Den bida tin hopi situacion cu por duna nos stress. Problema den famia, morto di un ser keri, divorcio, retiro di trabou, soledad, placa… Si abo tin stress corda pa tuma bo keho na serio. Pero mas importante tuma accion pa elimina e causanan…
Con? Planea tempo liber. Esaki ta ‘tempo pa bo mes… ABO’. Hasi cosnan cu abo ta haja leuk y cu ta relaha bo. Bay cana den mondi, bay lama, busca silencio… bay sinta na Alto Vista… loke ta pone bo sinti bon…
Stop di pensa cu abo ta responsabel pa felicidad di tur otro hende.
Stop di pensa cu tur cos lo fracasa si abo no hasi nada. Cu otro palabra, stop di carga mundo riba bo schouder…
Come saludabel, come mas berdura y fruta. Esaki ta juda hasi bo sistema limpi. Di e forma aki bo curpa y mente lo funciona miho. Si bo ta bebe hopi koffie, alcohol, pildo di drumi of ta huma. Realisa cu esakinan ta juda bo temporario. A lo largo, nan lo duna bo mas stress so. Stop cu nan, si no por den un solo biaha, stop poco poco.
Scrap actividadnan si bo tin di mas. Kico bo ta hasi cu ta pone bo den stress? Bo por sin e actividadnan aki? Realisa cu mundo ta sigi draai gewoon si abo stop pasobra bo ta demasiado druk…Podise te hasta tur hende ta mas contento cu un persona cu ta mas contento na trabou y na cas… bo lo bira mas productivo…
Papia cu hendenan cu por juda bo… sigur NO papia cu hende cu lo duna bo mas stress… Sinja pa bisa ‘no’… si bo tin problema pa bisa no… puntra pa tempo pa bo pensa, prome bo dicidi. Esaki ta duna bo tempo pa evalua miho pa bo mes, kico bo kier hasi…
Traha un planning… esaki ta juda bo pa tin un bista riba bo dia…awo ta mas facil pa dicidi ki bo por scrap… Concentra riba bo forsa!
Pensa riba bo exitonan. Pensa riba e momentonan den bo bida, unda bo a confronta situacionnan hopi mas dificil y a surpasa esakinan. Pensa cu bo por atrobe. Sea orgujoso di bo mes!!!
Relaha. Bay un les di yoga of tai chi. Of djis sinta y hala rosea profundamente pa un par minuut. Esaki ta crea espacio den bo mente y curpa.
Reconoce cu bo tin stress. Cada hende ta reaciona diferente riba stress. E por expresa su mes den dolor di cabes, of perde peso of come di mas… paga tino na e senjalnan cu bo curpa ta duna.
Y si bo a purba tur cos y no a logra? E ora bay bo dokter of busca judansa professional. Sa cu abo ta e persona mas importante den bo bida… si bo no ta felis cu bo mes, dificilmente bo por juda otro…
Duna bo mes balor… bo ta bal!!!