'Compronde bo bida y biba mas felis.'
sonjonan kibra y bida di nobo… maske con paradoxal… simbolo di speransa…
E mucha maltrata, e mucha malogra di ayera…
Awe, ta brota di alegria…
Pasobra e la demostra cu maske con duro bida por ta…
E’la vence…
Nos tur por vence obstaculonan…
Vence tristesa, un alma destrosa y ninjes maltrata…
Pensa cu ayera a pasa caba y bo no por hasi’e di nobo…
Ni maske con cu bo kier…
Pues miho bo reconoce, pa despues…
Bo drei tir’e dolor afo…lubid’e, lag’e Los…
Lus di bida mes…lo transform’e!
Den bida di nobo!
Ingrid Werleman, 2003
Laga bo accionnan y pensamentonan ta e regalo di mas grandi cu bo ta duna na bo mes y bida mes… e resumen di e workshop ‘Birando E Cambio’…
Edjean Semeleer a habri e anochi cu e cantica ‘Recuerdo’ di Ramon Krozendijk cu a laga tur hende keto keto…pa Edjean y hendenan presente ‘Recuerdo’ ta simbolisa E Aruba cu nos tur ta stima y cu ta cambiando cada dia mas…pesey Edjean ta bisa: “Den cada rol di nos bida, ta bon pa nos ta conciente di e ehempel cu nos por ta cu e cosnan cu nos ta hasi, bisa y pensa”. Danki Edjean, abo riba bo mes ta un inspiracion di e Arubiano di noble curason. E ta radia, no solamente di bo canto, pero di henter bo ser.
Belquis Moreu a comparti 4 palabra cu por juda un hende transforma su bida. Nan ta ‘danki’, ‘mi stima bo’, ‘despensa mi’ y ‘pordona mi’. E publico a bisa e palabranan mientras nan ta hasi tapping.
Continue reading “Birando E Cambio tabata un workshop diferente…”
Mi ta draai, draai, draai y mi ta cerando circulonan den mi bida… mi ta lus y mi ta sombra…explorando Bida…
❝Draai, draai, draai rond…y bo lo draai un rondji… y bo lo ta nobo… di nobo…akinan.❞ —Gil Scott-Heron
Hopi biaha nos ta busca eyfo…tanten eyfo…tin solamente mas, cu ta e refleho di nos mes… nos ta draai, nos ta draai y nos ta hunga wega di mundo… pasobra bolter nos wowo, mira paden ta asina mas complica y jena cu confrontacion….
Ta asina mas facil pa busca semper un motibo… pakico ‘ainda no’… warda un rato… nan no ta cla, pero ami si? Ami ta cla pa mi mes? Ken ta cla pa ken?…
Mi ta parti di un universo y mundo maravijoso… mi ta jiu di strea y di shelo… naci for di puro baranca y lama Arubiano… perla den mar Caribe…
Y mi ta lus y mi ta sombra…
Continue reading “Lus y Sombra”
Mi ta invita bo pa experencia un rato pa ‘bo mes’, cu a lo largo lo bira un rato pa tur loke ta rondona bo, hunto cu Belquis Moreu, Giovanna Fijn, dr. Carlos Viana y… Edjean… awe, diahuebs, 7.30 na Spirit of Aruba, Ierlandstraat 22, Eagle…
Edjean tabata e prome persona cu a anuncia cu e lo bin e workshop ‘Birando E Cambio’ di Comprondiendo Bida. Mi a invit’e pa canta di amor pasobra e ta un hende cu ta inspira sentimento di amor cerca hopi hende. E la priminti cu e lo bin. Mi a topa Edjean na e anochi festivo di Viva La Donna Day y mi pidi’e pa canta un cantica special, un cantica cu lo toca hende su curason. Esey e lo hasi awe nochi. Nos a papia hopi y mi tin cu bisa cu mi a sinja hopi di Edjean. E tin un curason noble y un vision hopi grandi pa su edad hoben. E por ta un ehempel bunita pa otro hoben, cu tin sonjo grandi. E la jena mi cu orguyo di mi pais. E tin bunita pensamento con nos cada un por tin un rol como ehempel di otro y con nos por juda otro pa logra nos metanan. Sin mester di kibra otro pa nos por luci y bay dilanti.
Esaki en berdad ta e pensamento nobo si nos kier un dia ‘Bira E Cambio’ cu nos kier mira. Bida no semper ta facil, cambia tampoco, pero e ta tuma un stap, hopi humildad, hopi pashon y perseverancia pa mira e cosnan cu ta importante di berdad. Edjean ta un cantante hopi stima pa hopi hende, e tin fama riba su dushi isla Aruba, pero e ta canta y baila pa bon causanan y ta brasa cada persona cu aserc’e.
E anochi ‘Birando E Cambio’ lo bira un anochi pa nos vooral ‘sinti’ hunto kico ta amor… pa tur loke ta biba.. kico ta nifica trankilidad den nos curason, den nos curpa, den nos celebro cu hopi biaha ta hopi cansa.
Mi ta invita bo pa experencia un rato pa ‘bo mes’, cu a lo largo lo bira un rato pa tur loke ta rondona bo, hunto cu Belquis Moreu, Giovanna Fijn, dr. Carlos Viana y… Edjean… awe, diahuebs, 7.30 na Spirit of Aruba, Ierlandstraat 22, Eagle… Ta pidi un contribucion chiquito di 20 florin, un pareha ta paga 30 florin… un inversion den bo calidad di bida y felicidad.
Tin biaha nos ta siguie, tin biaha nos ta ignor’e, tin ora nos ta contento cu ne y na otro momento, ora cu e “faya”, nos ta culp’e.
….Abo sa kico e ta? Rosabelle Illes ta conta bo riba www.comprondiendobida.com
Un contribucion di Rosabelle Illes
Abo a yega di caba e frase “Si mi tawata sa, lo mi a…”? Bo a yega di compañ’e cu e frase “Anto algo tawata bisa mi, pero…”? E ta mundialmente acepta cu tin aspectonan di bida cu ta fuera di nos control. Sinembargo, recientemente e nocion cu nos tin nos bida den nos man, nos ta responsabel y nos tin e libertad di escogencia y, den esey, e poder di determina kico nos bida lo ta, tambe ta wordo mas y mas acepta. Na cierto momento e sintesis ta revela su mes. E tesis: Tin aspectonan di bida cu ta fuera di nos control. E antitesis: Nos por eherce control pa medio di libertad di escogencia. Cua ta berdad? Of mihor poni, kico e tension lo crea? En realidad e contesta no ta importa. Simplemente pasobra nos sa caba.
Querido Hubentud, sera conoci cu Oportunidad – Al Figaroa … www.comprondiendobida.com
‘Pushi Cheshire, Alice a puntra. Bo kier bisa mi cua caminda mi mester bay di akinan? E caminda cu bo tin cu tuma ta depende principalmente di unda bo kier jega, e pushi a contest’e. Esey no ta importami nada, Alice a bis’e. E ora no ta importa cua caminda bo tuma, e pushi a bis’e.’ – Charles ‘Lewis Carroll Dodgson, Alice in Wonderland 1865
Querido Hubentud,
Lagami cuminsa na deseabo un bon aña y introduci mi mes como Oportunidad. Mi ta manifestando kinan pa cordabo ken bo ta y loke bo ta capas di ta. No ta keda na mi pa bisabo kiko pa hasi cu bo bida, como cu esey ta den bo mesun man. Mi meta ta pa habri bo wowo y bisabo, siña conoce bo mes bon, explora bo mente y engrandece. Mescos cu Fe ta cuminsa na un simiya di mustard, bo logronan lo cuminsa cu un simpel inspiracion. Reconoce bo talentonan, averigua kiko e ta y exploite, como cu nos tur tin uno scondi.
Bida ta un gran misterio y hopi pregunta lo pasa bay sin contesta. Alguno inutil, alguno di hopi importancia. Esey ta pone cu nada nunca lo ta imposibel, solamente si bo gaña bo mes y no para pe. Busca bo Spirito, esun cu ta papia cubo. Puntre kiko boso deseo ta y asina logre hunto. Semper bay pa e gol, e keeper nunca no ta eynan.
Sinceramente,
Oportunidad
Autor: A. Figaroa ©
Con abo kier drenta 2011? Algun tips balioso. Scirbi pa Ingrid Werleman… www.comprondiendobida.com
2011, un anja nobo, y un abo nobo… Den e ultimo articulo nos a papia riba con hopi pas bo tabatin cu Pasco. Awe nos ta bay mas profundo riba e tema aki. Pesey ban wak con nos kier drenta 2011 pa nos tin mas pas y felicidad.
2010 a cambia hopi di nos seguridadnan den bida. Crisis mundial, inseguridad, cambionan drastico den clima, tambe na Aruba. Cosnan grandi riba cua hopi biaha nos no tin hopi influencia… Pesey laga nos keda cerca di cas y cerca di nos mes…’Abo mes!’.
Awe e prome 2 tips…
1. Dispidi di e anja bieuw…laga loke no ta sirbi bo tras… Den un anja por pasa hopi cos. Bo por a logra bo metanan, topa e amor di bo bida, conoce hendenan fantastico… of podise no! Bo por tabatin desenganjo, bo por a perde placa, perde un ser stima of perde un amor! Kico cu bo a pasa aden… usa e bon y sinja di e fout y desenganjonan.
Continue reading “Con abo kier drenta 2011? Algun tips. Ingrid Werleman”
Celebra Pasco na un forma natural cu aroma terapia …Beauty with Style ta juda bo… on www.comprondiendobida.com
Pasco ta un periodo pa relaha dushi cu famia y amiganan na cas… e holo di e cuminda, pero tambe e holo den cas ta contribui na crea un dushi ambiente. Dianan di fiesta ta relajante, pa kita stress di trabou y preocupacion… Beauty with Style ta juda bo pa logra esaki cu su cursonan di aroma terapia. Un workshop nobo ta ‘Aroma pa Regalo’. Den e workshop aki ta sinja e cursista pa traha su mes regalonan a base di aroma terapia pa e temporada di Pasco y pa cualkier otro ocashon. Den e curso Aroma terapia basico ta sinja conoce 10 aroma y nan caracteristica. Dus, con pa usa nan y kico mester tene cuenta cun’e ora traha cu aroma terapia. Tambe bo ta sinja pa traha productonan di cuido personal pa usa na cas. Esaki ta juda pa hisa e calidad di bida di un famia na un forma natural. Beauty with Style ta un instituto specialisa den entrenamento di estecista y masajista. Nan ta traha den cooperacion cu K.O.C. di Hulanda cu ta supervisa tur nan estudionan.
Ta conoci cu mas y mas hendenan ta busca formanan natural pa biba, ya cu esaki ta mas saludabel y mas economico. Tambe ta corda tambe cu e seccion di training y wholesale di Beauty with Style a muda pa Italiestraat 24 A, net patras di Superfood.
Con mi ta bira felis, algun tip di psicologia positivo. Sinja e forsa di optimismo on www.comprondiendobida.com
‘No keda pega den bo dolornan,’ esaki parse di ta e mensaje pa biba mas felis. Esaki bo por logra cu psicologia positivo. E fundador di psicologia positivo ta Martin Seligman, un psicologo renombra di New York y tabata entre otro president di American Psychology Association. Den su opinion lo beneficia e cliente si focus riba e parti fuerte y e birtudnan di e persona y no solamente riba su malesa y debilidadnan. Su concepto a motiva hopi Universidad pa studia kico realmente ta juda hende pa sinti nan mes satisfecho, motiva y felis di berdad.
Esaki a involvi topiconan manera felicidad, optimismo, caracter y emocionnan positivo. Optimismo a resulta di por hunga un rol hopi importante contra depresion. Su meta cu e concepto aki ta pa integra practica y ciencia den otro. Un di su bukinan mas conoci ta ‘Learned Optimism’.
Contrario na psicologia tradicional cu ta focus riba tratamentonan cu tin como meta pa drecha e danjo causa dor di trauma, depresion of burn out.
Continue reading “Con mi ta bira felis cu psicologia positivo”
forgiveness is better than revenge…learn why … www.comprondiendobida.com
Pordon no ta solamente un acto di noblesa, e ta tambe e miho forma di honra bo propio calidad di bida. Desmond Tutu ta bisa riba ‘Pordon’: E proceso pa pordona ta tambe un proceso unda ta normal cu nos por confronta odio y rabia den henter e proceso. Esakinan ta emocionnan cu ta forma parti di bida di un ser humano. Bo no mester odia bo mes hamas pasobra bo ta odia un hende cu a hasi bo cosnan cu por ta horibel. Saliendo for di e punto di bista cu tur cos tin su polo opuesto, ta importante pa bo sa cu bo capacidad di odia profundo ta bisa cu bo por stima mes profundo. Tutu ta bisa cu e persona cu logra pordona tin tur potencial pa bira un miho hende. Un hende cu a sinja pa laga bay ta mas den pas cu esun cu ta laga su mes worde comi dor di rabia y odio. Una bes cu bo keda pega den e rol di victima, bo ta hasi bo mes dependiente di esun cu a hasi bo danjo. Bo por te hasta juda esun cu a hasi bo danjo pa bira un miho persona. Henter e proceso pa jega na pordon ta rekeri pa e esun cu a hasi e danjo reconoce cu e la comete algo cu a perhudica un otro.
Continue reading “Pordon ta duna mas resultado cu vengansa…”