e di nos Jiunan.’  ~ Proverbio Indjan

Nos por mira nan wowonan chikito spanta ora nos mira noticia di guera, na television y den corant. Y wak bon, hopi biaha un mucha lo busca su peluche pa bay cu n’e. Ora e ta bay drumi, sali, biaha y si, te hasta ora e ta huy di guera of di violencia. ‘Stranjo, no?’, un adulto lo pensa. No, pasobra te hasta den un mundo marca pa violencia, muchanan semper lo sigi hunga tur caminda.

Den e drama di e avion di Malaysia Airlines e potretnan cu mas a toca e curason di hende ta esunnan di e buki di un mucha cu tabata abordo, e peluchonan y pa no lubida e potret di e soldad cu e macaco.

No ta stranjo, pasobra maske nos no ta realisa, majoria sentimento di dolor y alegria den nos bida tin nan rais den nos anjanan di mucha chikito. E potret di e mucha y su pelucho un caminda den nos memoria ta hiba nos bek na e mucha den nos mes y un mundo inocente cu casi ya no ta existi.

Y esaki podise a bira pio cu e popularidad di e social media y e libertad di expreshon cu facilmente por transforma den libertinaje di expreshonnan emocional.  Ora mi  wak riba Facebook, mi ta haja e impreshon cu tin hopi hende a bira experto den tur materia. Ta parse cu hende ta competi pa ken tin rason of E berdad, lubidando cu E Berdad ta haja un cara diferente den cada opinion personal. Ora mi sinti  cu hende ta competi pa ken ta haja mas atencion, esaki  ta pone mi  bira keto di paden, pasobra mi no kier ta den e ratrace ey. Mi ta sinti cu cambio den e forma cu nos ta wak bida lo bin solamente ora nos por jega na e puresa den nos curason. Anto aki e criaturanan chikito den mundo y cu nos tambe un dia tabata, ta hunga un rol atrobe.  Solamente mirando bida for di e wowonan di un mucha, nos por bay bek na e estado di conciencia cu ta puro y no por ser cumpra ni corumpi. Y te na e momento aki, nos ta cla y prepara pa hasi nos trabou como adulto.

Mi stima bida y mi lo kier laga un mundo pa mi yiunan y mi nietonan atras cu ta miho cu loke mi a haja. Y mi sa cu den curason di cada ser humano tin e deseo di ta felis y hasi otro felis. Lastima cu materialismo y hamber pa poder  a cambia hopi  hende nan prioridadnan.

Ami semper  lo kier mantene mi vishon di nos mundo como un Shangri La of Utopia, pasobra por. E ta rekeri conciencia y e lidernan adecuado cu no tin prijs riba nan cabes. Pa mi e ta bay pa hende por biba den respet pa otro y pa tin lugar pa cada hende. Y e simbolo ta e mucha cu ta e guardian di nos consenshi.

Ingrid Werleman, juli 2014

 

E Tata ideal

Felis dia di tata na tur cu di un of otro forma ta cumpli cu e rol di tata

Tata y yiu
Tata y yiu

E Tata ideal, un bon ehempel, un inspiracion, un fuente di confiansa, un brasa, un schouder pa bo yiu jora su pena, un hari pa bo comparti, un conseho cu su yiu por scucha, un fuente di confiansa.

Tempo cu tata y yiu por comparti tin ora ta haja nan balor atraves di tempo cu mas experencia y sabiduria.

E tata ideal ta haja bida cada biaha cu un yiu nace. Cu e bida nobo ta nace y crese sonjonan nobo, speransa nobo. Pero tambe retonan nobo.

E retonan, juist. Nan ta esunnan cu cada bes por pone un capa scur mei mei di e tata y su sonjonan. Situacionnan cu ta aparece y cu como hende bo no ta tene cuenta cu n’e. Tin hende cu ta enfrenta nan y busca un otro caminda pa jega na e mesun resultado desea. Tin otro hende cu ta busca alivio pa nan retonan den cosnan cu ta aleha nan juist di e yiu cu tanto nan a stima. Un amor cu ta bay bek te e momento cu nan a topa otro pa prome biaha. Esaki ta ora e yiu a dal su prome grito di bida.

Bida no semper ta cumpli cu nos sonjo y speransanan. Pero ta e persona su escogencia pa mantene su mes na su ideal, promesa y compromisonan. Retonan no t’ey pa hasi bida imposibel. Nan t’ey juist pa nos desaroya nos talentonan y no laga un di e responsabilidadnan mas grandi den bida cay.

Awe ta dia di tata. Tum’e como un dia pa haja bunita regalo y cosnan tierno traha na scol. Tum’e tambe como un dia pa reflecciona riba kico ‘ser tata’ pa bo ta ensera.

Pasenshi, amor, compashon, empatia, pordona, compronde, madures, tempo comparti. Podise esey ta e esencia di e tata ideal?

Felis dia di tata na tur cu di un of otro forma ta cumpli cu e rol di tata.

 

Elevation y un regalo pa Jermin Bell cu a hasi anja awe.

E poesia ‘ELEVATION’ ta saka for di e buki “Nameless di Jermin Bell. Publica cu ayudo financiero di ” Prins Bernard Cultuur Fonds Caribisch gebied.

Jermin Bell
Jermin Bell – Nameless

Pabien Jermin! Bo a hasi anja awe, un bunita dia pa Comprondiendo Bida comparti e pensamentonan aki di e periodo cu bo a lansa bo buki ‘Nameless’. 

CB: Si bo lo tin dos ora den bo bida pa jena cu loke mas lo hasi bo felis, – e magician ta duna bo un regalo-… con bo lo jena e dos oranan aki?

Jermin Bell:Mi lo tuma 10 minuut pa sinja tur hende na mundo con pa medita. Dj’ey tur hende na mundo y ami lo medita pa 50 minuut y e siguiente ora mi lo pas’e hungando tennis cu e ruman nan Williams y Rafael Nadal.

CB: Bo kier comparti un poema cu nos lesadornan?  Esun cu mas a touch bo alma ora bo a scirbi’e!

Jermin Bell: Tur mi scritura nan ta bin for di mi alma, pues tur ta toka mi alma. Siguiendo riba e topico di nos hoben nan mi ta kere cu Elevation ta scritura cu sigur por duna e hoben y tur lesado un speransa den nan mes y den humanidad. Paso e ta papia over e don cu cada ser humano tin den nan pa por eleva nan alma na otro dimension nan cu ta existi.

Elevation

In every single one of us there’s a fire that burns

This fire elevates us

It motivates our decisions

As human beings we are prone to make mistakes

To act ungodly

To act as … human beings

In the face of our spiritual leaders and ancestors

In the face of solutions

We choose to act as human beings

Do we really need to be inspired?

There is music, there are movies, documentaries, motivational speakers, poems, sketches and enough people to show us the way

Yet we look away

Because… we’re human beings

But are we really?

When do we choose to be human?

If I told you that we are more than human beings, would you believe me?

Because the truth is that we are

The fire inside our hearts is everlasting

And no matter how many times we attempt to put it out with our silly types of water, saying that we’re only human.

We’re reminded again when the fire starts burning.

Let the fire burn the humanity out of you

And become more than only a being

Become the more, the beyond… become the ultimate entity

Allow the enigma to manifest and elevate you to a dimension where everything is infinitely better than what you could have imagined.

Because you are ready for it… this I know because you have a fire that burns …

CB: E poesia ‘ELEVATION’ ta saka for di e buki “Nameless di Jermin Bell. Illustracion nan ta di Marco Biemans”. Publica cu ayudo financiero di ” Prins Bernard Cultuur Fonds Caribisch gebied.

Mama Universal

felicidad tin ora ta den cosnan hopi chikito.

sigi bo pia
Laga bo pia bay unda bo curason ta guia bo!

Un dia mi kier a cambia mundo

Boluntariamente mi a duna hopi di mi mes

Pasobra mi tabatin un sonjo

Un sonjo di un mundo cu husticia

Y igualdad.

Un humanidad jena cu compashon pa otro

Tambe pa nan mes.

Un dia mi tabata kere cu esey lo hasi mi felis

Awe cu mi ta mas grandi

mas experencia den sabiduria di bida

mi ta realisa cu felicidad ta den e cosnan mas chikito

asina chikito manera e alegria di mi nietonan

e combersacionnan cu mi yiunan

e storianan di mi rumannan

y amigonan

e potretnan di mi ancestronan

e dushi di intimidad cu mi por a comparti

e brasa cu mi ta duna mi mes

ora no tin niun hende band’i mi

di berdad, mi a cambia e mundo

pa uno mas felis

aunke sea

unicamente

mi mundo

den mi mes

april 2014, ingrid werleman

Coram Deo, den presencia di Dios

Jesus lo ta cubo awoki, For di bo stimacion, Te na ora di bo absolucion

Cristo Rey
Cristo Rey

Animo mi bida

Animo mi amor

Awor cu ta e ora di devocion

Tene duro na bo honor y grita

Jesus ta mi Salbador

Canta e canto

Ora e oracion

Jesus lo ta cubo awoki

For di bo stimacion

Te na ora di bo absolucion

Anima bo curpa

Anima bo curason

Cu rosea cortico

Canta bo ultimo Credo

Resa e ultimo Oracion

Manera Jesus mes a sinja nos

Autor: A. Figaroa ©

Tempo di ayera

Bay suave, mi yiu. Bida tin hopi ainda pa biba

tempo di ayera
tempo di ayera

Tempo di ayera

 Tin ora mi tin hopi gana di bolbe den e tempo

 Unda bida tabata hopi mas facil

 Mas trankilo

 Menos complica

 Bay suave, ruman

 Bida tin hopi faceta

 Hopi kronkel

 Hopi beyesa

 Hopi bunitesa

 Hopi di nos cada un

 Cu hunto ta forma

 E net di existencia

Bay suave

 Mi yiu

Bida tin hopi ainda

Pa biba

~ ingrid werleman, 2014