calor humano – Comprondiendo Bida

Por ta cu preocupacion ta stroba bo soño…

Tempo ta pasa…con hopi a cambia den bo bida? Prome parti di un entrevista na 2010 cu Dr. Jaime Falconi, neurologo y psichiatra.
…Hopi hende ta drumi malo… nos sa cu tin hopi cos cu no ta klop den nos bida, pero nos no ta busca yudansa…nos ta prefera di wanta e berguensa y kibra nos cabes, keda sin drumi…

Tempo ta pasa…con hopi a cambia den bo bida? Prome parti di un entrevista na 2010 cu Dr. Jaime Falconi, neurologo y psichiatra. Tanten dr. Falconi ta felismente penshona y ta duna su cooperacion riba peticion.

Dr. Jaime Falconi, neurologo y psichiatra Arubiano tin e tema aki como un punto di atencion grandi. E no ta solamente un problema serca hende grandi, pero pa hopi tempo caba e ta un fenomeno cu nos ta wak tambe serca hobennan y te hasta serca muchanan hopi chikito.

Di con?
• Pasobra nos custumbernan di biba a cambia, consecuentemente tambe nos ritmo di drumi.

Antes nos tabatin 2 of 3 canal di television. Awendia nos tin cable y dish cu un cantidad grandi di canal, 24 ora pa dia. Nos tin internet, ADSL 24 ora pa dia. Y….nos tin menos control di majornan kico nan yiunan ta hasi, ora cu lo mihor pa nan ta pa nan ta drumi. Mayornan ta traha warda, nan tin nan propio preocupacion y tempo a bira moderno. Muchanan tin hopi mas libertad cu antes, talves demasiado pa nan propio bienestar y felicidad.

• E constelacion di nos famianan a cambia. Nos tin hopi mas famia di un solo mayor. Esaki ta nifica mas obligacion riba lomba di un solo mayor. Pues tambe mas preocupacion. Mamanan cu ta lanta nan so cu nan yiu no ta un tarea facil, placa hopi bes no ta yega, yiunan ta mas rebelde. Y e mama na final di dia y prome cu e pega soño ta ocupa su mes cu e problemanan cu e mester soluciona mayan. E no tin hopi sosiego berdadero. Con bon e por drumi realmente e ora? Y bo por culp’e si e ta irita pa un periodo largo? Un situacion cu hopi biaha ta bira algo cronico, sin cu e mes ta realisa… E ta subi cama 12 or anochi, ta pega soño 1 pa 2 or madruga…Cuanto ora di soño un persona asina ta haya pa dia? Probablemente pa 5 of 6 or ya e mester ta ariba su pia pa prepara muchanan pa bay scol…

• E control social den nos comunidad a cambia. Nos ‘privacy’ ta sagrado, nos murayanan a bira hopi halto y nos no ta mete cu bida di otro. Di otro banda nos no ta preocupa cu otro mas tampoco… Ni nos ta duna otro un man asina hopi mas… Ni nos kier scucha conseho mas…nos sa cu tin hopi cos cu no ta klop den nos bida, pero nos ta prefera di wanta e berguensa y kibra nos cabes, keda sin drumi, cu busca yudansa…

• Consecuentemente nos ta cay den un circulo vicioso, cu nos curpa no ta haya e sosiego necesario…nos no ta drumi bon, nos no ta drumi suficiente y nos no ta funciona bon…pasobra nos curpa y mente no ta haya e chens pa recupera su mes… Nos mester di pildo pa drumi?

• Nos ta biba den un mundo yen di desordo. Nos kier hasi hopi cos, sali bay hopi caminda, nos kier cumpra hopi cos, nos yiunan kier hopi cos. Nos kier un television riba cada camber? Talves nos por cuminsa realisa cu tin un otro manera pa anda cu bida?

• Nos forma y orario di come a cambia. Nos ta come mucho laat, cu cuminda mucho vet. Si bo ta bay drumi cu un stoma yen, con bon esaki por juda bo pa drumi sosega?

(E ta sigi majan…)

Pensamento pa awe ‘Cuido pa nos grandinan cerca di nan cas’

Bira grandi por ta un periodo di gracia, yena cu alegria. Pa otro hende e por bin cu hopi soledad, dolor, berguensa y duda.

Nos tur tin un famia, conoci of bisinja cu ta birando grandi y no tin niun hende pa cuida nan. Na anja 1988 mi a bay un conferencia di un luna na Suecia y di e tempo aki nan a usa e siguiente modelo. Ta traha a base di e barionan. Ta duna training na personanan interesa pa cuida e grandinan, mescos cu bo lo trata bo famia cu bo ta stima.

Nan mester ta dedica y cu amor pa e trabou cu nan ta hasi. E ciudadonan di e grandinan ta prepara pa atende cu e situacionnan hopi sensitivo cu ta bin cu e proceso di bira grandi. Bira grandi por ta un periodo di gracia, yena cu alegria. Bira grandi por bin tin ora cu hopi soledad, dolor, berguensa y duda. Incontinencia, perdida di memoria, demencia, cuido den e ultimo fase di bida (cuido paliativo), cuido di herida y uso di medicamento.

Ta posibel cu e partidonan politico por paga atencion na un structura asina? Nos famianan a cambia. Por ta e yiu of familiarnan ta biba leu di otro of den otro pais. Por ta cu e famianan mes ta den problema financiero y no tin pa yuda. Pero tin hopi structura cu por pensa unda cada gremio y personanan involvi ta duna un contribucion pa hasi e cuido aki asesibel y pagabel.

Finalmente ta e grandinan aki a cuida nan yiunan y a traha pa nos por tin un bida y un pais awe.

Ingrid Werleman

Pensamento pa awe ‘Mama, un hende cu por hasi milager’

Den tur e cambionan den sociedad
Un cos ta keda consistente
E curason di e mama
Cu ta duna di su mes

Mama, un hende cu por hasi milager

Mamanan ta hende cu hopi fe
Y di esaki mi no tin duda
Ni un momento so

Ora ta toca su yiunan
Un mama lo duna e ultimo gota di su bida
Pa yuda nan
Te hasta a costo di su mes

Tin mamanan cu a hasi cosnan grandi
Inspira pa nan yiunan
Otro mama ta resa
Pa pidi proteccion, salud of guia divino
Ora esey ta lo ultimo cu e por ofrese

Y bo sa un cos?
Ciencia recientemente a discubri
Cu un mucha ta hereda su inteligencia
Di su mama

Mi ta kere cu esaki ta
Pasobra cu un mama ta bira inventivo y creativo
Y sa di hasi milager ora cu un situacion inespera, presenta
Un bunita ehempel ta e e cushina di un mama
Ora su cas ta yen di bishita
Y mama a cushina solamente pa dos

Mama ta bay den frigidaire
Y e ta rende cuminda
Su weja di soppi
Of e weja di boonchi
Esun di e galinja stoba
Direpente ta yega pa tur bishitante come

Aha, e galinja stoba
Y aki mi ta corda mi mama difunto
Y su cas yen di yiu, nieto y bisanietonan
Di bishita pa dia di mama
Combersacion ta bin y combersacion ta bay
Tur ta come, tur ta bebe,
Tur ta yuda hasi cushina limpi ora caba
Famia grandi cu ta topa otro den harmonia

Mientras tanto tempo a cambia
Y ora awo mi wak atras
Mi ta realisa cu cada era tin su tempo
Den tempo
Cada generacion su propio desaroyo

Famia ta crese y ta cambia
Contacto ta bira otro

Y cu cada cabes di un generacion
Cu ta bay sosega
Tempo ta cambia
Bida ta cambia
Custumbernan nobo ta nace

Den tur e cambionan den sociedad
Un cos ta keda consistente
E curason di e mama
Cu ta duna di su mes
Pa ta e miho cu e por ta
Bou di e circumstancianan
Cu bida a brind’e

Felis dia di mama
Pa tur mama
Rond di mundo…

Ingrid Werleman, pa Comprondiendo Bida
Mei 14, 2017

Pensamento pa awe ‘Dialuna, mei 15 ta Dia Internacional di Famia’

Lo ta hopi bunita pa cada sector den comunidad duna atencion na e dia aki, esta e Dia Internacional di Famia. Dialuna, 15 di mei.

Dialuna, mei 15 ta Dia Internacional di Famia, manera decreta pa Nacionnan Uni desde 1996.Tema pa 2017 ta: “Famia, educacion y bienestar”
E anja aki ta focus riba e rol di famia den sociedad, e maneho di gobierno pa promove educacion di famia y tin acceso na bienestar. E atencion pa e dia ta tambe pa crea conciencia con importante ta pa muchanan haja educacion sano desde hopi chikito te dia nan bira adulto.

Un otro meta di Dia Internacional di Famia ta pa mustra gratitud na tur otro persona y organisacion cu ta juda den educacion di mucha. Asina por pensa riba wela y welonan, famia cercano, bon bisinja y amigonan, instancia, fundacion y gruponan social. Nan ta duna un man pa e famianan den un pais por tin bienestar. Ta bon tambe pa duna reconocimento na empresanan cu tin condicionnan di trabou cu ta sostene e famia dor di por ehempel ofrece oranan di trabou flexibel of parttime. Tambe na empresanan cu ta duna hoben- y grandinan oportunidad pa keda activo den trabou pa asina por juda nan famia.

Ta un dia cu nos por duna atencion den media riba e importancia pa tin e conocemento adecuado pa promove un sistema di biba cu ta bon pa nos medio ambiente y ta sostenibel. Na esnan cu ta guia famianan con pa comunica cu otro na un forma sano y respetuoso. Con pa respeta e derechonan humano y promove pas y igualdad den cada famia y pais. Y naturalmente na e instancia y personanan cu ta duna di nan tempo pa comparti nan concemento.

Lo ta hopi bunita pa cada sector den comunidad duna atencion na e dia aki, esta e Dia Internacional di Famia. Di parti di www.comprondiendobida.com nos lo desea di wak tambe actividadnan special pa famianan den bario. Tambe pa duna un carinjo special na e famianan chikito di un solo persona. Hopi biaha nan ta hendenan cu ta biba den soledad. Duna nan tambe un man di aprecio, di hermandad y humanidad.

Felis Dia Internacional di Famia di parti di www.comprondiendobida.com

E soledad di Cristo

Mi ta imagina mi mes cu si Cristo Hesus para awe den e haltura di mas halto, e ta wak tur e Bondad y tur e Retonan den un mundo confundi…

E soledad di Cristo Hesus den e mundo actual.

Buscando un potret di Cristo Hesus, esun aki a capta mi atencion y curason. Mi ta wak den e wowonan, e mirada cu ta wak leu aya y toch asina cerca di su mes, paden. Mi ta wak e mannan crusa y ta purba pensa cu e mente di Cristo…
Kico Cristo Hesus a pensa ora e tabata su so. Den hoffi di olijfi y e ciudad na su pia. Su so su so cu su Tata Celestial. Sabiendo kico ta E caminda, E dolor, cu como yiu di hende, E lo pasa aden.

Mi ta imagina mi si Cristo Hesus lo ta sinta riba e mesun baranca ey awe y ta wak bek riba e mundo. Mi ta kere cu E, como un Bon Wardador lo ta hopi impreshona cu e cantidad di bunita cosnan cu ta sosode den mundo… e hendenan di Bon Boluntad cu den tur adversidad y dificultad ta keda duna Bida na e Lus di Speransa pa un dia logra un mundo cu pas y hermandad.

Mi ta imagina mi mes cu si Cristo Hesus para den e haltura di mas halto, e ta wak tambe tur e gueranan, e destruccionnan, e bidanan inocente cu ta caba pa via di conflictonan den cua nan no tin arte ni parti. E ta wak e soledad di e hende den un mundo confundi. E ta wak e excesonan, e inhusticianan y e abusonan.

Mi ta imagina mi cu e ta pensa ‘Mi rumannan stima, mi lo kier pidi boso pa den e Dianan Santo aki, traha un tiki tempo, para keto un rato, sera bo wowo, bay paden y sinta un rato banda di mi riba e baranca den e hoffi di olijfi. Crusa bo mannan, sera bo wowonan, bay paden y hasi contacto cu bo curason y scucha mi curason. E ta pidi bo, pa nos hunto rescata e Birtudnan di Bida, aplica nan den bo bida di tur dia. Laga nan ta bo guia. Ban re-establese e Paraiso cu un dia mi Tata a brinda boso. Den nomber di tur e criaturanan cu ta cana rond, buscando nan felicidad den un mundo, bastante confundi….’

Abo ta cla?

Ingrid, purbando di Compronde Bida..

Awe ta dia internacional di hende muhe y e hobencita cu nan a agredi.

Tin ora mi ta puntra mi mes si ta destino of ta casualidad ta laga bo wak cierto situacionnan y pakico.

Un caminda den Playa, lorando un birada pa parkeer, mi ta mira un hobencita teenager ta bin di otro banda ta jora di un forma hopi desespera. Mi ta baha pa informa kico a pasa y ta compronde cu un persona riba un bicicleta a agredi e hobencita pa horta su telefon. E hobencita a bay den shock y tur e otro hobennan rond tabata hasi nan esfuerso pa jud’e den un forma of otro. Polis ta bin, ambulance ta bin pa atende e hobencita wardando pa su majornan jega.

Mi ta move di e sitio, pero e cara angustia y yorando desepera di e hobencita ta keda manera graba den mi mente y ta pop up cada biaha.
Mi ta puntra mi mes unda mas nos mucha y hobennan por ta echt safe den e Aruba actual. Majan ta dia internacional di hende muhe y mi ta puntra mi mes kico por hasi pa por garantisa no solamente nos hendenan muhe, pero tur hende grandi, mediano y chikito un Aruba unda bo por cana riba caya sin miedo pa cosnan malo pasa bo.

E potret ta di e ambulance cu a bin pa asisti e hobencita. Concientemente mi no ta pone e hobencita su cara. Ta mas importante pa nos protega privacidad di nos mucha y hobennan. Ta importante tambe pa nos hasi algo pa hendenan cu ta circula riba caja cu intencion menos bon. Nos no por keda wak e hendenan cu ta biba riba caya manera hendenan cu ta molester pa comunidad so. Pasobra si, nan ta! Pero nan ta tambe hendenan cu posibel problemanan profundo y malesa di adiccion. Y nan mester di tratamento y guia. Nos no por keda biba den un circulo vicioso di miedo y laga pa cada hende y famia busca nan propio solucion. Esaki por hasi cu mas y mas hendenan lo sera nan mes tras di e murayanan di nan cas pa evita cu algo malo pasa nan. Of loke ta pasa caba, nan ta tuma justicia den nan mes man.

Ami lo kier wak un comunidad di hendenan cu tin alegria di bida y ta comparti cu otro. Mi ta muhe y mi ta mama y mi ta stima mi pais. Y mi ta kere cu ta birando mas y mas tempo pa nos admiti cu nos pais a cambia hopi. Mi no kier bay bek na e cosnan menos bunita di pasado, pero si lo kier mira un Aruba cu ta dushi y safe pa biba.
Con dushi lo ta si nos por mira un sonrisa riba cara di nos hobennan. Un Aruba jena cu hendenan contento y felis.
Nos pais ta un pais hopi chikito y si nos tur enfoca riba e imagen aki y duna di nos parti, sigur nos por logr’e.
Na honor di nos mes y e generacion cu lo sigi nos, ban pone man na obra.

Ban protega nos comunidad cu e forsa di nos curason!

Awe, dia internacional di hende muhe, ta un bunita dia pa cuminsa!

Ingrid Werleman, editor

Kada mucha tin su nochi

E poesianan di Karen D. Russel de Corrales ta manera un brisa suave di mainta. Nan ta bisa berdadnan grandi cu un suavidad cu ta transforma.

Den e nochi di deskanso, un mucha ta drumi

ta soña soño bunita di hubentut

yen di speransa di rikesa i salú

Den e nochi di tristesa un otro mucha ta pensando

Ta sintié será den trampa di skuridat

sin su preguntanan wordu kontestá dor di soledat

Den e nochi di flakesa un stoma ta gruña

e mucha ei na otro banda di nos mundu

No por drumi debi na hamber profundo

Den su anochi di desesperashon, no ta su stoma so:

e mucha ta hambrá tambe pa pas

pa inosensia, pa edukashon y pa amor den su kas

Den e nochi di speransa, mara nos mucha por tin fe;

ku no tin awe nochi so, i ku su preguntanan

tur lo wòrdu kontestá ora lus sali mañan

1994 Karen D. Russel de Corrales

http://www.kdrdecorrales.com/

E buskeda pa un mundo inocente cu casi ya no ta existi.

e mucha cu ta e guardian di nos consenshi

Barbie, simbolo di inocencia cu a cambia?

‘Nos no a hereda e Mundo aki di nos ancestronan. Nos a fi’e di nos Jiunan.’ ~ Proverbio Indjan

Nos por mira nan wowonan chikito spanta ora nos mira noticia di guera, na television y den corant. Y wak bon, hopi biaha un mucha lo busca su peluche pa bay cu n’e. Ora e ta bay drumi, sali, biaha y si, te hasta ora e ta huy di guera of di violencia. ‘Stranjo, no?’, un adulto lo pensa. No, pasobra te hasta den un mundo marca pa violencia, muchanan semper lo sigi hunga tur caminda.

Den e drama di e avion di Malaysia Airlines e potretnan cu mas a toca e curason di hende ta esunnan di e buki di un mucha cu tabata abordo, e peluchonan y pa no lubida e potret di e soldad cu e macaco.

No ta stranjo, pasobra maske nos no ta realisa, majoria sentimento di dolor y alegria den nos bida tin nan rais den nos anjanan di mucha chikito. E potret di e mucha y su pelucho un caminda den nos memoria ta hiba nos bek na e mucha den nos mes y un mundo inocente cu casi ya no ta existi.

Y esaki podise a bira pio cu e popularidad di e social media y e libertad di expreshon cu facilmente por transforma den libertinaje di expreshonnan emocional. Ora mi wak riba Facebook, mi ta haja e impreshon cu tin hopi hende a bira experto den tur materia. Ta parse cu hende ta competi pa ken tin rason of E berdad, lubidando cu E Berdad ta haja un cara diferente den cada opinion personal. Ora mi sinti cu hende ta competi pa ken ta haja mas atencion, esaki ta pone mi bira keto di paden, pasobra mi no kier ta den e ratrace ey. Mi ta sinti cu cambio den e forma cu nos ta wak bida lo bin solamente ora nos por jega na e puresa den nos curason. Anto aki e criaturanan chikito den mundo y cu nos tambe un dia tabata, ta hunga un rol atrobe. Solamente mirando bida for di e wowonan di un mucha, nos por bay bek na e estado di conciencia cu ta puro y no por ser cumpra ni corumpi. Y te na e momento aki, nos ta cla y prepara pa hasi nos trabou como adulto.

Mi stima bida y mi lo kier laga un mundo pa mi yiunan y mi nietonan atras cu ta miho cu loke mi a haja. Y mi sa cu den curason di cada ser humano tin e deseo di ta felis y hasi otro felis. Lastima cu materialismo y hamber pa poder a cambia hopi hende nan prioridadnan.

Ami semper lo kier mantene mi vishon di nos mundo como un Shangri La of Utopia, pasobra por. E ta rekeri conciencia y e lidernan adecuado cu no tin prijs riba nan cabes. Pa mi e ta bay pa hende por biba den respet pa otro y pa tin lugar pa cada hende. Y e simbolo ta e mucha cu ta e guardian di nos consenshi.

Ingrid Werleman, juli 2014

Keintura Oranje, Union y Violencia

Un dia bo lo biba e momento magico aki na bo isla: pasobra Aruba ta un Dushi Tera!’

Dos siman pasa mi a bay un concierto cu mi nieto den un stadion grandi na Hulanda. Tabata e prome wega tambe di Hulanda y e organisadornan a combina e concierto y e wega di futbol na un forma hopi sabi. Den e stadion tabatin pantajanan supergrandi pa wak e wega entre e dos mitanan di e concierto. Tabata un experencia bunita, casi magico pa mira un stadion jen di hende bisti na oranje y cu un solo pensamento y focus: ‘Tur kier pa Oranje gana!’.

Semper ora mi experencia un evento masal asina, mi ta sinti e deseo pa un dia biba un actividad asina cu ta uni gran parti di nos pueblo chikito di Aruba den un solo curason y pensamento.

No solamente di pafo, pero di paden. Den un union cu ta crea e energia ey cu ta hasi cosnan grandi posibel y juda sana un pueblo y su famianan unda cu tin mester.

Den mesun rosea mi ta sinti cu ta lastima cu cada dia mi ta lesa den corant y via medionan social cu tin asina tanto violencia, ladronicia, accidente y desunion. Mi ta lesa e vocabulario cu hubentud ta usando cu otro y mi ta pensa. ‘Unda respet a keda ora ta usa palabranan hopi mahos pa insulta otro’. Mi ta mira mescos den scenario politico.

Y mi curason ta bolbe bay bek na e momentonan magico di e concierto y mi ta pensa ‘Un dia, Ingrid. Un dia bo lo biba e momento magico aki na bo isla: pasobra Aruba ta un Dushi Tera!’.

Ingrid Werleman

Kico cancer a siña mi.

Cu hopi danki na e 3 damanan aki pa a comparti nan alma, curason, speransa, fe y balentia cu nos. Dios bendiciona boso semper!

Cu hopi danki na e 3 damanan aki pa a comparti nan alma, curason, speransa, fe y balentia cu nos. Nan tabata nos modelonan precioso pa e poster di Viva La Donna Day 2009… Carina, Ingrid y Gina… Dios bendiciona boso semper!

…Mira bida di un otro forma…disfruta conciente di cada dia…di mi famia…di naturalesa…mi a siña pa biba ‘awe’… cada dia ta un dia…tin dia duro…pero esaki ta conta pa tur hende, cu of sin cancer …stima mi mes…stop di pone otro hende semper na prome luga…duna e cancer un luga den mi bida y sigi biba, mescos cu tur otro hende… Bisa mi mes cu Dios a cura mi caba y ‘Go for life’…pa gosa di bida…siña corda riba mi mes tambe… Si mi por a cambia algo, mi lo a biba cu menos stress, menos core core… enjoy life…hari hopi…busca hende positivo rond di mi…prome mi a pensa ‘morto’, awo mi sa cu despues di cancer ‘tin bida’…