Category: Articulo

Den e quietud di nos bida, den semana santa, ban pensa kico nos kier aporta pa un mundo mas felis. Si Hesus por a wak bo di un distancia, kico e lo pensa di bo bida? Cambio ta cuminsa cu un decishon.

Hopi curasonnan na Aruba a keda den shock cu e noticia di bo traspaso pa e mundo spiritual, Gerda. ‘Tante Gerda, na unda bo ta?

Tante Gerda a inspira hopi mucha desde comienso di Tele Aruba cu su programa pa mucha. Tante Gerda, Gerda de Groot, amiga cu tabata tey semper pa hopi hende. Gerda, un persona cu semper ta impresiona cu su presencia y aparencia. Un dama cu clase y curason di oro. Semper cu un smile riba su cara. Semper dispuesto pa juda den hopi organisacion y den hopi funcion. Dunando di su hopi talento sin pidi nada bek.

‘Tante Gerda, na unda bo ta? Bo a bay pa sigi hasi muchanan felis den shelo? Bo a bay pa papia cu e muchanan tocante amor, mescos cu bo a hasi, tante Gerda, aki na mundo di hende?. Bo a bay pa conta e hendenan den shelo con bunita Aruba ta y con hopi bo ta stima Aruba? Con special bo ta haja Aruba? Tocante historia di Aruba, e pais cu abo a scoge como e pais di bo curason.

Bo a bay pa conta e mucha y adultonan tocante e grandesa di nos Universo y cu nos tur ta uni? Bo a bay pa comparti bo amor pa naturalesa cu e hendenan den shelo? Splica nan e importancia di Amistad? E importancia pa ta lief pa otro y pa e bestianan cu ta rond di nos…

Bo a bay pa splica pakico ta importante pa ta semper representable y hasi cada trabou cu dedicacion? Bo ta papia na radio y ta presenta ‘E Bon Noticia’ caminda cu bo ta?
Tur esakinan ta talento, cualidadnan y birtudnan cu hopi di nos a experencia y sinti cerca bo.

Danki pa hasi e mundo aki mas felis y mas bunita. Cana dushi den e Universo cu tanto bo ta stima, bula halto den e mundo sin limite, plama amor, medita hopi, sigi sinja, sinja nos, drumi dushi, amiga… Ajo, tante Gerda…bo ta keda pa semper den Aruba su nos curason.

Ingrid Werleman y Patricia Martina a conoce otro via un pagina di un amigo riba Facebook. Na juli 2012 nan a topa otro personalemente na Hulanda pa prome biaha. Combersando riba bida tabata manera nan a topa parti di nan storia den e bida di otro. Y akinan a lanta e deseo pa hasi algo hunto cu lo inspira nos hendenan na Aruba. Asina a nace e actividad cu lo tuma lugar den e weekend aki cu a haja e nomber ‘Un rato pa Bida’. ‘Un rato pa Bida’ ta un workshop cu tin como meta pa hiba cada participante un rato paden di su mes. Pa repasa e anja cu a pasa y traha metanan nobo pa e anja cu ta na caminda, esta 2013.

Ingrid y Patricia lo comparti nan conocemento y sabiduria cu e participantenan. Pasobra tur di nos por cambia nos bida, sabiendo cu nos ta co-creador di nos existencia. Nan ta bisa: ‘E workshopnan ta basa riba e sentimento di gratitud, harmonia y alegria. E workshop ta duna bo e posibilidad di conecta cu bo poder interior, conecta cu e mundo rond di bo, dor di comprende na un punto mas profundo di kon bo ta haci kiko bo ta haci y kon cambia pa bo mes bienestar. Ora e hendenan bai cas nan ta sinti di berdad kiko kier men: dance life, do the shadayo & walk in gratitude. E workshop ta basa riba baile, d-stress, meditacion, awareness, wellness, alegria y laga los loke nos kier drenta 2013 cu n’e.  Ta importante pa nos realisa cu nos a bin mundo pa conoce nos mes, pa goza, pa sa kiko ta amor y pa crese den nos potencial. Nos no ta aki pa keda molestia, pa laga bida pasa nos voorbij. Nos t’ey pa biba y goza cada momento maximo y comparti esaki den gratitude cu e mundo rond di nos. ‘Un rato pa Bida’ ta bira un workshop yena cu bienestar, wellness y wellbeing y esey lo nan sinti den tur nan celnan!!!’.

Lo tin un mini workshop riba diabierna,  December  7 di  8 -9 anochi. Y dos workshop ‘UN RATO PA BIDA’ cu lo ta riba diasabra, December  8, entre 10.00-1 or merdia y un otro di 3 or merdia – 6 or atardi. Nan ta tuma lugar na Cas Deliza, situa net pazuid di RCA-stadion, Kamerling Onnestraat 50. Pa mas informacion por wak e pagina di Comprondiendo Bida riba Facebook of jama 741 3300.