Wellness & Lifestyle – Comprondiendo Bida

Por ta cu preocupacion ta stroba bo soño…

Tempo ta pasa…con hopi a cambia den bo bida? Prome parti di un entrevista na 2010 cu Dr. Jaime Falconi, neurologo y psichiatra.
…Hopi hende ta drumi malo… nos sa cu tin hopi cos cu no ta klop den nos bida, pero nos no ta busca yudansa…nos ta prefera di wanta e berguensa y kibra nos cabes, keda sin drumi…

Tempo ta pasa…con hopi a cambia den bo bida? Prome parti di un entrevista na 2010 cu Dr. Jaime Falconi, neurologo y psichiatra. Tanten dr. Falconi ta felismente penshona y ta duna su cooperacion riba peticion.

Dr. Jaime Falconi, neurologo y psichiatra Arubiano tin e tema aki como un punto di atencion grandi. E no ta solamente un problema serca hende grandi, pero pa hopi tempo caba e ta un fenomeno cu nos ta wak tambe serca hobennan y te hasta serca muchanan hopi chikito.

Di con?
• Pasobra nos custumbernan di biba a cambia, consecuentemente tambe nos ritmo di drumi.

Antes nos tabatin 2 of 3 canal di television. Awendia nos tin cable y dish cu un cantidad grandi di canal, 24 ora pa dia. Nos tin internet, ADSL 24 ora pa dia. Y….nos tin menos control di majornan kico nan yiunan ta hasi, ora cu lo mihor pa nan ta pa nan ta drumi. Mayornan ta traha warda, nan tin nan propio preocupacion y tempo a bira moderno. Muchanan tin hopi mas libertad cu antes, talves demasiado pa nan propio bienestar y felicidad.

• E constelacion di nos famianan a cambia. Nos tin hopi mas famia di un solo mayor. Esaki ta nifica mas obligacion riba lomba di un solo mayor. Pues tambe mas preocupacion. Mamanan cu ta lanta nan so cu nan yiu no ta un tarea facil, placa hopi bes no ta yega, yiunan ta mas rebelde. Y e mama na final di dia y prome cu e pega soño ta ocupa su mes cu e problemanan cu e mester soluciona mayan. E no tin hopi sosiego berdadero. Con bon e por drumi realmente e ora? Y bo por culp’e si e ta irita pa un periodo largo? Un situacion cu hopi biaha ta bira algo cronico, sin cu e mes ta realisa… E ta subi cama 12 or anochi, ta pega soño 1 pa 2 or madruga…Cuanto ora di soño un persona asina ta haya pa dia? Probablemente pa 5 of 6 or ya e mester ta ariba su pia pa prepara muchanan pa bay scol…

• E control social den nos comunidad a cambia. Nos ‘privacy’ ta sagrado, nos murayanan a bira hopi halto y nos no ta mete cu bida di otro. Di otro banda nos no ta preocupa cu otro mas tampoco… Ni nos ta duna otro un man asina hopi mas… Ni nos kier scucha conseho mas…nos sa cu tin hopi cos cu no ta klop den nos bida, pero nos ta prefera di wanta e berguensa y kibra nos cabes, keda sin drumi, cu busca yudansa…

• Consecuentemente nos ta cay den un circulo vicioso, cu nos curpa no ta haya e sosiego necesario…nos no ta drumi bon, nos no ta drumi suficiente y nos no ta funciona bon…pasobra nos curpa y mente no ta haya e chens pa recupera su mes… Nos mester di pildo pa drumi?

• Nos ta biba den un mundo yen di desordo. Nos kier hasi hopi cos, sali bay hopi caminda, nos kier cumpra hopi cos, nos yiunan kier hopi cos. Nos kier un television riba cada camber? Talves nos por cuminsa realisa cu tin un otro manera pa anda cu bida?

• Nos forma y orario di come a cambia. Nos ta come mucho laat, cu cuminda mucho vet. Si bo ta bay drumi cu un stoma yen, con bon esaki por juda bo pa drumi sosega?

(E ta sigi majan…)

E pensamento pa awe. E berdad scondi

Si cambia leynan cu ta pone tanto e mama como e tata responsabel pa e yiunan, hombernan lo pensa miho prome cu traha yiu?

Awe ta ‘Dia Internacional di Famia’. Mi ta pidi bo pa tuma un rato pa wak un video cu ta mustra nos hopi cla pakico ta importante pa nos no bira cara pa e realidad scondi den mas famia cu nos ta kere.

‘E berdad scondi’ ta un testimonio di pobresa na Corsow. Situacionnan cu ta conta pa mas isla y pais, tambe pa Aruba. E cosnan di bida cu no tur hende kier wak. E circulo vicioso di pobresa. E abuso sexual den famia. E buskeda pa amor di un muhe jong cu a pasa den tur e situacionnan aki. Y toch e ta hasi e esfuerso pa papia cu su yiunan pa nan tin un miho bida. Pero e no por su so.
E mama di 3 yiu y 27 anja ta bisa: ‘Mi no kier pa mi yiunan pasa den mesun cos cu ami a pasa aden.’ Y toch den tantisimo caso bo ta mira cu den e buskeda pa amor, felicidad y proteccion, muchanan jong ta atrae net e hende den su bida cu ta lag’e pasa den loke e no tabata kier. Manera e senjora cu ta guia mamanan den situacion di pobresa ta bisa; ‘E ta bay hopi mas profundo, cu bo lo pensa na prome instancia.’ E berdad ta cu e tin hopi di hasi cu cicatrisnan di bida. Y sin guia adecuado y comprenshon di otro, e persona ta keda pega. Pasobra niun hende a sinj’e balora su mes. Tampoco pa e explora di ki forma e por sali di pobresa dor di usa un posibel talento cu e por tin.

Tin ora mi ta puntra mi mes si e hendenan cu tin cu yuda e mamanan aki tin mas facilidadnan pa traha cun’e, e lo por yuda mas? Si cambia leynan cu ta pone tanto e mama como e tata responsabel pa e yiunan, hombernan lo pensa miho prome cu traha yiu? Si pueblo henter cuminsa wak hende den necesidad cu wowonan di compashon, y yuda pa nan haja mas balor propio, nos lo crea un miho comunidad?

Cosnan pa pensa, pa ami y abo…
Stima bo famia y stima tur famia…

Ingrid Werleman, pa www.comprondiendobida.com

Pensamento pa awe ‘Dialuna, mei 15 ta Dia Internacional di Famia’

Lo ta hopi bunita pa cada sector den comunidad duna atencion na e dia aki, esta e Dia Internacional di Famia. Dialuna, 15 di mei.

Dialuna, mei 15 ta Dia Internacional di Famia, manera decreta pa Nacionnan Uni desde 1996.Tema pa 2017 ta: “Famia, educacion y bienestar”
E anja aki ta focus riba e rol di famia den sociedad, e maneho di gobierno pa promove educacion di famia y tin acceso na bienestar. E atencion pa e dia ta tambe pa crea conciencia con importante ta pa muchanan haja educacion sano desde hopi chikito te dia nan bira adulto.

Un otro meta di Dia Internacional di Famia ta pa mustra gratitud na tur otro persona y organisacion cu ta juda den educacion di mucha. Asina por pensa riba wela y welonan, famia cercano, bon bisinja y amigonan, instancia, fundacion y gruponan social. Nan ta duna un man pa e famianan den un pais por tin bienestar. Ta bon tambe pa duna reconocimento na empresanan cu tin condicionnan di trabou cu ta sostene e famia dor di por ehempel ofrece oranan di trabou flexibel of parttime. Tambe na empresanan cu ta duna hoben- y grandinan oportunidad pa keda activo den trabou pa asina por juda nan famia.

Ta un dia cu nos por duna atencion den media riba e importancia pa tin e conocemento adecuado pa promove un sistema di biba cu ta bon pa nos medio ambiente y ta sostenibel. Na esnan cu ta guia famianan con pa comunica cu otro na un forma sano y respetuoso. Con pa respeta e derechonan humano y promove pas y igualdad den cada famia y pais. Y naturalmente na e instancia y personanan cu ta duna di nan tempo pa comparti nan concemento.

Lo ta hopi bunita pa cada sector den comunidad duna atencion na e dia aki, esta e Dia Internacional di Famia. Di parti di www.comprondiendobida.com nos lo desea di wak tambe actividadnan special pa famianan den bario. Tambe pa duna un carinjo special na e famianan chikito di un solo persona. Hopi biaha nan ta hendenan cu ta biba den soledad. Duna nan tambe un man di aprecio, di hermandad y humanidad.

Felis Dia Internacional di Famia di parti di www.comprondiendobida.com

Awe ta dia internacional di hende muhe y e hobencita cu nan a agredi.

Tin ora mi ta puntra mi mes si ta destino of ta casualidad ta laga bo wak cierto situacionnan y pakico.

Un caminda den Playa, lorando un birada pa parkeer, mi ta mira un hobencita teenager ta bin di otro banda ta jora di un forma hopi desespera. Mi ta baha pa informa kico a pasa y ta compronde cu un persona riba un bicicleta a agredi e hobencita pa horta su telefon. E hobencita a bay den shock y tur e otro hobennan rond tabata hasi nan esfuerso pa jud’e den un forma of otro. Polis ta bin, ambulance ta bin pa atende e hobencita wardando pa su majornan jega.

Mi ta move di e sitio, pero e cara angustia y yorando desepera di e hobencita ta keda manera graba den mi mente y ta pop up cada biaha.
Mi ta puntra mi mes unda mas nos mucha y hobennan por ta echt safe den e Aruba actual. Majan ta dia internacional di hende muhe y mi ta puntra mi mes kico por hasi pa por garantisa no solamente nos hendenan muhe, pero tur hende grandi, mediano y chikito un Aruba unda bo por cana riba caya sin miedo pa cosnan malo pasa bo.

E potret ta di e ambulance cu a bin pa asisti e hobencita. Concientemente mi no ta pone e hobencita su cara. Ta mas importante pa nos protega privacidad di nos mucha y hobennan. Ta importante tambe pa nos hasi algo pa hendenan cu ta circula riba caja cu intencion menos bon. Nos no por keda wak e hendenan cu ta biba riba caya manera hendenan cu ta molester pa comunidad so. Pasobra si, nan ta! Pero nan ta tambe hendenan cu posibel problemanan profundo y malesa di adiccion. Y nan mester di tratamento y guia. Nos no por keda biba den un circulo vicioso di miedo y laga pa cada hende y famia busca nan propio solucion. Esaki por hasi cu mas y mas hendenan lo sera nan mes tras di e murayanan di nan cas pa evita cu algo malo pasa nan. Of loke ta pasa caba, nan ta tuma justicia den nan mes man.

Ami lo kier wak un comunidad di hendenan cu tin alegria di bida y ta comparti cu otro. Mi ta muhe y mi ta mama y mi ta stima mi pais. Y mi ta kere cu ta birando mas y mas tempo pa nos admiti cu nos pais a cambia hopi. Mi no kier bay bek na e cosnan menos bunita di pasado, pero si lo kier mira un Aruba cu ta dushi y safe pa biba.
Con dushi lo ta si nos por mira un sonrisa riba cara di nos hobennan. Un Aruba jena cu hendenan contento y felis.
Nos pais ta un pais hopi chikito y si nos tur enfoca riba e imagen aki y duna di nos parti, sigur nos por logr’e.
Na honor di nos mes y e generacion cu lo sigi nos, ban pone man na obra.

Ban protega nos comunidad cu e forsa di nos curason!

Awe, dia internacional di hende muhe, ta un bunita dia pa cuminsa!

Ingrid Werleman, editor

Stima cu henter bo alma y curason sin miedo pa perde.

Tin hendenan sabi cu ta bisa cu e buskeda di hende ta semper ‘conoce felicidad’.

stima cu pashon — Stima sin miedo pa perde!

Un grupo di amiga tabata papia riba e tema. ‘Esta dushi ta cu bo por stima, maske con duro bo bida por tabata! Bo ta realisa cu ‘ami no ta loke bida a hasi cu mi, pero loke mi ta scoge pa hasi di mi bida’. Hopi biaha nos ta ta tende tur sorto di expreshon:

Homber no ta di confia awendia mas
Relacion den e temponan aki no ta traha
Nos mundo a bira mucho liber, tur cos por

Di otro banda, ora nos papia cu un hende intimamente y honestamente, nos ta realisa cu hopi di e expreshonnan aki ta basa riba miedo. Miedo pa perde, miedo pa dolor, miedo pa perde cara. Y un otro hende cu si a tribi di entrega nan mes na amor y pashon den nan bida y ta wak bek cu sinceridad ta bisa cu nan no ta lamenta. Nan ta pensa cu ta bal mas di a conoce amor y despues sinti dolor cu pa un of otro miedo nunca a experencia kico ta nifica ‘stima cu henter bo alma y curason’. Perde bo mes den amor y pashon, entrega bo mes totalmente. Gosa di amor y intimidad sin miedo. Comparti bo alma y bo curpa.

Kico tin mas bunita cu conoce e sentimento di mas profundo cu biba ta ofrece nos. Tin hendenan sabi cu ta bisa cu e buskeda di hende ta semper ‘conoce felicidad’. Anto pakico tin miedo pa top’e? Pens’e! Hopi felicidad den e buskeda!

Escogencianan den bida…

scoge no semper ta facil — cua direccion mi kier bay di berdad?

Tur momento den bida ta un momento di escogencia. Mi ta corda cu na un momento cu mi mester a tuma un decision determinante, un amigo a bisa mi algo cu semper a keda graba den mi mente.

Esta: ‘Corda cu tur loke un otro hende hasi bo, ta abo mes ta permiti pa sosode’. Pasobra como un ser humano bo tin e libertad pa scoge con pa reaciona riba cualkier asunto. Si un hende bisa bo un palabra pisa bo por scoge pa rabia of pa keda den bo propio balor sin sinti ningun ofensa. Y aki a cuminsa un proceso largo pa los mi mes di situacionnan indesea den mi bida.

Esaki ta momentonan cu nos tur ta haja nos mes aden den bida. Y nos tin cu scoge. Hopi biaha nos ta scoge sin pensa profundo riba e cosnan di balor di berdad. Kico e consecuencia di loke mi ta scoge ta pa mi mes, pa mi famia y mi pais? Kico e consecuancia lo ta aki 5, 10 of 20 anja? Bay paden un rato y reflecciona riba kico ta bo norma y balornan. Y laga esakinan ta e guia den loke bo ta scoge cada momento.

Bo por cambia bo mes dor di ta mas critico y observativo cu bo mes. Tambe pa decisionnan cu ta regarda bo famia y henter un comunidad. Gran parti di Mundo ta den un crisis di norma y balornan. Tin ora mi ta puntra mi mes si nos tin un les di sinja di e situacion aki.

Nos cada un por cuminsa hasi e diferencia….AWOR… ora nos scoge pa cosnan cu ta cuadra cu nos norma y balornan di mas halto den bida…

Bo a pensa di berdad, berdad kico eseynan ta?!….

Ayera nochi mi a sonja

Sonjonan ta duna nos hopi contesta riba nos bida. Cosnan cu nos a pasa aden. Escogencianan cu nos ta hasi…

Ayera nochi mi a sonja

Cu mi ta atrae den mi bida

Hendenan cu ta stima so

Mi a puntra mi mes dicon

Mi sonjo a contesta mi

‘Paso abo a sinja stima bo mes’

Di berdad…

Bo ta atrae unda bo ta

Cu bo mente y curason

~ Ingrid Werleman

April 18, 2013

E Mucha Autista, e Mucha Malcomprendi

Awe ta dia pa haja sa mas di Autismo. Ami ta e mucha cu ta mustra sano y bon. Mi a nace cu diez dede na pia y man. Pero tin algo diferente, algun caminda den mi mente, Y kiko e ta, niun hende no sa.

Ami ta e mucha cu ta mustra sano y bon.
Mi a nace cu diez dede na pia y man.
Pero tin algo diferente, algun caminda den mi mente,
Y kiko e ta, niun hende no sa.
Ami ta e mucha cu ta pasa duro na scol,
Juffrouw ta bisa mi por siña masha bon.
Nan ta yama’mi pa ‘floho’ y mi mester por sa,
Pero e cos ta, min’sa unda pa cuminsa.
Ami ta e mucha cu no kier bisti e flanel ey
Pasobra e ta molestia.
Mi no por wanta cierto zonido ni holor,
Y tin cuminda mi no kier ni wak!
Ami ta e mucha cu no por catch e bala
Y mi ta cay lihe,
Muchanan ta kies mi delaster pa nan team
Para eynan ta warda, nan no sa cu mi ta sinti’e?
Ami ta e mucha cu nan no kier hunga cun’e.
Esun cu nan ta tenta.
Mi ta purba hasi mescos cu nan,
Mi por imita.
Loke mi ta hasi fout, mi no sa.
Ami ta e mucha cu ta grita y sapatia,
Mi ta parse “malamucha”. Bo nunca lo sa con e panico paden ta.
Ora mi perde den mi miedo y ta rabia.
Ami ta e mucha cu ta mishi rond y cana bay.
Nan ta bisami sinta keto y hasi bon.
Mi lo hasi’e si mi tabata por….
Bo ta kere mi a kies pa ta foi control?
Ami ta e mucha cu curason kibra,
Maske ta parse cu no ta importa. Ami ta e mucha cu mester wordo stima,
Tambe acepta y valora.
Mi ta e mucha malcomprendi,
Diferente, pero mescos cu bo mi ta!

(Traduci & Adapta for di “The Misunderstood Child “ di Kathy Winters)…. cu danki na Fundacion Autismo Aruba

For di curason di un hende homber pa e ser muhe ‘Si, Bo Por’

‘Si, Bo Por’. Un articulo scirbi for di curason di un hende homber pa e ser muhe. Scirbi pa Robert Coffie, motivational trainer na Corsow. Mi a conoce Robert den tempo di Air Aruba, como station manager di Air Aruba na Corsow. Tur hende cu conoce Robert lo ta di acuerdo cu e ta un persona cu ta inspira y toca hende su curason pa su personalidad y sinceridad.

Scirbi pa Robert Coffie, motivational trainer na Corsow. Mi a conoce Robert den tempo di Air Aruba, como station manager di Air Aruba na Corsow. Tur hende cu conoce Robert lo ta di acuerdo cu e ta un persona cu ta inspira y toca hende su curason pa su personalidad y sinceridad. Un gran hende! Danki, Robert pa bo contribucion balioso!

Si, Bo Por!!! Yes, You Can!!!

Ta tuma tempu pa edifiká i/òf logra kosnan bon.
Pero mantené bo fe i bo vishon enfoká i keda konsistente. Si bo tin e kosnan ei, mesora e proseso di kreashon ta kuminsa.
Ku kada pensamentu, kreensia, palabra i akshon bo ta moviendo den e direkshon ku bo ke bai.
Sinti kon lo bo lo sinti . Antisipá i mira kon e situashon ku bo ke krea lo ta. Uza bo imaginashon i hinka bo mes totalmente den e eksperiensia ei.

Ku fe,i bo vishon i ta konsistente, tur kos ta posibel, hasta den situashonnan i tempu ekonómiko difísil tin oportunidatnan.

Sea ku bo ke mehorá bo salú. Kibra ku un adikshon, òf kibra ku un patronchi negativo di bo komportashon, of krea mihó relashon, BO POR HASI’E’. YES YOU CAN!!

Keda positivo i asosiá bo mes ku hendenan ku ta apoyábo inkondishonalmente. Uza bo energia bon i no kompartí bo soñonan òf bo deseonan mas íntimo ku hendenan negativo ku no ta apoyá bo bèrdat.

Sa ku tin un siklo i fluho natural pa tur kos den bida i den universo.
E flor lo sali bunita ora e ta kla pa sali.
Un yu lo kana na e momento korekto.
Amor lo yega na e momento perfekto.
I Dios lo yega i yuda na e momentu ku mas bo mester di dje.
Sa tambe, ku igualmente ku e bon ku abo ta buska, e bon ei tambe ta buskando abo.

Mantené bo mes habrí pa risibí e loke bo ke, keda positivo i e milager lo yega.

Si, Bo Por!!! Yes, You Can!!!

8 di Maart y un mundo cu mesun derecho pa tur

Na caminda pa Maart 8, Dia Internacional di Hende Muhe: Nos tur tin un sonjo, pa tin un bida felis. Circumstancianan di bida por evita esaki. Y toch nos tur tin derecho di sigi sonja… e ta e unico forma cu un dia nos por jega mas cerca di nos sion:’Un mundo cu mesun derecho pa tur’…

Na caminda pa Maart 8, Dia Internacional di Hende Muhe:

Nos tur tin un sonjo, pa tin un bida felis. Circumstancianan di bida por evita esaki. Y toch nos tur tin derecho di sigi sonja… e ta e unico forma cu un dia nos por jega mas cerca di nos vision:’Un mundo cu mesun derecho pa tur’…

Den un comunidad ideal:

1 E famia ta central.

2 Tin oranan di trabou flexible y posibilidad di traha part time y traha for di cas.

3 Tin bon condicionnan di trabou secundario.

4 Tin training di personal riba contenido di trabou.

5 Tin training di personal riba desaroyo personal y calidad di bida (stress/wellness).

6 Tin judansa social cu ta tene cuenta cu e realidad di e trahado y ta traha na prevencion, na lugar di traha curativo. Esaki ta nifica cu ta warda pa problema escala prome cu duna judansa. E ora ta laat y ja danjonan ireparabel por a tuma lugar cu tin ora no por cura mas, cu tur bon intencion di mundo.

7 Tin un bon structura di coperacion bou habitantenan y judansa di instancianan social y educativo den bario cu ta sali for di e necesidadnan di e habitantenan mes.

8 Ta stimula hendenan muhe pa copera cu otro y si ta necesario traha den forma di coperativa.

9 Ta duna informacion y educacion na majornan con pa lanta nan jiunan segun e declaracion internacional di derechonan humano y derechonan di mucha.

10 Ta stimula un mente critico y asertivo cerca e hende muhe cu hopi biaha ta cabes di famia. Asina e por educa su jiunan di chikito pa sa nan derecho y ta evita manipulacion di instancianan y personanan individual.

11 Poniendo e hende muhe central den desaroyo di un pais ta e unico forma pa un dia jega mas cerca di e ideal pa bira ehempel pa mundo.

12 Ta honra no solamente e hende muhe cua bira exitoso dor di un carera briyante, pero tambe e hende muhe cu a lanta su hopi yiunan su so fregando vloernan di otro hende, lorando man cu bolo y snacks y bibando di un suma minimo di asistencia social. Tambe e grupo grandi di hende muhe cu ta juda otro den silencio, ta resa y pidi pa otro den silencio. Hende muhe ta e curason cu ta laga nos sociedad briya y vibra.

Cu honor y Dignidad pa tur muhe

Ingrid Werleman