Post Traumatic Stress Disorder – PTSD y EMDR

PTSD ta un desorden psiquiatrico cu por ocuri despues di un experencia traumatico den nos bida y cu normalmente ta involvi morto of intento di hasi nos daño of lesiona nos integridad fisico of di otro persona, segun American Psychiatric Association.

EMDR tambe ta trata Depresion post-parto, ansiedad, fobia, panico, stress severo, violacion y abuso sexual, disfuncion sexual, auto estima abou, adiccion y dependencia di quimica den tur etapa, problema psico-somatico, dolornan cronico, abuso domestico y di menor, testigo di morto violento y crimen, cirugia, victima di kima, maltrato fisico y verbal, victima di desaster natural y desaster nan causa pa hende y depresion pa e perdida di un ser keri, ta solamente algun aspecto y casonan relaciona na Aruba cu PTSD.

“Na Aruba, tin un gran cantidad di persona, pa no bisa e mayoria, cu a yega di experencia un situacion traumatico den nan bida, cu no a haya e tratamento adecua pa supera e trauma y angustia cu nan ta enfrenta diariamente. Sin e tratamento adecuado, e posibilidad pa cay den un depresion, stress, ansiedad of fobia severo ta multiplica.

Situacionnan cu por degenera den peor caso ta addicionnan fuerte, detencion den un centro psiquiatrico y asta suicidio”.

Den e ultimo añanan, e sistema psicoterapeutico yama EMDR (Eye Movement Desensitization and Reprocessing) ta wordo practica den diferente pais cu hopi exito. Ya na Aruba, atraves di su consulta priva drs. Mitsy Willems ta pone e sistema psicoterapeutico aki den practica y ta haya resultadonan favorabel.

“E funcionamento di e tratamento di EMDR ta consisti di un protocol y paso nan pa segura y garantisa mehoracion inmediato di e cliente cu ta den e proceso di terapia. Pa por a trece e sistema y duna tratamento, mi mester a certifica mi mes door di tuma trainingnan den exterior y inverti den recurso economico pa por a haya e equiponan cu ta rekeri pa por duna terapia di EMDR correcto”.

E tratamento aki lo mehora calidad di bida di hopi hende. E sistema EMDR, a wordo usa cu gran exito pa e tratamento di traumanan ocasiona pa secuela di veteranonan di guera cu ta bolbe di Irak y Afganistan entre otro regionnan den conflicto, manera e victimanan di terorismo, manera di e atakenan di 9-11 na New York y victima di temblor manera esun na Turkia y esun mas reciente, Haiti na principio di 2010. (EMDR Journal).