Mas y mas nos ta tende awedia di ‘violencia sin sentido’. Violencia sin sentido tin diferente grado. E por varia di danjo fisico grave, te morto di e victima. E matamento sin sentido recientemente den un shopping mall na Hulanda dor di un hoben hulandes ta cay bou un categoria extremo di violencia sin sentido. Mescos cu e habrimento di e graf di defunto Betico Croes na Aruba tabata violencia sin sentido. Un acto hopi macaber y falta di respet pa un persona cu a nifica asina hopi den Aruba su historia.
Con pa preveni violencia sin sentido?
Cada biaha cu violencia sin sentido tuma lugar esaki ta shock comunidad di nobo. Claro, tur hende ta di acuerdo cu violencia sin sentido ta un problema nacional. E ta hasi hende rabia, tristo y confundi. Pregunta cu semper ta hasi ta: “Con cos por a jega asina leu? Con nos por a preveni? Pa logra esaki hopi biaha ta punta dede riba gobierno, pasobra gobierno lo mester protega pueblo di violencia sin sentido. Pero si nos mira bon, kico gobierno por hasi pa preveni un situacion pa cua ningun hende ta prepara?
Generalmente e agresor no ta duna senjal adelanta y polis no por ta tur caminda pareu. Y si no tin senjal con por prepara pa situacionnan cu ta caba na un forma violento y fatal?
Violencia sin sentido por tin di hasi cu procesonan personal profundo. Pero tin formanan tambe cu paso pa paso por juda e posibel agresor refleciona y cu bon coaching cuminsa un bida ful nobo.
Ora nos kier preveni of evita violencia sin sentido, nos tin di sinja di experencianan anterior cu violencia sin sentido. Esaki ta loke husticia ta hasiendo awor na Hulanda den e caso di tiramento den e mall. KICO TA PONE UN HOBEN DI APENAS 24 ANJA TIRA HENDENAN DESCONOCI MATA SIN UN MOTIBO? Nan kier haja sa kico ta su motibonan personal pa comete e acto di violencia aki? Despues di analisa e motivacion y meta personal por saca conclucion y prevencion pa futuro di e datonan aki. Esaki na Aruba autoridadnan competente por hasi tambe si un dia haja sa ken a habri e graf di defunto Betico?
Informacion, educacion y ensenjansa na un forma structural:
Informacion, educacion y ensenjansa ta e base di un comunidad sano. Pero nan ta penetra ora nan ta desaroya segun un plan, cu un vision unda kier hiba un comunidad. Nan ta importante pa educadornan, majornan y voogd. Nan ta esunnan cu ta e ehempel di e muchanan desde chiquito. Nan ta esunnan cu por contribui na un generacion cu ta conciente cu violencia no ta un opcion pa soluciona problema.
Na scol por duna les riba balor y norma y actitud civico responsabel. Cada dia ta bira mas urgente pa mustra nos comunidad riba e peligernan di abuso di alcohol y droga. Mescos ta bon pa informa pueblo riba e efecto psycologico di rabia y emocion negativo. Esakinan tur por ta causa di violencia sin sentido. Banda di esaki ta importante pa duna atencion y guia special na muchanan cu pa motibonan social por tin emocion y actitud violento desde jong. Dicon? Pasobra esaki por ta indicacion cu e mucha por desaroya un caracter violento den futuro, aunke esaki no ta di mes. Y na fin di dia, no ta miho preveni cu lamenta? Ban uni man, pa nos comunidad! Abo tambe?