famia – Page 6 – Comprondiendo Bida

Tuma Tempo…Duna Amor

Amor y Tempo a trese Al Figaroa riba un pensamento profundo y eterno…

Un contribucion di Al Figaroa.

“Che! Ouderwets! Ta ki beneficio mi lo tin cu e pensamento ey. Bo ta pega den pasado cu yen di miedo pa acepta cambio. Bo ta keda papia di historia cual ami no tin parti den dje y sobre todo, niun tiki ta interesami. Tempo ta luhoso pami y cada minuut di dia ta costami puro risa. Si abo no kier balota bo tempo, ami mi mucho menos lo kier gasta dimi ariba bo”.

Siglo binti un, un cambio grandi, specialmente den e multitud un generacion nobo, producto di nos atribuito. E unico cos cu nos ta hasiendo ta bringando y multiplica. Trapando otro, chercha y scupi na suela. Guera, destruccion soberbia. Unda nos balor a keda? E respet pa nos prohimo! Unda e balansa a keda pa wanta nos na suela? E ta basa riba tempo y amor? Speculacion lo bisa cu amor no ta muriendo pero simplemente ta tumando un otro direcion. Algun dia muriendo, algun dia naciendo?
Continue reading “Tuma Tempo…Duna Amor”

Birando E Cambio tabata un workshop diferente…

Laga bo accionnan y pensamentonan ta e regalo di mas grandi cu bo ta duna na bo mes y bida mes… e resumen di e workshop ‘Birando E Cambio’…

Edjean Semeleer a habri e anochi cu e cantica ‘Recuerdo’ di Ramon Krozendijk cu a laga tur hende keto keto…pa Edjean y hendenan presente ‘Recuerdo’ ta simbolisa E Aruba cu nos tur ta stima y cu ta cambiando cada dia mas…pesey Edjean ta bisa: “Den cada rol di nos bida, ta bon pa nos ta conciente di e ehempel cu nos por ta cu e cosnan cu nos ta hasi, bisa y pensa”. Danki Edjean, abo riba bo mes ta un inspiracion di e Arubiano di noble curason. E ta radia, no solamente di bo canto, pero di henter bo ser.

Belquis Moreu a comparti 4 palabra cu por juda un hende transforma su bida. Nan ta ‘danki’, ‘mi stima bo’, ‘despensa mi’ y ‘pordona mi’. E publico a bisa e palabranan mientras nan ta hasi tapping.
Continue reading “Birando E Cambio tabata un workshop diferente…”

Amor ta tambe…Crea Conciencia Comunitario cerca nos yiunan…

Kico ta Amor? Pensa riba Crea Conciencia Comunitario cerca nos yiunan… E ta Amor tambe… un bunita forma di Amor … combina cu disciplina…

Un tema di e workshop ‘Birando e Cambio’ ta ‘Kico ta Amor?’, presenta pa Ingrid Werleman y Belquis Moreu

Esaki ta un tema cu lo trese diferente punto di bista riba cua nos por pensa… Un di nan ta si ta importante pa Crea Conciencia Comunitario cerca nos yiunan…

Pakico si? Pasobra e unico manera pa un mucha sinja ta dor di experencia propio…pero loke nos ta mira hopi awendia cu ta sobre-proteje e muchanan demasiado. Nos ta wak cu e ta hopi mas cu 3 generacion atras. Antes e muchanan tabata traha gran parti di dia den campo y nada tabata pasa nan. Ta berdad cu tin mas peliger den caja, pesey ta importante pa como major nos realisa cu: ‘Mi jiu no ta mi amiga, pero ami ta su coach y mi ta hasi esaki cu amor y disciplina’.

Continue reading “Amor ta tambe…Crea Conciencia Comunitario cerca nos yiunan…”

Dr. Carlos Viana ta amplia riba e tema ‘Cuminda y Calidad di Bida’

Dr. Carlos Viana ta un di e facilitadornan di e workshop ‘Birando e Cambio den Bida’. Dr. Viana lo paga atencion na e efecto di cuminda riba nos curpa, mente y espiritu. Diahuebs awor, mei 26 na Spirit of Aruba, Ierlandstr. 22.

Diahuebs, mei 26 awo ta bay tuma lugar e workshop ‘Birando e Cambio den Bida’.
unda Dr. Carlos Viana ta un di e facilitadornan. Despues di e anochi ‘Pensando riba Bida’ di e projecto ‘Comprondiendo Bida’ hopi hende a pidi pa organisa un actividad unda por profundisa mas riba e temanan cu a bin padilanti. Dr. Viana lo repasa cuminda y tur aspecto den bida di e ser humano y tambe tur e fase di edad y nan particularidad. Tin cambionan grandi cu a tuma lugar den ultimo decadanan den nos estilo di bida. E cantidad y sorto di cuminda disponibel a bira hopi mas. E forma di come ‘moderno’ ta nifica pa hopi hende cu e ta ocashona demasiado vet di curpa. Consecuencia por ta obesidad epidemico y mortal. Si nos considera cu un estudio a mustra cu na Aruba mas di 60% di poblacion ta demasiado gordo, esaki ta motibo pa preocupa. Dicon? Esaki ta nifica costo astronomico di AZV, dor cu e riesgo di salud cu ta subi.
Continue reading “Dr. Carlos Viana ta amplia riba e tema ‘Cuminda y Calidad di Bida’”

Comprondiendo Bida cu workshop ‘Comprondiendo y Birando e Cambio den Bida’

Despues di e anochi ‘Pensando riba Bida’ durante cua a presenta e projecto ‘Comprondiendo Bida’ hopi hende a pidi pa organisa un actividad unda por profundisa mas riba e temanan cu a bin padilanti. Pa e motibo aki lo organisa un workshop cu e tema ‘Comprondiendo y Birando e Cambio den Bida’.
E anochi aki lo concentra riba 3 tema cu ta ‘Amor, kico e ta?’, ‘Tips pa un sonjo saludable’ y ‘Cuminda y Calidad di Bida’. E prome tema ‘Amor, kico e ta?’ lo ta na encargo di Belquis Moreu y Ingrid Werleman. Lo trata amor como actitud basico den bida y atraves di historia di e ultimo 200 anja mira dicon nos a perde e coneccion cu nos tabatin cu bida den su totalidad.
Continue reading “Comprondiendo Bida cu workshop ‘Comprondiendo y Birando e Cambio den Bida’”

Belquis Moreu pensando con hunto nos por crea un miho majan

Si nos sa cu loke nos hasi awe ta crea nos futuro di majan, kico abo lo cambia awe? Belquis Moreu a hiba nos un rato den futuro durante e anochi di presentacion di Comprondiendo Bida na Biblioteca… www.comprondiendobida.com

Belquis Moreu a hiba nos un rato den futuro durante e anochi di presentacion di Comprondiendo Bida na Biblioteca Nacional… Un futuro unda probablemente nos ta biba pa e cos y no pa ken nos por ta como ser humano. Pa nos tin un miho mundo majan ta importante pa nos realisa cu nos mester uni man y no tira culpa riba otro. Ta fout di gobierno, ta fout di maestronan, ta fout di majornan, propaganda, comercio. No, pa crea hunto un miho majan mester realisa cu e tarea ta di nos tur. Ta nos responsabilidad pa laga atras un miho mundo cu nos a topa y pesey ta importante pa tur partido pone nanishi den mesun direccion y mira con nos por jega na e solucion mas miho den un mundo y pais unda tin menos medio na e momento aki, pero mes tanto hamber na calor, sosten y amor di hende.
Belquis a capta curason di tur presenta ora e la duna un bista di nos futuro, si nos no tuma accion awe.
Continue reading “Belquis Moreu pensando con hunto nos por crea un miho majan”

Dr. Jaime Falconi: Pensando riba Sonjo

Na ocashon di presentacion di www.comprondiendobida.com dr. Jaime Falconi a papia riba ‘Bibando den temponan cu ta cambiando y pakico hopi hende no ta drumi bon’ a capta hopi atencion.

Na ocashon di presentacion di www.comprondiendobida.com dr. Jaime Falconi a papia riba ‘Bibando den temponan cu ta cambiando y pakico hopi hende no ta drumi bon’ a capta hopi atencion. E la mustra cu tin hopi preocupacion cerca hendenan y tin hopi soledad. Tin hende cu ta drumi poco ora pa dia of nan ta drumi pendiente di ki ora e jiu ta jega cas of di e problemanan di majan. Un sonjo asina no ta laga bo sosega y bo ta lanta mes cansa cu ora bo a bay drumi. Un hende mester di un sonjo profundo pa laga e curpa y mente sosega. Pesey ta importante pa bo entrega bo mes na e sonjo. Drumi cu lus no ta bon, e ta stroba e centro di bo sonjo. Problema cu sonjo na Aruba a crese pasobra Aruba ta manera un parke di lus anochi. Hende cu tin problema pa entrega nan mas na sonjo, por usa musica relajante, meditacion, yoga pa logra e sonjo cu ta duna descanso di berdad. Realisa cu un hende cu ta drumi mucho poco ta muri mas trempan. Esaki ta un realidad cu no por trese cambio den dje.
Continue reading “Dr. Jaime Falconi: Pensando riba Sonjo”

Presentacion di Comprondiendo Bida y evento ‘Pensando riba Bida’ a inspira…

Presentacion di Comprondiendo Bida y evento ‘Pensa riba Bida’ a inspira…un bista general di un anochi pa alimenta nos alma y curason

Na prome lugar danki na tur hende cu e a hasi e bunita anochi aki posibel. E tabata un anochi cu a toca hopi curason. Tambe cu a inspira e publico presente pa pensa riba bida. No solamente e bida awe, pero tambe e bida majan. E bida na nos pais Aruba. E bida den nos famia.
Mi persona, Ingrid Werleman a cuminsa e anochi cu un presentacion di e website Comprondiendo Bida. E oradornan Dr. Jaime Falconi, Belquis Moreu, Edsel Lopez y invitada di honor minister Michelle Winklaar tabatin algun puntonan comun den nan mensaje. Nan tur a mustra riba e cambionan den bida cu nos lo por pensa riba dje. Bida pura y agita a pone nos bay den un rutina di bida cu ta laga poco tempo pa interaccion humano.
Continue reading “Presentacion di Comprondiendo Bida y evento ‘Pensando riba Bida’ a inspira…”

“Weganan di computer no ta asina inocente!”

Poco tempo pasa e revista hulandes Elsevier a publica resultado di un investigacion cientifico riba e efecto di weganan di computer. A resulta cu weganan violento sigur sigur tin un efecto negativo riba hobennan. Si mas y mas ta focus riba e importancia di norma y balornan sano con nos por permiti weganan unda e hungado ta haja punto pa tortura su adversario y peg’e na candela. Esaki ta sosode den e wega Postal. Hopi hende ta papia di ‘violencia sin sentido’ y toch ta permiti nan jiu hunga weganan jen di violencia. Laga nos realisa cu un mucha no semper por diferencia entre fantasia y realidad. Weganan di computer no ta asina inocente. Tin hopi elemento robes den nan.
Continue reading ““Weganan di computer no ta asina inocente!””

Con pa evita violencia sin sentido…

Violencia sin sentido… Pregunta cu semper ta hasi ta: “Con cos por a jega asina leu? Con nos por a preveni?

Mas y mas nos ta tende awedia di ‘violencia sin sentido’. Violencia sin sentido tin diferente grado. E por varia di danjo fisico grave, te morto di e victima. E matamento sin sentido recientemente den un shopping mall na Hulanda dor di un hoben hulandes ta cay bou un categoria extremo di violencia sin sentido. Mescos cu e habrimento di e graf di defunto Betico Croes na Aruba tabata violencia sin sentido. Un acto hopi macaber y falta di respet pa un persona cu a nifica asina hopi den Aruba su historia.

Con pa preveni violencia sin sentido?
Cada biaha cu violencia sin sentido tuma lugar esaki ta shock comunidad di nobo. Claro, tur hende ta di acuerdo cu violencia sin sentido ta un problema nacional. E ta hasi hende rabia, tristo y confundi. Pregunta cu semper ta hasi ta: “Con cos por a jega asina leu? Con nos por a preveni? Pa logra esaki hopi biaha ta punta dede riba gobierno, pasobra gobierno lo mester protega pueblo di violencia sin sentido. Pero si nos mira bon, kico gobierno por hasi pa preveni un situacion pa cua ningun hende ta prepara?
Continue reading “Con pa evita violencia sin sentido…”