Comprondiendo Bida

Mi a lanta marduga bou di canto di Chuchubi y Trupialnan colorido. Solo mes ainda no a spierta completamente pero mirando e prome rayonan ya caba mi sa cu e dia lo ta hopi bunita. Riba e 18 di maart aki mi ta sinti cu henter Aruba kier canta su Himno … “Oh Aruba, dushi tera …”. Pero awe mi kier celebra na grandi e dia aki na mi mesun manera, bibe un rato den pasado y pa recorda mi mes bon ken mi ta. Mi ta bula den mi Chalapi e mainta ki y bay mi ta bay …

Rumbo pa West Punt caminda mi ta pasa dilanti mi Tanta su cas pa pasa pite cuminde, bise bon dia. Mi no por para y combersa paso ta Faro mi kier yega pa caba. Despues di un rato coriendo rumbo pa Faro mi ta bin topa cu Boca Catalina caminda mi primo a sinja bula for di baranca y sambuya. Poco mas a leu coriendo mi ta bin topa cu Arashi caminda mi famia ta campa tur aña y unda mi a sinja hunga domino y suta mi prome piedra sin lubida haya tambe mi prome sapato. Pero ta e punto mas ariba mi kier yega y no falta mucho mas. Unabes riba Faro para mi ta mira na mi alrededor y tur loke cu mi ta constata ta una beyeza. Mi bista ta mira laman bruto panord, Hooiberg den zuid, Hotelnan cu nan estatura espectacular cu palo di coco y palmitanan dorna. Un bista chiki mas y mi tin cu seca un lagrima.
Solo ya caba ta casi na halto pa brasa Aruba cu su rayonan y ya mi por casi tende bida cuminsa canta riba nos pida baranca y ami atrobe ta cabes abou en busca di mi sigiente aventura.

Derechito bek pa zuid mi ta pasa riba caminda di Malmok y mi ta pasa mira Antillas y mi ta recorda segunda guera mundial y con nos a wordo scapa. Poco mas na zuid mi ta pasa banda di waf di Hadicurari caminda piscadonan ta mara nan boto y e pier caminda mi a tira mi prome liña na awa. Mi nunca no a gara nada pero semper a wordo genek door di ladronchinan ferfelo. Esta un dushi tempo esey tabata.

Sigiendo mi ruta riba mi Pais Natal y mi bario stima, ta Alto Vista mi tin cu pasa y laga un oracion chikito atras. E Kapel chikito eynan ta trece hopi recuerdo, specialmente riba diamars, e dia cu mi Mama tabata hibami eynan pa nos por resa na Dios. E olanan cu ta lora y kibra riba e barancanan cercano, ta produci un ritmo asina Sereno cu bo ta pensa ta den cielo mes bo ta. Tur esaki tabata posibel riba un simpel pida sero chikito rondona den naturalesa. Y na caminda pa Alto Vista mi ta pasa banda di Juju su cas, e homber stranjo cu nos mayornan semper a spanta nos cune y pa confronta nos miedo, tabata bay tira piedra riba dak di su cas pa un dia wak su cara mahos. Mucha ta keda mucha berdad, semper inocente y fragil, pero cu un bon educacion un dia cielo nan lo alcansa. Pero mi ta sigi …

Crusando cada caminda cu mi concoce den mi planti man y pa prome cu merdia bati, ta na cas di famia mi kier ta. Mi ta pasa hole loke tin den weya den cushina cu ta temperando desde mainta trempan cual ta costabo un klap riba bo man si bo mishi sin cu nan sa. Pero ya, un cuminda crioyo no ta cos di bisa no riba 18 di maart. Sea ta Jambo, Boonchi, Banana of Kabrito stoba, tur di nan ta cos di saboria. Despues di aki bariga yen of no toch cerca mi Mama mi ta pasa pa mi Pisca hasa y pan bati. Mi mester di mi forsa riba e dia aki ya cu e ta largo y sobre todo pa loke cu un djis ta bin. Y sigur cu si e ta bin …

Despues di a recore mi bario y a mira gran parti di Noord, specialmente Misa Santa Anna y mi scol basico Aloysius, mi ta marca mi mes prepara pa core tras di e porco di Osberio pa purba gare aya na veld di Nacional. E dia a cuminsa trempan caba eynan tambe y e bista ta espectacular. Muchanan ta core, hunga y competi. Si no ta di alegria, ta un wega nan ta hungando of nan a caba di gana e premio di flie mas bunita, mas leu of esun cu a para cu mas kacho. Premio tin pa tur esnan cu ta bin competi. E ta simplemente un dia felis. Y pa caba cu e dia, gruponan di diferente bario di Noord ta bin competi pa subi e bendita palo di Seba. Y segun historia ta conta, aya na veld di Nacional, tur hende sa cu Bad Boys Club semper a gana. Competencia nunca no tabata tin pa e muchanan di Palm Beach. Un club di hobennan cu tabata Hip den nan tempo cu nan casita di palo aya Montserat den un mata na halto. Mi mes nunca no a hunga parti den nan, pero si mi a wordo ofreci mi prome shot di Palmera, nan bebida preferi.

Aruba celebrando 18 di maart, tanto cos pa recorda y tanto cos pa hasi. Mi a marca e dia y conte elaboradamente sin duna danki na ken. Y ken, ta Rufo Wever y Padu Lampe pa nos Himo bunita cu rima y composicion precioso . Y si algo ta sigur di nos Himno, ta cu nos ta e Baranca cu no tin nada pa kibre. Cu orguyo mi ta zwaai mi bandera y mira Aruba den mi. Nos tur tin nos mesun storia y di e bario cu nos lanta aden. Mira bo mes, recorda y recita …

18 di maart atrobe ta e dia cu mi kier admira mi Aruba y su hendenan cu e a cria. Un ciclo di bida y recuerdo cu no mester bay perdi. Ban engrandece awe una bes mas nos Himno y Bandera na un manera mereci!

Autor: A. Figaroa ©