Ingrid Werleman – Page 22 – Comprondiendo Bida

Dr. Carlos Viana ta amplia riba e tema ‘Cuminda y Calidad di Bida’

Dr. Carlos Viana ta un di e facilitadornan di e workshop ‘Birando e Cambio den Bida’. Dr. Viana lo paga atencion na e efecto di cuminda riba nos curpa, mente y espiritu. Diahuebs awor, mei 26 na Spirit of Aruba, Ierlandstr. 22.

Diahuebs, mei 26 awo ta bay tuma lugar e workshop ‘Birando e Cambio den Bida’.
unda Dr. Carlos Viana ta un di e facilitadornan. Despues di e anochi ‘Pensando riba Bida’ di e projecto ‘Comprondiendo Bida’ hopi hende a pidi pa organisa un actividad unda por profundisa mas riba e temanan cu a bin padilanti. Dr. Viana lo repasa cuminda y tur aspecto den bida di e ser humano y tambe tur e fase di edad y nan particularidad. Tin cambionan grandi cu a tuma lugar den ultimo decadanan den nos estilo di bida. E cantidad y sorto di cuminda disponibel a bira hopi mas. E forma di come ‘moderno’ ta nifica pa hopi hende cu e ta ocashona demasiado vet di curpa. Consecuencia por ta obesidad epidemico y mortal. Si nos considera cu un estudio a mustra cu na Aruba mas di 60% di poblacion ta demasiado gordo, esaki ta motibo pa preocupa. Dicon? Esaki ta nifica costo astronomico di AZV, dor cu e riesgo di salud cu ta subi.
Continue reading “Dr. Carlos Viana ta amplia riba e tema ‘Cuminda y Calidad di Bida’”

Comprondiendo Bida cu workshop ‘Comprondiendo y Birando e Cambio den Bida’

Despues di e anochi ‘Pensando riba Bida’ durante cua a presenta e projecto ‘Comprondiendo Bida’ hopi hende a pidi pa organisa un actividad unda por profundisa mas riba e temanan cu a bin padilanti. Pa e motibo aki lo organisa un workshop cu e tema ‘Comprondiendo y Birando e Cambio den Bida’.
E anochi aki lo concentra riba 3 tema cu ta ‘Amor, kico e ta?’, ‘Tips pa un sonjo saludable’ y ‘Cuminda y Calidad di Bida’. E prome tema ‘Amor, kico e ta?’ lo ta na encargo di Belquis Moreu y Ingrid Werleman. Lo trata amor como actitud basico den bida y atraves di historia di e ultimo 200 anja mira dicon nos a perde e coneccion cu nos tabatin cu bida den su totalidad.
Continue reading “Comprondiendo Bida cu workshop ‘Comprondiendo y Birando e Cambio den Bida’”

Belquis Moreu pensando con hunto nos por crea un miho majan

Si nos sa cu loke nos hasi awe ta crea nos futuro di majan, kico abo lo cambia awe? Belquis Moreu a hiba nos un rato den futuro durante e anochi di presentacion di Comprondiendo Bida na Biblioteca… www.comprondiendobida.com

Belquis Moreu a hiba nos un rato den futuro durante e anochi di presentacion di Comprondiendo Bida na Biblioteca Nacional… Un futuro unda probablemente nos ta biba pa e cos y no pa ken nos por ta como ser humano. Pa nos tin un miho mundo majan ta importante pa nos realisa cu nos mester uni man y no tira culpa riba otro. Ta fout di gobierno, ta fout di maestronan, ta fout di majornan, propaganda, comercio. No, pa crea hunto un miho majan mester realisa cu e tarea ta di nos tur. Ta nos responsabilidad pa laga atras un miho mundo cu nos a topa y pesey ta importante pa tur partido pone nanishi den mesun direccion y mira con nos por jega na e solucion mas miho den un mundo y pais unda tin menos medio na e momento aki, pero mes tanto hamber na calor, sosten y amor di hende.
Belquis a capta curason di tur presenta ora e la duna un bista di nos futuro, si nos no tuma accion awe.
Continue reading “Belquis Moreu pensando con hunto nos por crea un miho majan”

Dr. Jaime Falconi: Pensando riba Sonjo

Na ocashon di presentacion di www.comprondiendobida.com dr. Jaime Falconi a papia riba ‘Bibando den temponan cu ta cambiando y pakico hopi hende no ta drumi bon’ a capta hopi atencion.

Na ocashon di presentacion di www.comprondiendobida.com dr. Jaime Falconi a papia riba ‘Bibando den temponan cu ta cambiando y pakico hopi hende no ta drumi bon’ a capta hopi atencion. E la mustra cu tin hopi preocupacion cerca hendenan y tin hopi soledad. Tin hende cu ta drumi poco ora pa dia of nan ta drumi pendiente di ki ora e jiu ta jega cas of di e problemanan di majan. Un sonjo asina no ta laga bo sosega y bo ta lanta mes cansa cu ora bo a bay drumi. Un hende mester di un sonjo profundo pa laga e curpa y mente sosega. Pesey ta importante pa bo entrega bo mes na e sonjo. Drumi cu lus no ta bon, e ta stroba e centro di bo sonjo. Problema cu sonjo na Aruba a crese pasobra Aruba ta manera un parke di lus anochi. Hende cu tin problema pa entrega nan mas na sonjo, por usa musica relajante, meditacion, yoga pa logra e sonjo cu ta duna descanso di berdad. Realisa cu un hende cu ta drumi mucho poco ta muri mas trempan. Esaki ta un realidad cu no por trese cambio den dje.
Continue reading “Dr. Jaime Falconi: Pensando riba Sonjo”

Presentacion di Comprondiendo Bida y evento ‘Pensando riba Bida’ a inspira…

Presentacion di Comprondiendo Bida y evento ‘Pensa riba Bida’ a inspira…un bista general di un anochi pa alimenta nos alma y curason

Na prome lugar danki na tur hende cu e a hasi e bunita anochi aki posibel. E tabata un anochi cu a toca hopi curason. Tambe cu a inspira e publico presente pa pensa riba bida. No solamente e bida awe, pero tambe e bida majan. E bida na nos pais Aruba. E bida den nos famia.
Mi persona, Ingrid Werleman a cuminsa e anochi cu un presentacion di e website Comprondiendo Bida. E oradornan Dr. Jaime Falconi, Belquis Moreu, Edsel Lopez y invitada di honor minister Michelle Winklaar tabatin algun puntonan comun den nan mensaje. Nan tur a mustra riba e cambionan den bida cu nos lo por pensa riba dje. Bida pura y agita a pone nos bay den un rutina di bida cu ta laga poco tempo pa interaccion humano.
Continue reading “Presentacion di Comprondiendo Bida y evento ‘Pensando riba Bida’ a inspira…”

Spiritualidad y trabao…. Por combina…

drs. ing. Edsel Lopez, director PriceWaterHouseCoopers den Comprondiendo Bida, e revista edicion 2001 ta contesta riba e pregunta si Spiritualidad y trabao…. Por combina…

Parti di un entrevista cu drs. ing. Edsel Lopez, director PriceWaterHouseCoopers den Comprondiendo Bida, e revista edicion 2001

Spiritualidad y trabao…. Por combina…?`Claro cu si!’ segun Edsel. ‘E caminata aki a pone mi defini hopi bon pa mi mes kico spiritualidad por nifica pa mi trabou’. Edsel, cu ta director di e oficina di ‘PriceWaterHouseCoopers’ na Aruba ta bisa: ‘Na nos oficina mi ta haya importante pa traha na e ‘team spirit’. Den nos oficina mester tin como sifuera un bala di energia positivo ta circula tur ora. Esaki ta nifica cu nos lo traha ‘hunto’ na resolve tur situacion, tambe esunnan dificil.

Y Edsel ta kere firme den e expresion: ‘Bo ta atrae loque bo ta’, dor di esaki e ta kere cu semper bo lo haya bo den situacionnan y cu hendenan cu ta pas cu bo personalidad, cu e cosnan cu abo, ta proyecta den bo bida.
Continue reading “Spiritualidad y trabao…. Por combina…”

Comprondiendo Bida cu presentacion oficial y anochi di ‘Pensando riba Bida…’

Dr . Jaime Falconi: neurologo y psychiatra, drs. ing. Edsel Lopez: director di PriceWaterHouseCoopers y Belquis Moreu: motivational speaker lo ta hunto cu Ingrid Werleman durante un anochi dedica na e presentacion oficial di Comprondiendo Bida. Bo tambe ta invita!

Dr . Jaime Falconi lo papia riba ‘Bibando den Temponan cu ta Cambiando y su retonan’. Belquis Moreu ta toca e tema ‘Un miho majan’ y drs. ing. Edsel Lopez ta papia riba e tema inovativo ‘Trabou y Sentido di Bida’. Finalmente Ingrid Werleman lo clausura e anochi cu e pregunta ‘Comprondiendo Bida, POR?’.

E temanan aki ta toca cada hende, famia y cada cas. Dicon? Pasobra nos tur ta topa cu retonan y preguntanan di bida pa cua hopi biaha nos no tin contesta. Y den e buskda aki e projecto kier hunga un rol.

Hopi hende den comunidad a lo largo di tempo a sinja conoce Comprondiendo Bida como un projecto cu ta contribui na un miho bida y comunidad. Hopi ciudadano di diferente edad y interes a duna nan contribucion pa trese informacion di desaroyo personal y comunitario cu ta juda un hende compronde bida mas miho. Di e forma aki poco poco nos ta creando hunto un plataforma pa tur hende por duna di nan expertisio y experencia y juda otro crese. Y hopi importante ta cu e website ta den papiamento. Tambe di media semper Comprondiendo Bida a haja amplio sosten y pa esaki ta hopi agradecido.

Comprondiendo Bida a cuminsa como un talkshow pa discuti aspectonan profundo di bida. Despues a compila e informacion aki den un serie di revista y awor e projecto ta digital riba e website www.comprondiendobida.com . Aspectonan cu ta haja hopi atencion riba e website ta e parti di desaroyo personal, spiritual, ecologico y artistico y creativo.

E anochi di ‘Pensando riba Bida…’ ta tuma lugar diahuebs, mei 12, di 7.30 – 9.30 anochi den cura di departamento di Arubiana Biblioteca Nacional den Bachstraat, na Playa. Entrada pa e anochi ta gratis.

Kico ta un mama…

un mama ta stima semper… e ta hari den momentonan alegre, e ta jora den tristesa y ta roga den momentonan di angustia pa pidi proteccion … www.comprondiendobida.com

Kico ta un mama… ?

Un mama ta esun cu ta tene nos man desde chiquito… den su curason e ta stima su yiunan sin condicion, paso e ta esun cu a carga nan pa hopi luna largo den su matris… maske e nunca a wak su yiu ainda prome cu e la nace… un mama ta pendiente di e prome movecion… e ta conciente di e pianan chiquito cu tin ora ta skop contra su ribchinan… y ora e yiu nace, e ta reconoce cu bida ta jen di milager… un mama ta stima semper… e ta hari den momentonan alegre, e ta jora den tristesa y ta roga den momentonan di angustia pa pidi proteccion pa e sernan cu mas e ta stima, esta su yiunan…

Un mama ta crea plannan grandi pa cada un di su yiunan cu no semper ta keda realisa… e ta sigi stima any way… un mama no semper ta di acuerdo cu su yiunan, ni e por compronde kico ta biba den cada cabes di cada yiu… y toch…. E ta sigi stima nan… semper…
Tin ora mi ta puntra mi mes…kico ta e secreto di ta un mama? Mi ta kere cu e jama ‘Amor’…?!

“Weganan di computer no ta asina inocente!”

Poco tempo pasa e revista hulandes Elsevier a publica resultado di un investigacion cientifico riba e efecto di weganan di computer. A resulta cu weganan violento sigur sigur tin un efecto negativo riba hobennan. Si mas y mas ta focus riba e importancia di norma y balornan sano con nos por permiti weganan unda e hungado ta haja punto pa tortura su adversario y peg’e na candela. Esaki ta sosode den e wega Postal. Hopi hende ta papia di ‘violencia sin sentido’ y toch ta permiti nan jiu hunga weganan jen di violencia. Laga nos realisa cu un mucha no semper por diferencia entre fantasia y realidad. Weganan di computer no ta asina inocente. Tin hopi elemento robes den nan.
Continue reading ““Weganan di computer no ta asina inocente!””

Mami por gana su photobook na Checkpoint Color

Bida di un famia den nos cultura ta concentra majoria biaha rond di nos mama. Na Checkpoint Color semper e mama ta super special, pasobra un mama ta nos nucleo caminda famia ta nace. Y awor bo por gana bo propio photobook…

Dia di mama ta asercando, e dia cu den tur cas ta honra e ser central den cas cu ta e mama. Bida di un famia den nos cultura ta concentra majoria biaha rond di nos mama. Na Checkpoint Color semper e mama ta super special, pasobra un mama ta nos nucleo caminda famia ta nace. Den su pensamento un mama ta su so hopi biaha cu su yiunan. E prome jiu, e prome palabranan, e jiu cu a crese y bay afo, e jiu cu no ta cu n’e mas. Momentonan den bida cu awor mami por recorda cu e potretnan di su ser nan stima. .. Pa logra esaki Checkpoint e anja aki kier duna tur mama un chens tin nan mes photobook, un buki di recuerdo. Pa nan por sera conoci cu e photobook, tin un promocion special pa dia di mama. Y tambe tin e custumbra potretnan di ‘glamour studio’, unda e mamanan por make up y mustra manera tur un reina di beyesa. Y riba dje Checkpoint Color ta duna cada cliente mama e chens pa gana nan mes photobook. Con?
Continue reading “Mami por gana su photobook na Checkpoint Color”