‘Con mi ta bira un djaka?’ … e arte di konkel y conspiracion..

Omslag BoekFor di un cantidad di buki cu mi a lesa e ultimo tempo, tin hopi cu a resalta den e forma habri cu nan ta trata temanan cu ta taboe. Ta importante pa nos sa con mundo ta hinca den otro. E ora nos sa sigur cu cada biaha cu nos scoge cu nos a scoge conciente. E buki ‘Hoe word ik een rat’… de kunst van het konkelen en samenzweren… a capta mi atencion pasobra e ta hiba nos den e mundo di sushedad cu hende por usa pa logra nan metanan a costo di otro. E cuchui ta corta dos banda, mescos cu majoria cos den bida. E buki por ta un guia pa esnan cu kier bira un djaka of un advertencia pa e asina jama ‘bon hende’… pa scoge unda e no kier ta… pero si sa ki forsanan tin den nos mundo… Spera cu cada lesador scoge pa e ultimo…

Quote:
“Esun cu nunca a susha su man, nunca a biba…“


E buki ta scirbi den forma di un carta. E ta cuminsa den un riool y ta sigi hiba e lesador den e arena y ta pasa tur e fuentenan di poder y e lesnan den wega y trikinan di e djaka. Konkelmento, wega sushi y conspiracion ta accionnan di tur dia den hopi organisacion. Pero… ken ta conspira cu ken? Kendenan ta dos man riba un barica? Ken ta manipula ken, pakico y con? Hende cu ta confia riba palabracionnan formal y riba wega limpi ta sali bon ganja di e wega aki.  Den e wega di djaka no ta tuma decishon a base di decisionnan racional di e argumentonan pro y contra. No, e otro wega, e wega di poder di bou mesa ta casi mes importante.

Den e buki aki, Joep Schrijvers ta scirbi riba su conocemento di e weganan di manipulacion, ‘e weganan di djaka’ den organisacionnan. Den un forma bastante ironico y hopi comprendible e ta describi e tacticanan di mas sushi cu ta ser usa. E ta purba di motiva e lesador pa pensa mas politicamente strategico. Ki interes hendenan den un organisacion ta ambiciona y pa ki motibo? Kico ta motiva un hende? Kico ta e fuentenan di poder cu ta facil pa maneha y manipula. Kico ta bo nivel di ‘djaka’? Con pa discubri e partinan swak y psicologico di bo adversarionan? Con bo ta hunga e wega di djaka riba nivel sofistica?

Esakinan ta e preguntanan practico cu e autor ta profundisa den e ensenjansa di caracteristicanan negativo. Tambe e ta mustra riba e cautela necesario ora organisacionnan ta presenta su mes demasiado suave.

Hopi personal ta ser prepara na scol cu teorianan di management basa riba desaroyo personal, synergia, maestria y sentido comun y una bes nan cuminsa traha nan ta haja un experencia cu por ta totalmente contrario cu tur e teorianan noble aki. Nan ta cay den un mundo di pensamentonan di actitud di djaka cu ta ‘gara loke bo por gara’, ‘ganja cu intencionnan menos noble’ y perhudica bo companjero di trabou pa bo propio beneficio’.
‘Hoe word ik een rat?’ ta un buki diferente cu ta pone bo pensa riba e mundo cu nos ta bibando aden. Esaki pasobra e ta scirbi riba loke casi tur hende sa, pero no ta papia. Tambe dor di su anecdotanan cu tin ora ta demostra hopi falta di respet, pero sigur pa su estilo cu no ta desea di hasi e realidad menos mahos cu e ta.

Leave a Reply