Si cambia leynan cu ta pone tanto e mama como e tata responsabel pa e yiunan, hombernan lo pensa miho prome cu traha yiu?
Awe ta ‘Dia Internacional di Famia’. Mi ta pidi bo pa tuma un rato pa wak un video cu ta mustra nos hopi cla pakico ta importante pa nos no bira cara pa e realidad scondi den mas famia cu nos ta kere.
‘E berdad scondi’ ta un testimonio di pobresa na Corsow. Situacionnan cu ta conta pa mas isla y pais, tambe pa Aruba. E cosnan di bida cu no tur hende kier wak. E circulo vicioso di pobresa. E abuso sexual den famia. E buskeda pa amor di un muhe jong cu a pasa den tur e situacionnan aki. Y toch e ta hasi e esfuerso pa papia cu su yiunan pa nan tin un miho bida. Pero e no por su so.
E mama di 3 yiu y 27 anja ta bisa: ‘Mi no kier pa mi yiunan pasa den mesun cos cu ami a pasa aden.’ Y toch den tantisimo caso bo ta mira cu den e buskeda pa amor, felicidad y proteccion, muchanan jong ta atrae net e hende den su bida cu ta lag’e pasa den loke e no tabata kier. Manera e senjora cu ta guia mamanan den situacion di pobresa ta bisa; ‘E ta bay hopi mas profundo, cu bo lo pensa na prome instancia.’ E berdad ta cu e tin hopi di hasi cu cicatrisnan di bida. Y sin guia adecuado y comprenshon di otro, e persona ta keda pega. Pasobra niun hende a sinj’e balora su mes. Tampoco pa e explora di ki forma e por sali di pobresa dor di usa un posibel talento cu e por tin.
Tin ora mi ta puntra mi mes si e hendenan cu tin cu yuda e mamanan aki tin mas facilidadnan pa traha cun’e, e lo por yuda mas? Si cambia leynan cu ta pone tanto e mama como e tata responsabel pa e yiunan, hombernan lo pensa miho prome cu traha yiu? Si pueblo henter cuminsa wak hende den necesidad cu wowonan di compashon, y yuda pa nan haja mas balor propio, nos lo crea un miho comunidad?
Cosnan pa pensa, pa ami y abo…
Stima bo famia y stima tur famia…
Aruba 2016, majan April 27, 2 or di merdia lo tin un manifestacion contra abuso sexual. Di parti di Comprondiendo Bida ta invita tur hende pa bay. Comprondiendo Bida ta apoya e manifestacion. Tambe ta apoya tur mama- y e tatanan cu a tuma e curashi pa sali afo cu nan storia. Comprondiendo Bida ta invita tambe tur hende pa subi e website www.comprondiendobida.com y type e palabra ‘abuso sexual’ den e hokki di search. Bo lo haja un cantidad di articulo riba abuso sexual cu Comprondiendo Bida a publica den su anjanan cu e ta online. Bo lo haja articulonan cu lo pone bo compronde pakico ta importante pa hasi cada intento cu bo por, pa stop abuso sexual. Bo lo compronde pakico e argumento cu mester busca prueba prome cu aresta un pedofiel NUNCA por ta valido. Un pedofiel ta un persona cu un mente cu semper lo busca excuus pa hustifica su acto. Esaki ta nifica cu e nunca lo stop. Esaki ta nifica cu mientras ta buscando pruebanan cu dificilmente lo haja, e pedofiel tin caminda liber pa sigi abusa.
A bira tempo pa nos stop di sconde e cosnan scur cu ta sosode den nos comunidad. Adultonan t’ey pa protega e muchanan. Pa percura pa nan por lanta den un comunidad felis. No pa abusa di nan.
Si nos no ta defende e derecho di nos muchanan, ta ken su derecho nos ta defende anto?
Y di paden tin un stem cu ta bisa mi ‘Lo miho ainda tin cu bini.’ Y di esey mi tin sigur.
ingrid 60
Un bon amigo a jega di bisa mi cu nos ta biba bida cu bista den futuro y nos ta compronde bida mirando atras. Pa mi, esaki ta sinti manera hopi berdad.
Sesenta anja tabata parse mi hopi bieuw tempo mi tabatin 20-30 anja. Awor cu mi a jeg’e, mi ta sinti mi sigur di mi mes y e escogencianan cu mi a hasi. Escogencianan a base di e libertad cu mi ta sinti. Libertad di wak atras riba mi bida y bisa mi mes ‘den cada situacion mi a hasi lo miho cu mi tabata por, bou di e circumstancianan cu mi tabata aden.’
E dushi di 60 ta cu mi por afford pa no tin pura, mi no tin mester di ansha mas. Mi a pone mi marcanan di pia y e pianan lo sigi cana nan propio caminda. Ki luho, porfin mi por permiti mi mes e luho pa ‘Tuma Tempo.’
Como hende, hopi biaha nos ta puntra nos mes, si nos a hasi e miho. Ami ta kere cu si. Nos por hasi solamente nos best. Pasobra nos no por scoge pa otronan, ni cuanto nos ta stima nan. A lo largo di bida mi a sinja pa laga hopi di mi sonjonan cay, mescos cu mi idealnan, pasobra hopi cos no ta den mi man. Mi mester a sinja laga bay y wak cosnan bay robes, mientras cu mi sa cu por a bay otro.
Mi a gradici pa mi logronan, ora mi a sinti cu mi por a hasi un diferencia den mi mesun bida, pero tambe di otronan. Dunando hopi di mi mes pa logra un pais, un mundo miho y metanan grandi, mi a sinja mas y mas cu e felicidad mas grandi tin ora ta den cosnan asina chikito manera un hende cu ta duna mi un brasa, pasobra e palabranan cu mi a bisa of scirbi a jud’e den su bida.
Of un mucha chikito cu ta corda e cosnan creativo cu nos a traha hunto, te hasta ora nan a bira mucha grandi caba.
Tambe mi a mira hopi oportunidadnan pasa bay, pa mi mes y pa otronan, talentonan cu nunca a florece. Bida ta escogencia. Mi a mira alegria y inhusticia, gratitud y envidia, inspiracion y weganan di poder.
Mi a admira e bunitesa di creacion y e danjo di mannan humano. Y mirando bek, mi a haja semper loke mi a pidi, conciente of inconcientemente. Maske no semper mi a realisa esey na e momento cu mi tabata ‘eynan’.
Mi ta corda cu desde un edad hopi jong mi a pone dos meta den mi bida. E prome ta cu mi kier laga atras un mundo miho cu mi a haja, pasobra mi kier pa mi yiu- y nietonan tambe tin un habitat pa nan biba. Di dos ta cu dia mi jega na fin di e caminata humano, mi por bisa mi mes cu tabata bale la pena pa biba.
Mi no sa si mi a logra e prome meta. Mi no ta hopi contento di e mundo cu nos ta bibando aden actualmente. Mucho guera, mucho violencia, mucho descordia, pero mi tin speransa riba un majan cu lo surgi un dia cu ta miho cu su ayera. Mi por bisa solamente cu mi a hasi mi best y mescos cu ami, mi a topa hopi otro hende cu ta hasiendo mescos y cu ta un inspiracion pa mi.
Asina mi ta jega na e di dos meta. Y mi conclushon ta ainda cu mi a biba un bida cu ta bale la pena. Pa mi mes, sin cu mi mester di e balorisacion di otro hende. Nos cada un tin nos balornan interno y esaki ta diferente pa cada un. Den mi opinion nos lo tin pas dia nos acepta esaki como berdad universal.
Mi ta agradecido na e projecto cu mas a marca mi bida ‘Comprondiendo Bida’ cu a start manera un experimento y a bira mi companjero fiel pa casi mita di e anjanan mi tras. A lo largo di tempo ‘Comprondiendo Bida’ a bira mi caminata y buskeda di contestanan di bida cu mi a comparti cu un publico mas grandi. Un proceso cu nunca ta caba. Cada stap lo hiba na e proximo y podise ta asina bida ta intenciona di ta. Un proceso, sin expectativa, ni lucro, ni luho. Un proceso cu ta hiba cada un di nos na nos mes. E esencia di ken nos ta…
Mi lo sigi hasi mi best, pero mas cu tur cos, sigi gosa cada minuut di mi caminata riba e planeta aki. Y di paden tin un stem cu ta bisa mi ‘Lo miho ainda tin cu bini.’ Y di esey mi tin sigur. Mi ta agradecido na Bida pa cada experencia, su dushi y su zuur. Nan a sinja mi pa aprecia y balora e persona principal den e storia di mi bida, esta ‘mi mes’.
Mi a sinja cu mundo ta sigi lora toch. Cu mi of sin mi.
Porfin mi a compronde e berdad grandi cu como hende, nos ta asina insignificante compara cu e Universo cu no tin fin.
Dushi! Mi tin mas tempo awo, pa mi mes, esta un luho asina balioso.
Esta dushi bida ta!
Felis dia di tata na tur cu di un of otro forma ta cumpli cu e rol di tata
Tata y yiu
E Tata ideal, un bon ehempel, un inspiracion, un fuente di confiansa, un brasa, un schouder pa bo yiu jora su pena, un hari pa bo comparti, un conseho cu su yiu por scucha, un fuente di confiansa.
Tempo cu tata y yiu por comparti tin ora ta haja nan balor atraves di tempo cu mas experencia y sabiduria.
E tata ideal ta haja bida cada biaha cu un yiu nace. Cu e bida nobo ta nace y crese sonjonan nobo, speransa nobo. Pero tambe retonan nobo.
E retonan, juist. Nan ta esunnan cu cada bes por pone un capa scur mei mei di e tata y su sonjonan. Situacionnan cu ta aparece y cu como hende bo no ta tene cuenta cu n’e. Tin hende cu ta enfrenta nan y busca un otro caminda pa jega na e mesun resultado desea. Tin otro hende cu ta busca alivio pa nan retonan den cosnan cu ta aleha nan juist di e yiu cu tanto nan a stima. Un amor cu ta bay bek te e momento cu nan a topa otro pa prome biaha. Esaki ta ora e yiu a dal su prome grito di bida.
Bida no semper ta cumpli cu nos sonjo y speransanan. Pero ta e persona su escogencia pa mantene su mes na su ideal, promesa y compromisonan. Retonan no t’ey pa hasi bida imposibel. Nan t’ey juist pa nos desaroya nos talentonan y no laga un di e responsabilidadnan mas grandi den bida cay.
Awe ta dia di tata. Tum’e como un dia pa haja bunita regalo y cosnan tierno traha na scol. Tum’e tambe como un dia pa reflecciona riba kico ‘ser tata’ pa bo ta ensera.
Pasenshi, amor, compashon, empatia, pordona, compronde, madures, tempo comparti. Podise esey ta e esencia di e tata ideal?
Felis dia di tata na tur cu di un of otro forma ta cumpli cu e rol di tata.
Cu hopi danki na e 3 damanan aki pa a comparti nan alma, curason, speransa, fe y balentia cu nos. Dios bendiciona boso semper!
Hunto semper nos ta mas fuerte.
Cu hopi danki na e 3 damanan aki pa a comparti nan alma, curason, speransa, fe y balentia cu nos. Nan tabata nos modelonan precioso pa e poster di Viva La Donna Day 2009… Carina, Ingrid y Gina… Dios bendiciona boso semper!
…Mira bida di un otro forma…disfruta conciente di cada dia…di mi famia…di naturalesa…mi a siña pa biba ‘awe’… cada dia ta un dia…tin dia duro…pero esaki ta conta pa tur hende, cu of sin cancer …stima mi mes…stop di pone otro hende semper na prome luga…duna e cancer un luga den mi bida y sigi biba, mescos cu tur otro hende… Bisa mi mes cu Dios a cura mi caba y ‘Go for life’…pa gosa di bida…siña corda riba mi mes tambe… Si mi por a cambia algo, mi lo a biba cu menos stress, menos core core… enjoy life…hari hopi…busca hende positivo rond di mi…prome mi a pensa ‘morto’, awo mi sa cu despues di cancer ‘tin bida’…
Tin hendenan sabi cu ta bisa cu e buskeda di hende ta semper ‘conoce felicidad’.
Stima sin miedo pa perde!
Un grupo di amiga tabata papia riba e tema. ‘Esta dushi ta cu bo por stima, maske con duro bo bida por tabata! Bo ta realisa cu ‘ami no ta loke bida a hasi cu mi, pero loke mi ta scoge pa hasi di mi bida’. Hopi biaha nos ta ta tende tur sorto di expreshon:
Homber no ta di confia awendia mas
Relacion den e temponan aki no ta traha
Nos mundo a bira mucho liber, tur cos por
Di otro banda, ora nos papia cu un hende intimamente y honestamente, nos ta realisa cu hopi di e expreshonnan aki ta basa riba miedo. Miedo pa perde, miedo pa dolor, miedo pa perde cara. Y un otro hende cu si a tribi di entrega nan mes na amor y pashon den nan bida y ta wak bek cu sinceridad ta bisa cu nan no ta lamenta. Nan ta pensa cu ta bal mas di a conoce amor y despues sinti dolor cu pa un of otro miedo nunca a experencia kico ta nifica ‘stima cu henter bo alma y curason’. Perde bo mes den amor y pashon, entrega bo mes totalmente. Gosa di amor y intimidad sin miedo. Comparti bo alma y bo curpa.
Kico tin mas bunita cu conoce e sentimento di mas profundo cu biba ta ofrece nos. Tin hendenan sabi cu ta bisa cu e buskeda di hende ta semper ‘conoce felicidad’. Anto pakico tin miedo pa top’e? Pens’e! Hopi felicidad den e buskeda!
Si un partido ta keda den contacto cu su pueblo, no ta importa con chikito e por ta awe. E contacto aki por hasi’e grandi pa e proximo eleccion. Historia di Aruba mes a mustra nos cu partidonan cu awe ta chikito, den pasado tabata esunnan grandi. Y esunnan cu awe ta grandi a jega di ta esunnan chikito di pasado.
aruba dushi tera
Majan Aruba ta bay vota pa su representantenan den Parlamento, e organo mas halto di nos pais. E partido cu haja mas voto tin e prome mandato pa forma un gobierno. Si esaki no logra, loke por sosode den cada democracia, e partido ta entrega e mandato bek na Gobernador y lo sigi pa e proximo partido cu tin mas tanto voto.
Nos por a mira un energia y creatividad hopi grandi den e campanja cu majan lo ta tras di lomba. Eigenlijk cada partido merece pa gana y asina mustra nan afinidad cu e pais cu asina tanto nan ta stima.
Ki ora cada partido ta gana? Ora nan no laga e temporada di campanja ta nan focus y periodo di comunicacion cu pueblo. Un partido ta grandi den su esencia ora e ta tene bienestar general di pueblo den cada decishon y prioridad cu e tuma. E rais y curason di un pais ta su hendenan. Si e pueblo ta progresa den su derechonan fundamental, e pais tambe ta progresa. Si e pueblo ta crece den su balor propio y amor pa su pais a base di e maneho di e gobierno y parlamento, esaki ta combini tur hende. E ta combini tambe tur partido.
Si un partido ta keda den contacto cu su pueblo, no ta importa con chikito e por ta awe. E contacto aki por hasi’e grandi pa e proximo eleccion. Historia di Aruba mes a mustra nos cu partidonan cu awe ta chikito, den pasado tabata esunnan grandi. Y esunnan cu awe ta grandi a jega di ta esunnan chikito di pasado.
Tin un dicho cu ta bisa ‘Conoce bo pasado, pa bo por scoge bo futuro’.
Bo voto ta un derecho, pero tambe un deber sagrado… e escogencia mester ta pa bienestar di Aruba, nos dushi pida baranca, nos Aruba Dushi Tera…
Natalie no tabata ‘djis’ un adicto mas, pero un ehempel cu semper tin un caminda pa un bida miho. Natalie, un bida cu a inspira…
Natalie, di adicto pa modelo di speransa…
Natalie, un bida cu a inspira…Mi a conoce Natalie hopi anja pasa, den anjanan 90. Caminda mi a conoce Natalie ta mescos cu hopi hende, como adicto riba caja, pidiendo placa pa cuminda. Buscando trabou di parti flyer pa e por haja poco placa. Natalie tabatin algo special, e tabata comparti su storia di bida. Natalie semper a bisami cu e kier a cambia su bida, pa por tin su yiu cerca dje, pero cu esaki ta asina dificil una bes cu bo drenta den e bida di droga. Natalie tabata conta di su dolor di bida, cu e sa cu e ta hasi su famia dolor, pero tambe di su amor pa hende. E ta conta semper aserca cu e no ta un mal hende, cu e ta stima hende. Mescos cu hopi hende tin ora mi ta dun’e placa of trabou pa parti flyer.
Natalie tabata e personahe riba e potret cu a gana e competenciadi potret ‘Nos hendenan’ na ocashon di 30 anja di Checkpoint Color. E scolnan a haja camara pa laga nan alumnonan saca un potret di nan gusto cu ta refleha amor of algo impresionante. Devah Leenheer tabata e mucha muhe di 12 anja den 6e klas cu a capta un momento den bida di Natalie cu di berdad, berdad a bisa mas cu un miyon palabra. Tabata un potret di Natalie para dilanti di un palo di lus ta come un ijscream. Patras di Natalie tabata mira e edificio di Royal Plaza. E potret a gana pasobra e tabata refleha un contrast asina grandi entre e desaroyo cu Aruba tabata pasando aden y un hende cu no por a haja su lugar den e rapides di desaroyo. Den wowonan di Natalie por a mira e bashi y tristesa di un ser humano cu no a haja su caminda den un mundo sano.
Hopi anja a pasa y mi a topa Natalie atrobe na un anochi di fiesta di Viva La Donna Day, un evento pa trese alegria y beyesa den bida di hendenan cu cancer. Mi a topa un Natalie cu a rehabilita y nos a hiba un bunita combersacion. Natalie a conta Edjean Semeleer y ami tocante su cancer, tocante su bida cu a cambia danki na Adopt an Addict Foundation. E ora a bira cla pa mi dicon semper mi a para y scucha Natalie. Natalie no tabata ‘djis’ un adicto mas, pero un ehempel cu semper tin un caminda pa un bida miho.
Natalie a duna contenido na su palabranan di kier un bida miho y Dios a pone e hendenan corecto riba su caminda pa jud’e. Natalie a cumpli cu loke por ta un mision grandi den bida, pa inspira otronan pa no tuma e caminda di droga. Natalie a modela na e Pink Runway, e iniciativa di Merveline Geerman cu a bira un evento nacional dor di e sosten di Mary Jo Foundation. Den comiensa di siman cancer a gana e bataja cu Natalie tabata bringando cu sosten di asina tanto hende cu ta admir’e y stim’e. E potret aki riba ta refleha pa mi un titulo cu mi a scirbi pa un otro articulo ‘Mi ta muhe, mi tin cancer y mi ta bunita…‘ Cu Natalie drumi dushi den brasa di nos Creador, cu pas y alegria companja su alma den e mundo spiritual.
Laga nos topa otro den situacionnan agradable, jena cu pas y bunita recuerdo.
Let’s not meet by accident!
Poniendo mi sentimento y experencia riba papel y public’e, mi a haja hopi reaccion di hende cu a pasa den mesun experencia amargo. Pero mirando cu Aruba ta un pais unda tur hende conoce otro, no ta tur hende ta durf di sali pafo cu nan experencia.
No ta eerlijk cu hende mester pasa den dolor y no tin respet ni espacio pa ventil’e…
Un hoben a scirbi mi ‘Pa media na Aruba cambia, esun cu ta usa e media mester cambia. Tanten cu hende ta apoja sensacionalismo, nos lo haja mas hende cu otro nomber cu ta pasa den mesun cos…of mas pio.
Laga nos topa otro den situacionnan agradable, jena cu pas y bunita recuerdo.
Let’s not meet by accident!
Bida ta balioso! Y cada ser humano tin un balor inmenso!
Meta di e articulo aki no ta pa jusga ken ta fout of no, pasobra esey no ta mi tarea. Si ta importante pa nos mustra riba circumstancianan basta doloroso cu a hiba na e echo cu un persona a perde su bida y ami a pasa den un experencia cu nunca mi lo a desea di pasa aden. Esaki tambe ta asina doloroso cu no tin palabra pa splic’e.
Ta hopi tragico, tristo y horible cu un persona ta perde su bida den un accidente. No tin palabra pa expresa e dolor aki. Ta mesun tragico ora un persona ta involvi den e accidente y no por a hasi nada pa evit’e, anto prensa no ta mustra e banda aki di e medaja. Mi persona, Ingrid Werleman tabata e persona cu tabata den e auto y kier a duna e otro parti di e medaja. E meta no ta pa jusga ken ta fout of no, pasobra esey no ta mi tarea. Si ta importante pa nos mustra riba circumstancianan basta doloroso cu a hiba na e echo cu un persona a perde su bida y ami a pasa den un experencia cu nunca mi lo a desea di pasa aden. Esaki tambe ta asina doloroso cu no tin palabra pa splic’e. Bida ta e cos di mas balioso cu nos ta pose’e y pesey semper mi a hasi esfuerso pa cuida mi bida, pa ta cauteloso den tur circumstancia y pa inspira otro hende pa hasi mescos. Riba e diadomingo cu a pasa mi tabata bin di Ritz, cumpra ijscream, bayendo pa cas di un amiga. Mi a para na e crusada di Hubadastraat, a mira tur dos banda, no tabata bin nada y mi a subi caminda. Direpente mi a sinti e impacto cu algo a dal contra e auto y mi a bira e auto para di biaha pa wak kico a pasa. Mi a mira un hende drumi riba e caya y mi a mira e brommer tira otro banda. Tabatin jen di hende rond. Un pareha banda di mi a bisa mi cu e meneer tabata core sin lus riba e motocicleta. Henter e escena tabata parse un situacion no-real, pasobra mi tabata sigur cu no tabata bin nada. Mi a pidi un meneer banda di mi pa jama polis, loke e la hasi. Mi a puntra kico a pasa cu e meneer y ela bisa mi pa trankilisa mi. Mil cos tabata pasa den mi cabes. Con? Dicon? Dios, cuida e meneer. No laga nada malo pas’e. Polis a jega y a puntra ken ta e chauffeur y mi a contesta ‘ami’ y cu mi ta sigur cu no tabatin nada riba caminda. Mi tabata sinti mi mes hopi tristo y tabata puntra mi mes pakico e cos aki a pasa net cu mi cu semper ta cauteloso den trafico. Pakico, mi Dios? Un polis a bisa mi pa mi bay warda di polis cu nan pa duna un declaracion. Mi a pidi’e pa tuma declaracion di e pareha para banda di mi cu a mira e brommer ta bin sin lus sendi. Nan tin 2 declaracion caba, e la contesta mi y a hiba mi den e auto di polis. Mi a puntra kico a pasa cu e meneer, e la contesta mi cu nan no sa ainda. Mi no por splica e sentimento paden cu palabra, pero e tabata horrible y asina inhusto. Pakico, mi Dios? Ki mi tin di sinja di esaki? Pakico un hende ta core brommer sin lus den anochi y ta bin dal den e auto? Na warda polisnan ta bisa mi pa sinta warda te ora un hende di trafico bin pa tuma mi declaracion. Mas laat ta bin un hende pa hasi e blaastest cu mi. No ta problema, e tin cu hasi su trabou. Resultado ta O.
Mi amiga ta jega y mas laat mi famianan. E pareha cu tabata para banda di mi na e sitio di e accident ta bin pa duna nan declaracion. Nan tin yiu chikito na cas y ta priminti di bin pa su majan, loke nan a hasi tambe. Mi sobrino ta conta mi cu e meneer a fajese y ta mustra mi e potretnan riba 24ora.com. E sentimento ta horible. Pakico, mi Dios? Mi ta mira e potretnan di e meneer drumi abou cu sanger riba su cara. Mi ta mira e potret di mi cu nan a saca y mi ta scucha loke nan a scirbi cu mi no a duna preferencia. Mi ta puntra mi mes dicon nan no a acerca mi pa puntra mi kico a pasa ora nan a saca mi potret. Lo nan por a tende cu e meneer tabata biniendo sin lus y cu ami no por a wak’e. E tabata bin riba e caminda di preferencia, ta berdad, pero con bo por duna preferencia na algo cu bo no por wak den anochi scur?
Mi pena ta pa e meneer cu a perde su bida y su sernan keri cu ta pasando den momentonan hopi hopi dificil. Mi pena ta tambe pa e experencia cu mi a pasa aden cu ta hopi, hopi doloroso. Mi pena ta tambe pa e manera cu cierto prensa ta raporta sin aplica e principio di ‘hoor en wederhoor’ cu ta e base di periodismo profesional. Mi pena ta cu e forma con medionan di comunicacion ta pone potretnan di un ser humano cu a fajese cu ta mustra poco respet pa e defunto, su famia y otro sernan keri. Mi pena ta pa e forma cu nan por incrimina hende posiblemente pa motibonan sensacionalista. Mi pena ta cu un momento fatal a crea dos victima. Un cu a fajese y un cu a keda na bida. Y cu nos dos, tur hende hende cu ta cerca di nos.
Mi pena ta tambe cu mi isla Aruba, Aruba dushi tera cu cada dia ta bira menos safe den hopi sentido. Y atrobe mi ta pensa cu si nos cada un den nos bida personal, den nos bida familiar, den nos bida social tuma e decishon pa biba mas segun norma y balornan di respet, fraternidad y compashon, nos isla, Aruba dushi tera lo bira esaki di berdad. E lo bira e realidad colectivo di hendenan cu ta preocupa pa otro y ta wanta man di otro den momentonan dificil y no ta crucifica otro. Cristo a muri caba pa nos na crus. Awor ban sigi su ehempel di amor. Cu Antonio Jose Barrero su alma sosega na pas den reino di Dios. Cu su famia lo tin hopi forsa den e momentonan dificil aki.
Mi curason lo sigi bati pa Aruba, e pais unda mi a nace y cu mi ta stima cu cada fibra di mi ser. Mi lo sigi hasi loke semper mi a hasi. Inspira hende pa jega na un bida mas felis, un comunidad mas felis y asina laga atras un mundo miho cu ami a haja. Situacionnan dificil den bida no ta bin por nada, mi ta convenci di esaki. Nan ta retonan pa esun cu kier sinja di nan. Y despues cu nos jora nos dolor, e lo hasi nos mas fuerte. Podise e les cu cada hende cu ta biba na Aruba y ta stima e pida baranca aki por sinja di e situacion aki ta pa nos biba cu mas conciencia cu Aruba por ta un isla felis na momento cu cada ciudadano ta un ciudadano felis. Esaki ta ensera biba segun nos birtud- y cualidadnan Divino cu ta hinca den cada un di nos, wardando pa ser desperta.
