Nunca mas miedo…

Nunca mas miedo…miedo como cultura di bida…

IngridMi ta corda cu como mucha chikito, mi tabatin hopi miedo. Miedo pa perde, miedo pa haja mal punto na scol, miedo di haja sota. E miedonan aki tabatin un efecto positivo cu e tabata stimula mi pa hasi mi best na scol y siña bon. Di otro banda miedo ta bira un parti di bo sistema y e ta crea mas miedo den bo, te cu miedo ta bira parti di bo cultura di bida. Una bes cu miedo bira parti di bo patronchi di bida, e ta stroba bo pa realisa bo mes completamente como hende y usa tur bo potencialnan. E ta stroba bo di alcansa e exito cu bo por a alcansa, pasobra e miedo cada biaha ta manera choca bo ora cu bo kier dal e stap y sali for di e kouwchi cu bo a custumbra pa biba aden. Bo ta keda draai rond den circulo y prome cu bo realisa añanan ta pasa y bo ta puntra bo mes kico bo a hasi cu bo bida.

Personalmente mi ta pensa cu mi lo a hiba mi bida na ful un otro forma si mi a sinti mi mas liber y a haya un otro stimulacion. Pero esey tabata e educacion di e tempo ey y tur e hendenan cu tabata rond di mi a hasi lo miho cu nan tabata por. Lastima ta cu te ainda nos ta mira cu no hopi cos a cambia den nos comunidad y casi mi lo bisa cu tin ora cosnan a bira pio. Si mi djis scucha con majornan ta purba di laga nan jiunan hasi loke nan kier, tin ora mi ta pensa den ki siglo nos ta biba. ‘Mucha, bo ta hopi bestia’, ‘mucha, bo no ta sirbi pa nada’,  ‘mi no sa pakico mi a trese bo den e mundo aki’, ‘desgraciado’. No ta cosnan inventa, pero saca di e realidad di bida. Miedo den nos comunidad tin su rais den nos educacion na cas, na scol, den iglesia y den politica. Nos ta biba den un comunidad cu tin tur forma di straf bo pa actitud indesea, un arte cu tin ora ta ser practica na un nivel hopi negativo, pero efectivo. Nos lo por hasi hopi uso di enseñansanan cu ta siña nos aprecia nos mes na un forma mas positivo, cu ta siña nos mira nos mes den un spiel auto- critico, unda nos mes por evalua nos mes, segun criterianan mas positivo. Educacion y coreccion ta keda cosnan necesario den bida, pero lo por purba aplica nan cu mas comprension pa e balor humano pa e persona na cua e ta dirigi. Mi tin un buki cu jama:’disciplina cu amor’ cu ta purba siña majornan pa usa un otro sistema den educacion di nan jiunan.

Den un mundo cu ta bay asina lihe, unda tin asina hopi libertinaje y unda ta stress asina tanto riba competencia y consumirismo ta bon pa nos duna nos jiunan juist e hermentnan pa nan por busca nan mes na prome lugar. Ken nan kier ta den bida? Kico ta nan talentonan? Kico ta nan puntonan fuerte? Kico nan por mehora? Esaki ta parti di e descubrimento di nos jiunan pa haja sa ken nan ta como ser humano. Un caminda unda nos como major mester ta nan guia, e man amigo cu ta compaña nan, no esun cu ta golpea nan. Nos boca mester ta un instrumento pa ta un ehempel con pa papia cu otro hende. Con pa papia majan cu nan propio jiunan, no un ehempel con pa insulta otro hende. Tin ora nos ta lubida cu nos jiunan ta siña di nos ehempelnan, pasobra nan ta stima nos como nan majornan. Pues e actitud cu nos ta mustra nan como major ta bira tambe nan custumber, pasobra nan ta copia nos. Nos ta perfecto pa nan, mescos cu nos majornan tabata perfecto pa nos, pasobra nos a stima nan, aunke nos sa cu nan tambe a hasi nan foutnan den nos educacion, pero pa dia cu nos ta cla pa admiti esaki…hopi bes ya ta mucho laat…ya nos a recicla y comete e mesun fout.

Pero nos no tabatin e mesun cantidad di informacion cu majornan tin awendia y pesey nos tin un excuus. Pesey ta importante pa cada major hoben realisa con ‘nan’ a ser educa, kico tabata e foutnan di nan majornan y no…no…no hasi e mesun foutnan. A bira tempo pa nos crea un generacion emocionalmente mas sano y saludabel. E prome stap ta cuminsa cu bo…pa lanta jiunan orguyoso di nan mes, asertivo, cu opinion propio y un imagen propio sano. Y sigur…cu nunca mas miedo pa enfrenta su retonan di bida y desaroja su potencialnan. Corda bon, e ta cuminsa cu bo…como major…abo cu a dun’e bida…no kita su balor den bida…exito!

3 thoughts on “Nunca mas miedo…”

  1. Ohala mayornan y muchanan cresiendo ( hubentud ) awendia por lesa esaki locual bo a skirbi , e ta sumamente importante y necesario. Y aunke tur hende ta keda cu cierto miedo of miedonan, e.o. pa muri, tin cu habri wowo y purba di comprende tur locual ta pasando rond di nos. Aunke mi no ta gusta e dicho aki hopi, e tin cierto ingredientenan pa pone nos pensa, esta, : you’re damn if you do, you’re damn if you don’t – ta keda na abo como persona sa of sinja conose bo mes, ken bo ta. Stima y comprendiendo bida, ai Ingrid, bo ta skirbi asina profundo. Cu Dios sigui drama su bendicion ariba abo y bo Johan, mi ta hanja asina leuk cu bo partner tambe ta jama Johan, bo sa awor con bon e hende hombernan cu tin e nomber aki ta, berdad ? God bless !!

  2. Pabien pabien Ingrid ,super ta bo pagina . Mi ta ful di acuerdo cu bo comentario skirbi riba e pagina web aki. Paar di boeki /MP3 cu a yudami hopi bon ta CONVERSATION WITH GOD di Neal Donald Walsch. Rich Dad Poor Dad di Robert Kiyosaki. Y boeki/MP3 nan cu tin cu haber cu LAW OF ATTRACTION manera THE SECRET .Tambe boeki/ MP3 di motivacion. Pero kada ken tin cu buska pa nan mes crece y ta mihor persona den comunidad ya cu nos sociedad ta siña nos pa biba cu miedo y cu bo no ta capaz . Manera e eboeki di RICH DAD POOR DAD ta bisa na school nos ta sinja pa bira un empleado y no empresario . BOkier bira empresario bo tin bo bay HARVARD of cuminsa riba bo mes si bo tin e DURF . Ta pesey mayoria comerciante millonario ta manda nan yiu bay HARVARD .

    1. Danki Carlos,

      Bo a hasi cu mi a lesa e articulo cu mi a scirbi di nobo y berdad… e tin asina hopi elemento cu ta stroba nos como hende pa realisa nos sonjonan grandi. Nos sociedad poco biaha a sinja nos pa ta orgujoso di nos mes y nos talentonan. Esaki pa mi keto bay ta keda na prome lugar un tarea di gobernacion y su instancianan concerni. Lastima e no ta sosode na un forma autentico cu ta pas cu nos cultura.

      Bo ta scirbi di e DURF… hopi importante…bo kier scirbi bo pensamento y comparti'e cu e lesadornan di Comprondiendo bida? Scirbi ta un arte pa expresa nos alma… Ora nos ta comparti nos ta laga algo balioso atras… e parti cu ta biba paden di nos… Mi ta invita bo pa DURF… si bo kier na un forma anonimo… mi email personal ta ingridwerleman@gmail.com… felis dia y bendicion…. Bay pa bo sonjonan…

Leave a Reply

Your email address will not be published. Required fields are marked *