2011, un anja nobo, y un abo nobo… Den e ultimo articulo nos a papia riba con hopi pas bo tabatin cu Pasco. Awe nos ta bay mas profundo riba e tema aki. Pesey ban wak con nos kier drenta 2011 pa nos tin mas pas y felicidad.
2010 a cambia hopi di nos seguridadnan den bida. Crisis mundial, inseguridad, cambionan drastico den clima, tambe na Aruba. Cosnan grandi riba cua hopi biaha nos no tin hopi influencia… Pesey laga nos keda cerca di cas y cerca di nos mes…’Abo mes!’.
Awe e prome 2 tips…
1. Dispidi di e anja bieuw…laga loke no ta sirbi bo tras… Den un anja por pasa hopi cos. Bo por a logra bo metanan, topa e amor di bo bida, conoce hendenan fantastico… of podise no! Bo por tabatin desenganjo, bo por a perde placa, perde un ser stima of perde un amor! Kico cu bo a pasa aden… usa e bon y sinja di e fout y desenganjonan.
Prome cu bo cuminsa cu e anja nobo… repasa loke bo a pasa aden y sinja di dje… No laga cosnan na mita. Refleha riba ‘unda mi kier ta den 2011’. Esey ta importante. No keda sinta cu ‘unfinished business’. Puntra bo mes con pa laga pasado atras y bay padilanti. Pa kico mi por ta agradecido y kico mi kier wak diferente? Tin cos cu mi por sinja?
2. Duna bo cabes sosiego…hasi’e bashi… Di berdad cu si! Ora bo cabes ta jen di stress… no ta keda espacio pa ‘focus’. Ta hopi importante pa bo drenta un anja nobo cu propositonan nobo tambe. Pensa pa bo mes kico ta duna bo stress… bo por elimina e cosnan aki di bo bida. Si e contesta ta ‘si’, no pensa dos biaha. Tira nan den e bari di sushi fisico of esun mental. Imagina bo mes cu un caminda den universo tin un bari di sushi y manda tur bo ‘sushi mental of emocional’ eynan. Bisa nan ‘ayo’ pa semper.
Drenta e anja nobo cu un sentimento dushi, no sushi. Traha un lista di e cosnan cu bo kier traha na nan. Kico bo kier cambia y kico bo no kier cambia? Kico ta e stapnan cu bo por tuma pa logra esaki? Con bo por hasi bo bida mas agradabel y lihe? Pa kico bo ta agradecido?
• Cuminsa pa papia na un forma positivo cu bo mes… • Wak y reconoce bo Balor y bo Talentonan…
• Sa cu bo no por cambia bo pasado, pero bo por tuma paso pa hasi bo futuro di tal forma cu bo lo sinti bo mas felis…
• No ta facil pa cambia bo custumbernan, pasobra a lo largo nan ta bira nos personalidad. Pero corda cu mescos cu nos a sinja nan, nos por sinja pa laga nan bay y sinja custumbernan nobo…
Exito y majan… mas tips balioso….
Ja cu mi tin hoooopi tempo liber como Domestic Engineer, mi a lesa otro bunita relato di bo. Mi ta felicita bo un biaha mas pa comparti cosnan bunita den palabranan cu tin bida den nan, cu por re-educa nos tur. Mi anja nobo lo ta un sorpresa atrobe.. Mi ta kere den Dios y su yiu Hesus, su amor y pasion den mustra nos pa tin fe no matter what. Un bon anja pa bo y bo Johan culmina cu hopi amor. , Ingrid, mandami bo email di nobo, pasobra manera bo sa, mi ta ketobay un computer dummy hahah!
Hugs and kisses for both of you , take care of yourself and of each other with much love……God bless !! Ruthy.