Tips importante pa bo sa ora bo bay un spa

Con hopi abo sa di higiena y seguridad den e spa cu bo ta bishita? Aki Beauty with Style ta duna algun tips balioso pa bo paga tino riba nan. Hopi importante… ta bo curpa, cuid’e!

spa salon Nos curpa ta nos tempel, pesey nos mester cuid’e… Nos curpa ta hopi importante… e ta contene nos celebro, nos alma y nos wesonan, organonnan, nos musculo y tehido. Sin nos curpa, nos no tin bida na mundo. determina nos calidad di bida… nos curpa merece cuido, bon cuido. Pa e motibo aki nos mester ta conciente con nos ta cuid’e y ken nos ta laga juda nos cuid’e. Den e temponan druk cu nos ta biba aden hopi di nos ta bay un salon of spa pa tuma un masashi. Y cada salon ta hasi su esfuerso pa duna un miho servicio posibel. Toch tin ora tin cierto detayenan cu ta skip na atencion di e hendenan cu ta traha eynan. Pa e motibo aki diferente pais a determina standardnan internacional pa garantisa un nivel di higiena, cuido y rekisitonan ambiental den cada salon of spa.

Esaki ta importante pa e cliente, pero tambe pa e trahadonan. Asina hunto nos ta aporta pa Aruba bira un isla preferi pa su servicio y cuido di e curpa humano. Na Hulanda e reglamentacion pa salon y spa ta conoci como e HAM-code. Den e codigo aki ta stipula e reglanan di higiena, arbo of codigo di trabou y medio ambiente. E higiena ta prescribi con mester anda cu p.e. serbetenan, kleechi, limpiesa en general di e salon. E arbo ta regla e seguridad di aparatonan y coriente. Tin wajanan di coriente los cu por trompica riba nan den e salon? E aparatonan ta ergonomico? E parti di medio ambiente ta regla e forma con ta tene cuenta cu e medio ambiente. Con ta deshasi di hanguanan y material di sanger, etc.

Na kico abo como cliente por paga tino?
– Por sosode cu un cliente por bira malo durante un tratamento. E ora ta importante pa e terapista tin un certificado di EHBO, esta prome auxilio. Generalmente esaki ta colga den e salon, si esaki no ta e caso, bo por puntra p’e. Corda cu ta trata di bo curpa y bo cuido.

– Esaki ta conta tambe pa e certificado di H.A.M. cu bo por puntra p’e, si bo no ta mir’e colga.

– Corda kita tur joyas cu bo tin bisti. E por ta fastioso si nan pega den un aparato cu e terapista ta usa y kibra.

– Paga tino si e kleechi y serbetenan ta limpi y no tin mancha di azeta di masashi, etc. Pidi semper pa loke abo ta haja cu bo tin derecho riba dje.

– Paga tino si tin kabelnan di coriente cu ta core los riba vloer. Bo por trompica riba nan y haja golpi.
– Paga tino na e hunjanan di e terapista, si nan ta corta chiquito y ta limpi.

Esaki ta algun tips di Beauty with Style … si bo kier sa mas di nos trabou bo por bishita nos website www.bws-aruba.com

Ad Beauty with Style

Leave a Reply