Dr. Viana: Tratamento di menopausa, menopausa y intimidad – Parti 2

Un contribucion di Dr. Carlos Viana

E parti 1 di e articula aki yama Menopausa, su mito y berdadnan

Hopi hende muher ta kere cu por cura menopausa dor di usa terapia di e hormona estrogeno(ERT) of otro forma di repone hormona den bo curpa (HRT).  Descubrimentonan nobo den medicina a proba cu hormona sintetico por ocasiona mas daño den curpa di hende muher cu bon.  Tin alternativanan natural hopi mas sigur cu ta hopi mas efectivo ora nan ta wordu usa bou di guia di profesional.  Prome cu tur cos, menopausa ta un proceso natural y no ta un malesa, asina ta cu un cura no ta necesario.  Na di dos lugar, nivelnan di hormona den curpa di hende muher ta varia masha hopi mes.  Tin hende muher cu mester di diferente hormona, pero tambe tin hende muher cu definitivamente no mester di estrogeno!

De hecho algun di nan mester di testosterona of DHEA,  hormonanan cu bo ta haña den hende homber tambe.  E nivel nan di hormona den curpa di un hende muher cu ta bayendo dor di menopause por fluctua masha hopi mes y dor di esaki mester studia y adapta nan necesidad di hormona cada biaha durante e periodo di cambio.   Finalmente, awor aki ta hopi acepta den e comunidad medico e terapia cu hormonanan sintetico no ta sirbi toch. Y tin test disponible pa determina nivelnan di hormona serca cada persona.

Hopi hende ta kere cu tur hende muher ta perde interes den sex mientras nan ta pasando den menopausa.  E berdad ta, cu e investigadornan Masters y Johnson a discubri cu e libido no ta relaciona cu nivelnan di estrogeno y dor di esaki no ta crash automaticamente durante di menopausa.   Ademas, por lo menos 50% di muhernan cu ta bayendo den menopausa no a reporta ningun falta di interes den sex.  Menos di 20% ta reporta cu nan ta ripara cu nan interes ta baha.  Realmente, durante menopausa, testosterona, e hormona cu ta hasi cu bo ta haya cabei na cara ta esun cu ta hasi muhernan mas agresivo sexualmente.   Hende muher por ta mes hopi of te hasta mas apasiona durante menopausa cu prome cu esei. Cu mas tempo pa nan mes, menos yiu den cas nan tin tur e espacio y tempo pa florece den nan relacion intimo. Mescos tambe den nan relacion personal y profesional.

Get the point!  Ta unicamente cu informacion basa riba hechonan comproba nos por cuminsa na maneha e cambio nan den nos curpa.  Bo ta hayando simtomanan di menopause?
Acupuntura y hierba chines a ser usa pa mas di 5000 aña den e tratamiento di e simtomanan durante e periodo di menopausa .  Acupuntura por juda alivia e simtoma nan manera insomnio, sodamento anochi y cambionan di beis.  Un dieta balansa, suplementonan y hierba nan chines manera den e caso di Dong quai, rijs di regaliz, burdok, motherwort y wild yam por hasi bo transicion hopi mas facil. Pa un grupo grandi di hende muher, menopausa natural no ta un crisis grandi y no ta influencia e opinion di nan salud en general. E ta un epoca mas di bida cu su dolornan y su alegrianan mescos cu cada ciclo di bida tin.

Carlos Viana ta un Docter (Ph D) den Antropologia Medico, —e ta un Doctor den Medicina Tradicional  Oriental  studia  na Shanghai, China;  nutricionista clinico certifica.  Pa mas info: Viana Natural Healing Center, Kibaima 7,t:  585 1270  f:  585 4789, Web site: www.viananaturalhealing.com e-mail : viananatural@hotmail.com

 Loading ...