Mensaje di naturalesa

No lubida cu Tera ta encanta sinti bo pia na Suela y e Biento gusta hunga cu bo cabey. ~ Kahlil Gibran ~

Kico naturalesa ta parse di kier sinja na asina hopi lugar di mundo? Y podise, nos na Aruba tambe tin algo di sinja di un misa, scolnan y matanan di naturalesa cu a ricibi danjo di e hoos recientemente? Bida di hende a keda gespaar, mescos cu e muchanan durante ora di scol. Stranjo no, si bo pens’e bon. Misa, scol, mata cu danjo. Nan ta pidiendo nos un poco mas atencion? Nos Aruba ta paga suficiente tino na nos coneccion cu naturalesa? Na nos bida emocional y spiritual? Si bo lesa e quote bunita di Kahlil Gibran, kico e ta pone bo sinti?

Cua ta e delaster biaha cu bo a cana pia abou sintiendo bo contacto cu Mama Tera concientemente? Ora biento a supla den bo cabey, bo a haja esaki un sentimento dushi of bo a sara paso e biento a plama bo cabey?

Ami ta kere fuertemente den nos interconeccion cu tur cos como ser humano. Mi no ta kere cu bida ta un causalidad. Tin un dicho cu ta bisa cu niun blaachi ta cay foi mata sin cu Dios su man ta hinca eyden. Y tin un otro dicho cu ta bisa cu si hende no ta sinja dor di sabiduria e lo sinja dor di dolor.

Si nos para di un distancia anto observa bida na mundo for di un distancia y for di un coneccion di nos curason jena cu amor pa bida, kico esaki lo bisa nos? Mi ta ripiti: misa, scolnan y matanan di naturalesa cu a ricibi danjo di e hoos tin algo di conta nos di con nos ta andando cu nan?

Laga nos cada un pensa un rato mas y pensa con nos por re-conecta cu e cosnan cu tin balor real den bida… re-conecta cu otro, pensando bon di otro y pa otro, no kap mata si no tin mester, conta bo yiunan y nietonan di e bondad di Dios, bisa otro ‘bon dia’, comparti bo curason, papia bon, no hasi redo, no zundra otro na radio, biba bon, laga biento waja dor di bo cabey, cana pia abou den mondi… pen’se y hasi’e… papia cu Dios, papia cu bo prohimo…dese’e bon…

Djis un pensamento, respetando e forsa di naturalesa y nos forsa pa sinja di sabiduria…
Ingrid