Dr. Jaime Falconi: Pensando riba Sonjo

Na ocashon di presentacion di www.comprondiendobida.com dr. Jaime Falconi a papia riba ‘Bibando den temponan cu ta cambiando y pakico hopi hende no ta drumi bon’ a capta hopi atencion.

dr Jaime FalconiNa ocashon di presentacion di www.comprondiendobida.com dr. Jaime Falconi a papia riba ‘Bibando den temponan cu ta cambiando y pakico hopi hende no ta drumi bon’ a capta hopi atencion. E la mustra cu tin hopi preocupacion cerca hendenan y tin hopi soledad. Tin hende cu ta drumi poco ora pa dia of nan ta drumi pendiente di ki ora e jiu ta jega cas of di e problemanan di majan. Un sonjo asina no ta laga bo sosega y bo ta lanta mes cansa cu ora bo a bay drumi. Un hende mester di un sonjo profundo pa laga e curpa y mente sosega. Pesey ta importante pa bo entrega bo mes na e sonjo. Drumi cu lus no ta bon, e ta stroba e centro di bo sonjo. Problema cu sonjo na Aruba a crese pasobra Aruba ta manera un parke di lus anochi. Hende cu tin problema pa entrega nan mas na sonjo, por usa musica relajante, meditacion, yoga pa logra e sonjo cu ta duna descanso di berdad. Realisa cu un hende cu ta drumi mucho poco ta muri mas trempan. Esaki ta un realidad cu no por trese cambio den dje.

Tambe ta importante pa nos cambia nos focus. Na lugar di busca sensacionalismo, no habri radio pa scucha cuanto atraco tin, habri corant pa wak cuanto sanger a drama. Pero educa bo mes… riba e pregunta dicon tin tanto preocupacion, soledad y violencia y con pa evit’e. Un website manera www.comprondiendobida.com ta un bon ehempel unda por haja informacion educativo riba temanan di bida y den Papiamento.

Riba e pregunta kico e ta pensa riba violencia dr. Falconi ta bisa cu violencia semper tabat’ey den historia di humanidad. Wak cuanto hende a muri den guera mundial, na Vietnam, den guera na Medio Oriente y den tempo di inquisicion. Pero semper e ser humano a busca e cambio y semper a logr’e. Dus nos tambe lo bay logra e cambio. Awor aki nos tin berdad hopi distraccion, pero nos no mester warda te ora cos bira pio. Pa nos tin un miho majan, ta importante pa nos cuminsa actua awe.

Hopi biaha nos ta dedica mas tempo na trabou y ora bo realisa cu bo a perde hopi tempo cu bo por a pasa hunto cu bo yiunan, cu bo famia, probablemente bo yiunan ta grandi caba y no ta cerca bo mas. Otro hende ta bay cu nan y no semper na e miho manera. Den nos tempo moderno hende ta traha hopi ora, no tin tempo pa come hunto den famia, combersa pafo, wak strea cu luna. Ken ta mira e strea di mas grandi. Esaki ta un ehempel simpel di bida diario cu por trese experencianan dushi den un famia. Cosnan cu un mucha nunca lo lubida.

Den nos realidad di bida tin muchanan cu no ta come bon y pues e no por sinja na scol tampoco y hamber y falta di vitamina por crea iritacion y actitud indesea. Tur esey nos por evita dor di pensa bon kico nos kier cu nos bida y kico nos por laga cay pa logr’e.

Finalmente e ta tocante e desishon cu cada hende ta tuma…y cada un lo tin su consecuencia, sea positivo of negativo.

Leave a Reply